落船呢一日要長距離travel，因為去到威尼斯已經係下午比較晏嘅時間，我本來都刻意安排咩行程，反正之後有一個full day一個half day，再安排去邊去邊吧~唔好講咁多，去食嘢先﹗
因為太肚餓，已經唔想揀擇，我哋出番大街，見到有間cafe就馬上坐低，務求係最短時間之內有嘢放入口~我應該已經餓到影唔到相，我部手機下一張相已經係食完嘢之後嘅事，好在我老公知道我點都要影，由佢補上~
終於有嘢食…兩個已經餓到dur晒~叫咗啲三文治、咖啡、檸檬茶就jap jap jap jap jap~
食嘢嘅呢間Bar Ai Scalzi就係我哋酒店對出大街~
未嚟過真正嘅威尼斯之前，只去過澳門嘅威尼斯人酒店，嗰個地標建築就係聖馬可大教堂、總督宮、大運河吧，我哋睇Google Map，步行過去半個鐘左右，walkable丫，就慢慢散步，沿路睇下嘢啦~
第一日嚟到威尼斯，當然不停被水鄉嘅運河景色，同埋四周都係古典氣息嘅建築物吸引啦，但係睇咗啲乜、影咗啲乜都唔係好分到lu~
餐廳對出運河位置
運河好繁忙，時時都會見到各種船，有作為公共交通工具嘅船，有水上的士，有遊覽用嘅貢多拉，仲有其他本地人工作用出入用嘅船~
有人好想上鏡，要注明，嗰隻手唔係我架~
一齊影啦~
行上一條又一條嘅橋，穿過一條又一條嘅小巷，偶爾鑽入冇人嘅小路，又搵番路出番嚟大街，umum…如果話半個鐘左右行到去係有啲難度囉~
路邊畫廊
橋與貢多拉
打呢篇blog呢一刻係2026年6月，嚟緊今個暑假，家姐一家三口會去意大利、英國三星期旅行+探朋友，家姐話去威尼斯一定要坐一次貢多拉喎，係佢嘅bucket list要完成嘅項目，我哋去時佢好疑惑點解難得去一次都唔搭，點講呢？因為搭一次貢多拉價錢真係好貴，我捨得花錢嘅地方唔係呢度吧？我冇話想坐得咁緊要啦~
途中發現漫畫店﹗﹗日本漫畫勁呀﹗
除咗亞洲地區受歡迎之外，原來可以揚威至歐洲，火影忍者有翻譯成意大利文版~大家仲認得咩漫畫添？
講起威尼斯，外甥女之前有講過佢中文有篇課文講威尼斯面具節，我本身都唔知道威尼斯同面具有關係，係佢講我知先有呢個小知識，所以今次見到周圍有面具店同埋面具紀念品就覺得「理應如此」了~
各式各樣嘅面具
如果係偵探小說入面有呢啲面具同斗篷，通常都冇好嘢~
哇，係真係可以書寫用嘅羽毛筆呀，型﹗
好精美嘅銀製飾物同燭台~Be our guest~
行書店見到呢個，我鍾意呀，係度假盲盒﹗﹗未打開都唔知去邊度玩~
呢條橋咁有特色，一定係景點﹗﹗快啲影﹗點解咁攰呀~
媽咪係咪太chur…XD
買啲凍嘢飲坐下休息下啦~
冇電…
其實好多地方都貼出告示話唔准坐，都係嘅，如果太多人坐係度又影響市容，但莫非要休息就一定要入鋪頭坐低飲嘢？
裝咗水可唔可以坐低休息呀？
好多人…(其實爸爸話中間嗰位男士好靚仔…)
雖然意大利嘅夏天係好熱，但只要有陰頂就即刻好好多，唔多地方有冷氣，所以去餐廳食嘢，坐戶外通下風都舒服~
去到遊客區嘅中心地帶，周圍好多紀念品店，唔知點解又冇話好想買嘢，係威尼斯期間，印象比較深刻嘅購物體驗係去咗一間好大嘅時裝店買咗幾件衫，呢個係之後嗰日嘅事，鋪頭好大好闊落，感覺似H&M，價格相宜，款式平易近人，小朋友都揀咗啲T恤短褲，因為佢哋喜歡得不得了，返到嚟成日都著，我哋成日講笑話著「意大利時裝」~
終於去到聖馬可廣場/大教堂啦，下一篇再睇相啦~
待續
前往其他郵輪旅遊blog
前往其他意大利旅遊blog
