越南．18-8-2025~24-8-2025．胡志明市、頭頓

18-8-2025：胡宅九人越南之旅day 1．久違了的一起大旅行

遊輪之旅．20-6-2010~25-6-2010．香港．越南下龍灣．會安．海南島三亞

22-2-2010：海洋神話號day 3．越南下龍灣坐船仔篇

22-2-2010：海洋神話號day 3．下龍市內越南生活

23-2-2010：海洋神話號day 4．越南小鎮會安

四月去完上海，就開始計劃下暑假去邊，詩芭蕾舞周年匯演喺八月頭舉行，老師叫佢哋七月千祈唔好去旅行，曉學校中國舞有暑期訓練，schedule又未出，一直未能夠落實幾時去、去邊度、去幾耐～原來，中國舞每星期一堂，勤力曉唔想缺任何一堂，所以極限係去一星期啦～就咁話啦，中國舞落堂下晝出發，去一星期，我上晝仲可以返工喎，正！目的地方面，最近又冇乜邊度非去不可，咁就由機票時間、價錢引領我哋啦！自從有睇YouTube Channel滇西小哥，做咗阿盆姐fans之後，一直都想去一次雲南，不過時間太短，今次唔去住啦～幾個候選目的地，包括飛釜山、吉隆坡、胡志明市，最後揀咗去越南～

講起去越南，人人都問我係咪去富國島，唔係呀，今次係「遊覽類」旅行，下次「休息類」先考慮去啦～揀胡志明市，係因為曉返學有睇過呢個城市嘅相，我都覺得好靚，加上越南消費平，機票暑假旺季每人都係$1300左右，真係抵玩～媽咪話好耐冇九個人一齊去旅行，確實，上一次全部人一齊去嘅大project，已經係詩五個月大嗰次去韓國，原本疫情後第一擊，去韓國滑雪嗰次都約埋大家，點知爹出發前中咗COVID，爹媽臨時取消行程，得返我哋同家姐一家去，所以今次我早早就約好爹媽，後來家姐都確認嗰幾日OK，咁就落實全部人一齊去啦！

我做搞手，都係有少少壓力，希望大人細路個個都玩得開心，安排行程、住宿方面都好花心機去搵～我哋飛胡志明市，打算去多一個附近地點，揀咗近近地嘅頭頓，又可以享受海灘～

出發前最大壓力，莫過於我有少少遲先開始辦簽證，以前去越南辦簽證，要親身去領事館，或者搵agent代辦，而家可以自己網上填form、交費用，安坐家中等批就可以，一般網上資料話三個工作天就辦好，但電子簽證官方網站就話可能要14天，我負責幫埋爹媽申請，好不安，如果慢咗點算？submit咗申請之後嗰幾日，我不停refresh在refresh個簽證網，個人好不安，直至到簽證批核咗出嚟，我先至可以安心等候出發去旅行～

我哋搭黃昏機，上晝我仲可以返工，不過因為早上紅雨，一早就宣佈學校停課，結果曉都唔使跳中國舞，詩都唔使返跳繩班，三父女喺屋企執埋最後嘅行李，我放工返嚟食咗午餐，就可以慢慢出門口～

時間早，可以同公公婆婆一齊搭巴士去機場～

同大家會合，辦登機手續~

今次搭越南航空，空姐都著越南傳統服裝~近年大家去旅行流行著當地民族服裝旅拍，今次去胡志明市唔多見呢類package，河內就好似有~

過咗安檢，辦好離境手續，大人們話想去食tea，小朋友們就話想去候機室嘅兒童遊樂場玩~

姨媽都唔餓，佢就帶住三隻嘢去玩，其餘嘅人就去咗麥當勞食下午茶～

呢個遊樂場係度都好似有一段時間，但每次嚟都好似有少少唔同咁，保持新鮮感~

開心~

麥當勞買嘢食超多人，好在最近試過用麥當勞app嚟遙距落單，唔使排長龍方便好多～

下午茶小隊~

指定動作﹗爸爸到上機前仲處理緊公司嘢，辛苦了~

準備出發啦~

最近家姐佢哋玩番Pokemon Go，我又湊熱鬧一齊玩，我哋等上機前仲一齊打咗場團體戰~大家一齊篤篤篤、打打打~

細飛機係3-3座位排列，家姐一家三口自然坐一排，兩個女要黐住我，爸爸就同我爹媽坐啦～

兩姊妹

相隔一條走廊嘅爹媽&老公~

飛行只係兩個幾鐘，我係圖書館借咗本法國翻譯小說《真實遊戲》，帶咗嚟旅行睇，兩個女自己喺Disney+ download定電影喺iPad睇，時間好快就過啦～

係喎，仲有飛機餐時間﹗

呢個魚蛋飯唔算美味，不過總算可以食啦，飛機餐最好嘅部份係有酒飲^^”

