我哋今次搭中國國際航空公司飛機，我記憶中有坐過，而家睇番blog，果然係2014年去北京嗰次坐過(請參閱：30-5-2014：三十登長城day 1．北京木棉花酒店)，印象已經冇乜，原來今次嘅經驗比上次好呢~我哋夜晚八點幾機先飛北京，一個鐘零大半之後再轉午夜機去米蘭，飛11個鐘之後，去到就係米蘭嘅清晨了~今次係前所未有大project，因為曉係絕對睡寶寶，而且未瞓夠嘅時候夾硬叫醒佢會好嬲，平時溫文可愛嘅佢會變得好惡鬧人，所以我都有心理準備要夾住兩隻嬲嬲喊喊小朋友去轉機~
今次預多咗時間提早去機場，Trip.com訂機票時，有一項optional嘅收費，係避免因為超賣而被取消機位嘅附加費，我當時覺得，如果要咁樣先確保上到機，我就唔駛買你嘅平機票啦，所以選擇冇俾嗰項費用~反正八點幾機，起碼九點幾先開飛機餐，我哋點都要食咗嘢先上機了，不如早啲去到check in，再慢慢歎個晚餐仲好啦~
check in好順利，好快搞掂手續，少少擔心嘅係座位安排，短嗰程係2+2，長嗰程係3+1，仲要個1離個3好遠，即是我要獨自照顧兩個小朋友11個鐘~雖然話去程嘅機係夜機，大家會好眼瞓，應該會瞓大多數時間，悶或者煩躁嘅時間應該佔少部份吧？話雖如此，我都嚴陣以待，download定大量電影、卡通、影片係ipad，包括Netflix、Disney+同Youtube樣樣都有啲，又帶咗UNO、啤牌、大富翁deal卡牌，仲有顏色筆、簿，又係$12店買咗迷你砌圖同Nanoblock，零食方便特別帶咗食得最慢嘅童星點心麵幼麵，務求可以occupy晒佢哋嘅時間~雖然長嗰程嘅飛機有機上娛樂，我估計卡通片多數都係普通話或中文字幕，曉就應該ok，詩就搞唔掂可能會孟憎~
既然將會離開香港兩個星期，我哋揀咗港式嘅翠華食晚餐~
焗豬扒飯、海南雞飯、常餐樣樣都唔錯，坐得又闊落舒服，good﹗
食完仲有時間，周圍逛逛，原本想買埋珍寶珠，點知間便利店得連玩具嘅珍寶珠，對於佢哋嚟講，價值大約$30嘅玩具一啲都唔吸引，咁無謂買咁貴嘅珍寶珠啦~
入到禁區後，又去咗遊戲室玩咗一陣，上次去沙巴時都有玩過呢度呀(請參閱：22-12-2023：沙巴熱辣辣聖誕遊day 1．寒冬變炎夏)~
開心
yeah
前往閘口路上嘅靚靚日落景
登機閘口原來根本就係上次去福建時嘅同一個閘口添，乜咁啱嘅(請參閱：29-3-2024：福建探親掃墓大食團day 1(part 1)．一次嚐遍福建重點美食、開展食食食之旅)？
冇咁經典嘅指定動作~
今次我哋帶咗四隻細嘅公仔一齊去旅行，我問佢哋想唔想帶公仔去，當時佢哋都好擔心會整唔見最心愛嘅公仔，有少少猶豫，結果我哋係出發前幾日，係屋企搞咗個「意大利之旅爭霸戰」俾12隻細嘅公仔參加，當中包括障礙賽、數學比賽、Rummikub大賽、Bingo等等幾個項目，一輪龍爭虎鬥之後—-
終於由叫做「三兔」嘅粉紅兔贏得冠軍，有得去旅行，因為結果唔係最愛嘅公仔贏咗，兩個小朋友都分別要俾個可愛獎佢哋嘅最愛，所以我哋帶埋曉揀嘅灰兔子「小噹噹」，同埋詩揀嘅柴犬「Good快」去，爸爸又話要帶隻公仔去影相，爸爸揀咗另一隻柴犬「福福」，所以就出現咗今次4人2兔2狗之旅了~
第一程飛機座位係2+2，佢哋未太攰就會好friend可以一齊坐，而且兩個都唔甘心讓媽咪俾對方，所以曉詩兩個自己坐，我可以同老公拍拖坐，輕鬆一下~
兩姐妹自己坐前面
我哋乘機拍下拖
今次為咗呢個勁旅行，我哋特別去Muji買咗本活頁簿，俾大家得閒時畫遊記，一方面消磨時間，另一方面可以留個紀念~坐長途機長途車、或者等候時就最啱，大家嘅第一頁遊記就係呢程飛機創作出嚟了~我遲啲得到佢哋同意之後，應該可以post埋俾大家睇~
開頭時我話今次國航印象比上次好，我睇番北京嗰篇blog話飛機餐太細，又麻麻地，其他乘客板起口面對空姐唔友善~但今次印象唔錯喎，飛機餐係疫情後幾個trip以嚟最好…諗番轉頭，可能係嗰幾個飛機餐太差，2022年12月去首爾嗰次我寫國泰嘅飛機餐太細、2023年7月飛高雄我繼續話國泰嘅飛機餐太細、2023年12月去沙巴搭廉航Air Asia根本冇飛機餐、2023年3月搭廈門航空去泉州嘅飛機餐同避靜冇分別只有清水同冇味麵包…經過詳細review之後，原來國航嘅飛機餐最好嘅部份就係我食飽咗~>v<哇哈哈哈~
我嘅豬肉飯
爸嘅雞肉飯
原來係機艙嘈吵嘅環境，「雞」同「豬」嘅普通話發音係好難分，如果要叫到正確想要嘅飯，咀型要誇張少少~
食完個翠華晚餐…再食飛機餐，只食剩個包﹗呢個包後來都冇浪費喎居然，睇之後嘅blog就會再出現了~
另外，國航對小朋友都幾友善，問兩個「寶貝」想飲咩食咩時都好溫柔，又有耐性聽佢哋慢慢講嘅唔咸唔淡普通話~講起呢樣，都算係兩個嘅壯舉，因為係第一次係陌生人面前講「橙汁」、「蘋果汁」、「可樂加冰」、「水」、「雞肉飯」、「西式」等單詞，好叻呀~
飛機遲咗起飛，竟然後來又追番進度，降落時間冇遲，弊就弊在開始降落時就唔准去廁所嘛，飛機降落後，居然花咗超耐時間先泊到去閘口俾我哋落機，兩個小朋友急尿急得不得了，問我哋幾時到，我好似不停呃佢哋咁話應該就快，但真係好耐都未停定，慘~結果一落到機就即刻衝去搵廁所大解放~
跟住我哋就去轉機啦，下一篇blog見，因為轉機就變day 2了﹗
待續
前往其他歐洲旅遊blog
前往其他郵輪旅遊blog