係蟳埔民俗文化村影相影到筋疲力盡，所有小朋友一上車自然好快就瞓晒啦~無論搭車搭得長又好短又好，應該阻止唔到佢哋瞓覺~忽然間到咗目的地了，原來我哋去2019年時去過嘅五店市傳統街區呀~
嗰度有好多老建築聚集埋一齊，自成一角，入面有啲靚靚嘅cafe，又有得參觀下啲gallery、書店，當然唔少得買手信嘅地方，上次嘅印象嘛，因為落好大雨，所以好狼狽要搵地方避雨，另外有睇人哋整麥芽糖公仔棒棒糖~至於可以帶得番屋企嘅，就係嗰次Sandy嫲嫲話買俾每個小朋友一人一件自己揀嘅禮物，紀念品嘛，一般梗係諗要揀有當地特色嘅嘢嘛，但2歲同差不多5歲嘅小朋友睬你都傻，總之揀嗰一刻最吸睛嗰樣嘢啦~當年嘅曉揀咗個Ariel陀錶(同福建有咩關係)，詩就揀咗一架只有一隻手咁大嘅玩具超市購物車(同福建有咩關係x2)，偏偏佢哋係真心鍾意，返到嚟香港都仲佔據重要位置咗好一段時間，仲要隔咗四年我都仲咁記憶猶新，咁又真係幾抵買~
今次嚟到，第一樣要克服嘅係未瞓醒又有啲煩躁嘅幾個小朋友，瞓到唔願落車，大舅公，唔好夾硬嚟呀，你唔好抱佢哋呀，真係嚇餐死~我諗要令大家快啲醒神嘅方法，應該係買啲甜嘢飲下，所以入到去五店市傳統街區，首先搵個地方坐低~
我哋坐低呢間郵局咖啡好別緻，好似個四合院咁，中間有個天井，天井有個水池，坐係旁邊好舒服~我個微信用唔到，又變咗handicapped，點唔到餐﹗﹗要用老公個電話先嗌到嘢飲~嗰度賣啲茶飲，唔知大家口味，就隨便點有啲凍有啲熱有啲有奶有啲冇奶有啲有糖有啲冇糖咁啦，總之大家需要坐坐飲下嘢醒神呀啫~
呢度只係扮飲茶>v<大舅公演技好好﹗
飲完嘢之後大家一齊逛咗一陣就分開活動了，我哋想趁最後機會買少少手信~入到一間書局，就揀咗啲福建美食磁石貼俾大家，潤餅、蠔煎、麵線，仲有買咗個簪花女孩嘅鎖匙扣俾逸逸，全部都係我哋今個trip嘅美好體驗呀~
影下老建築
曉點解係背脊嘅？
wink~
周圍逛逛，影影相，差不多到集合時間要去食晚餐嘅地方了~
出嚟時大舅公送俾曉詩兩姊妹一人一支麥芽糖，係囉，同記憶吻合，五店市就要有麥芽糖~就快食飯，留起佢先啦~後來搭飛機大派用場，嗒下嗒下即刻冇咁悶~
原來晚餐要過去石獅同大伙兒一齊食，我哋準備離開五店市時開始灑幾滴毛毛細雨，但上咗13座之後開始落大雨啦，仲要行雷閃電樣樣齊晒，應該有黃雨紅雨咁緊要，好在我哋上咗車啫~但亦因為大雨，所以行車比較慢，居然路上小朋友們開始陸續話急尿，但出面咁大雨，即使停低某處去廁所都會全身濕晒，而且根本冇乜適合停車去廁所嘅地方~佢哋開始嗌急嘅一段時間之後，連我自己都開始覺得急，難怪幾個都躁動不安了，一定變得非常急啦~所以呢程車係非常不安地度過，風雨交加+急聲四起，大家都非常期待去到晚餐嘅地點~
終於停低啦，大家幾支箭衝入去，都未知嗰度咩地方，總之向住廁所標誌直奔啦~好在有好多格，格格都好乾淨，大家可以分頭解決，出番嚟先至可以情緒穩定番~呢個集體急尿事件真係今個trip嘅其中一個經典~
我哋搭電梯上去食飯嘅地方，一出lift，點解好似酒店房樓層嘅？原來係一間間私隱度極高嘅包廂，我哋直接去到我哋間房就見到大家了~雖然話同爺爺嫲嫲一齊嚟，幾日以嚟都好似冇乜點同佢哋一齊玩過咁，而家終於團聚了，晚餐仲有大舅父大舅母、二舅父二舅母、姨媽嘅仔同新抱兩公婆，加埋我哋四個+三個+兩個，咁多人食飯都可以同一張枱﹗﹗仲要有座位剩﹗﹗仲要可以人人自己夾到餸﹗﹗全靠電動轉盤﹗
今次唔會因為電動轉盤而再大驚小怪了~但我哋依然大驚小怪，因為張枱超大，毎電動轉盤都超大，啲餸只需要擺外圈嘛，我哋張枱中間居然有山水模型嚟做裝飾，實在太誇張了~
濟濟一堂
呢度廂房好靚，景觀超開揚，了解一下先知道原來呢度叫石獅榮譽國際酒店，而家打blog時一search，先知道呢間酒店係Trip.com入面石獅豪華酒店嘅no.1，難怪咁靚啦~睇下個網頁，啲房間同其他設施都好靚喎，不如下次嚟福建時住下呢度啦~
食物當然樣樣又靚又有水準啦~又唔影相又隔咁耐先打blog真係好唔應該，我居然唔記得咗食咗啲咩~~~~最震驚又最遺憾嘅，應該係食到八成左右飽出現咗片皮鴨﹗﹗呢啲咁好味嘅嘢點解咁遲先出現，即使好飽都好我都包咗兩三件嚟食~
呢張係我同老公兩部機夾埋唯一嘅一張食物相，呢個包好好味~
大家停晒手我仲努力奮戰到最後一刻﹗
飽到冇晒(食嘅)戰鬥力嘅小朋友們就去梳化嗰邊玩UNO~
晚飯後有交換禮物時間，我哋只係準備咗少少心意送俾幾位長輩，但大舅公二舅公佢哋就準備咗超級多特產俾我哋帶走~
好在我有額外一個摺疊式旅行袋(我哋叫佢做竹篙灣袋，因為上次爸爸去竹篙灣隔離就係帶呢個袋去)，可以幫奶奶手裝啲嘢返嚟~
之前兩晚都早出晚歸，所有力都燃燒殆盡先返酒店，即使有個靚浴缸，浸浴愛好者兩姊妹都未有機會浸，今晚唔浸就冇機會啦，所以我答應佢哋，如果返到酒店落車、返房你哋都神智清醒，冇人發脾氣嗌交就可以浸啦，為咗浸浴，兩個極攰嘅人仔都好合作，正好俾我係出面執下行李~第二朝九點鐘飛機，好早就要出發去check in啦，都係執定個大概穩陣啲~
石獅榮譽國際酒店：
http://ssgrand.honorhotel.com/
前往其他中國旅遊blog