話說自從買好咗越南機票之後，我就開始喺Duolingo度學埋越南文，都叫做完成咗好多個單元㗎，我之前一直都話，一定要鼓起勇氣，開口講過一次，花咗出去嘅時間先值得，喺飛機，空姐英文太好，完全冇必要+冇勇氣嘗試講，但機上嘅廣播，就隱約聽到一啲學過嘅單詞，好似係may bay（飛機）、cam on（謝謝）之類，已經足夠令我好興奮lu～

到啦到啦﹗都好多燈光喎~

難得可以咁近影飛機，不過為咗唔好塞住條路，極速影，手震咗都唔理啦~

我哋嘅飛機~

落機過關排隊都排咗相當時間，好在九個人一齊吱吱喳喳，要等都好輕鬆愉快，過關要兩個兩個，我同詩過咗關先，就即刻衝去換錢，機場個rate應該係冇咁好㗎啦，不過都唔理lu，費事第二日仲要搵地方換錢，要換幾多都冇乜概念，喺city應該都好多簽卡機會啩？反正有美金係手應該問題都唔大嘅～本身都知道越南盾銀碼大，原來要買嘢俾錢找續時，咁大嘅數字真係唔習慣，又million又thousand，又要數紙幣上面嘅0，搞唔掂！！

曉嚟緊十月會代表學校、代表香港去韓國比賽，專登買咗隻細喼俾佢到時用，今次實習一下自己管理件行李，佢好開心~

抵埗紀念照

一早喺Klook訂咗機場接送，出去好快就見到負責嘅人員，不過都等咗一陣先上到車，酒店距離機場其實唔算遠，不過第一日到係夜晚，人生路不熟，語言又唔通，又拎住咁多行李，有老有嫩，都係全部人一齊行動比較放心～

第一晚我哋住第三區嘅奧萊傳奇酒店 Khách sạn Âu Lạc Legend，貪佢離第二朝去嘅濱城市場近，同埋有四個床位嘅家庭房～

去到酒店時，酒店已經非常節能地熄咗lobby大部份嘅燈，我負責訂房，所以由我去check-in，大家坐低休息一陣～奇怪嘅係，職員堅持話我訂咗四間房，點會呢？明明我訂咗一間家庭房、一間雙人房、一間雙人房加床，搞咗一大輪，先知道，原來所謂家庭房，就係平時所講嘅相連房，所以係四間，我哋間家庭房，有兩個入口，兩個浴室，都好呀，去廁所、沖涼都可以輪得快啲～

大家分頭返房settle down，房間唔算大，不過裝飾得幾靚，唔知係咪因為叫Legend呢？房間掛嘅畫作有啲人物頭像，兩個女都話恐怖，驚半夜發惡夢，係咁叫爸爸要拆落嚟～

有位唔認識嘅legend~咁樣用色，睇落係有少少面青青，佢哋話恐怖都唔係冇理由嘅~

飛機餐比較細，大家不約而同決定去附近便利店食宵夜~

攰~

我哋四個早啲去到，買咗杯麵、水果、牛奶～因為係韓國品牌便利店，外面有啲座位俾人坐低食嘢～

我哋食緊時，爹媽家姐佢哋就嚟到啦～

杯麵就正常啦，個牛奶…

大家一飲，表情都好誇張，睜大眼睛，好似受咗驚嚇咁，兩個女係咁叫我快啲試，我一飲，我個表情都同佢哋一樣，原來係加咗甜味嘅鮮奶，味道同預期嘅有出入之餘，仲要真係幾甜，所以有少少嚇親～之後再買牛奶都要仔細睇清楚啲細字~

至於剝晒皮剝晒衣嘅柚子，就變成今個trip大家嘅favourite，去蕪存菁，口感細緻又甜美，真係好好味，最重要係，平得好緊要，所以食完一盒，又再買多盒～

食飽飽就返酒店沖涼休息啦，第二朝九點鐘集合去參加市場tour+烹飪班呀～

前往其他越南旅遊blog