呢個trip原來我期待咗五個月先出發，搵番Trip.com嘅紀錄，我訂機票日期係2月16日~疫情後幾個trip見到兩個女搭飛機越來越進步，次次我都話帶佢哋去遠啲都得，所以一直心思思想衝出亞洲，對上一次去歐洲已經係2013年同day兩個人去西班牙啦(西班牙旅遊blog)，聖誕去完沙巴，連復活節嘅福建都未去，就諗緊暑假去邊度，發現去歐洲嘅機票都ok唔太貴喎，其實都有啲擔心去歐洲成日要搭火車、換酒店，我哋兩個大人帶住兩個細路+拎住咁多行李走嚟會吃不消，所以就諗起可以搭郵輪再上岸玩，起碼有一段可以輕輕鬆鬆唔駛搬酒店又唔駛顧慮移動嘅時間~點知一search郵輪就一發不可收拾，太太太太太想去了，如果唔係有郵輪，相信短期之內我唔夠薑帶兩隻嘢去希臘同克羅地亞，而家輕輕鬆鬆就可以蜻蜒點水式去下啦~促成呢件事嘅係，某一天我係度篤篤篤機票時發現有平均每人約$5400嘅來回米蘭機票，我得到老公同意之後就即刻去馬訂機票﹗﹗﹗
訂好機票當然就係book埋個郵輪啦~雖然都有略略睇過其他郵輪公司，但經過上次去過經驗太差嘅世界夢號(請參閱：7-6-2019：世界夢號家族海上假期day 1(part 2)．蝸牛登船、衝鋒自助餐、夜夜笙歌)，諗落都係參加番最有信心嘅Royal Carribean，十幾年前去越南、三亞嗰次依然回味無窮(請參閱：20-2-2010：海洋神話號day 1．上船囉~)，後來爹媽再參加多兩次Royal Carribean去阿拉斯加同加勒比海都係讚不絕口，今次落重本梗係唔好令自己失望啦~所以就book咗皇家加勒比郵輪嘅海洋探險者號，由意大利拉文納上船，去克羅地亞兩個port Dubrovnik同Split，仲有希臘兩個port雅典同Santorini嘅八日七夜地中海郵輪之旅喇﹗前前後後就去北意大利遊覽~因為飛米蘭，米蘭就一定係行程之內啦，北意大利冇理由唔包括威尼斯，加上我發現博洛尼亞除咗係米蘭前往拉文納嘅必經之地之外，仲有小朋友一定鍾意嘅雪糕博物館，所以就加插埋係中間，以下就係我哋嘅行程大綱啦：
day 1：香港飛北京
day 2：北京飛意大利米蘭Milan、遊米蘭
day 3：米蘭火車往博洛尼亞Bologna、遊博洛尼亞
day 4：博洛尼亞火車往拉文納Ravenna、登船海洋探險者號Explorer of the Seas
day 5：港口一之克羅地亞杜布羅夫尼克Dubrovnik
day 6：在船上
day 7：港口二之希臘雅典Athens
day 8：港口三之希臘聖托里尼Santorini
day 9：在船上
day 10：港口四之克羅地亞史普利特Split
day 11：意大利拉文納下船、火車往威尼斯
day 12：遊威尼斯
day 13：遊威尼斯、火車返回米蘭
day 14：米蘭飛北京
day 15：北京飛香港
正因為夜晚八點幾機飛北京，我就梗係返多日工先飛啦~爸爸就返半晝，曉第一日暑假，詩就可以上一堂暑期畫班，出發前依然人人節目豐富~
放工後返屋企執埋最後嘅行李，匆匆忙忙咁出門口，走咗架A33，結果又變成Uber去~
講解行程講咗咁耐，都係下一篇blog先講正式出發啦~
前往其他歐洲旅遊blog
前往其他郵輪旅遊blog