之前一排覺得生活有啲悶，可能係考完試後未好好玩一轉吧？所以一直搵下玩嘅機會~去康文署camp幾時都on the list，細細個時就當然有跟學校、跟不同團體入camp啦，幾年前某次大姑奶邀請大家去day camp，先知原來以個人名義book都ok，同埋原來價錢非常平﹗﹗所以早兩年搞咗一次「Rita and Friends」大型宿營，叫好多各方好友，book咗40個位去曹公潭三日兩夜，嗰次大家都玩得好開心，我就有啲壓力，怕大家玩得未夠盡興，招呼不周～後來有另一次，自己一家四口，book咗西貢嘅麥理浩夫人度假村住一晚，除咗遠得不得了之外，真係無可挑剔，一家人自己住一間小屋，兩房一廳，非常闊落，行出門口就群山環抱，專登去台灣住清境農場都係想咁樣啫～上次去係冷天，唔係游水嘅季節，但都整體都玩得好開心，小小遺憾嘅係，嗰陣詩未夠高，繩網、射箭都未玩到，佢有啲失望～
今次突然興起話去camp，一吹雞，家姐一家三口就話ok，不過爹媽唔得閒，所以就簡簡單單，兩家人一齊去～
出發前我叫豆包幫我gen張poster介紹度假村設施，姨丈幫我加咗啲Pokemon落去，更歡樂～
呢張係上次30幾人去camp前我哋預備俾大家嘅執行李清單，摷返出嚟用，免得帶漏嘢～
麥理浩夫人度假村喺個山頭度，營舍分爲上路、中路、下路，上次我哋住中路，今次一間三人房，一間四人房，要喺埋附近，冇得揀中路，我揀咗下路，原來下路嘅四人房細間啲，雖然都係兩房一廳，但上次個廳好大，可以連續打側手翻三次（舉例而已），今次個廳就只夠放下行李～
本來下晝兩點半已經可以check-in營地，不過曉要留校活動，遲咗少少先出到門口，我哋call架的士，去荔枝角兜一兜爸爸，再過去西貢，係呀，即使八五折咗，都仲要接近$400，不過營地咁平，爭取多啲時間玩更加重要～
辦好入營手續，家姐佢哋差唔多就到，時間剛剛好，可以直接去玩繩網～
今次詩夠高玩啦，yeah～
努力中的詩～
塞車都好，咁先可以一次過影到三個人～
叻！
我先完成，曉緊隨其後，詩跟後面，爸爸喺詩後面support佢，姨媽接住完成～姨丈冇玩，傍住喺逸逸旁邊鼓勵有少少驚嘅佢～加油呀！
玩到好熱呀～
玩完繩網，晚飯前只剩返冇教練嘅活動，我哋打咗羽毛球～
除咗大家自由打之外，臨尾舉行咗大人vs小朋友嘅比賽，原本曉氣勢如虹，點知臨尾比爸爸嚇一嚇，即刻窒住咗，大人隊險勝～
經過壁球場，姨媽打咗一陣壁球，跟住join埋我哋喺另一邊玩芬蘭木棋～
又係大人隊vs小朋友隊，就係上次嚟呢度時玩過，覺得個game好有趣，專登淘咗一套返屋企，叫做出草地玩過一次，而家又放喺梳化底～
小朋友隊勝！
晚飯同上次印象差不多啦，普通家常菜，份量都夠，味道唔好期望太高就ok～
晚飯後打咗乒乓波，夠鐘就去唱卡拉OK，得我哋一夥人唱，歌嘅選擇係少啲，不過平時太少唱K，只要有得唱已經好開心～
熱唱中～
中段小朋友們覺得悶，同爸爸去咗玩足球機同打乒乓波（同一棟大樓）～
仲有打機～
我同家姐最投入唱，唱到差不多10點人哋要收工先走～
本來帶定咗杯麵、薯片嚟做宵夜，一邊玩board game一邊食，點知一來太飽，二來太攰，嘢又冇食game又冇玩，返到房沖涼後就倒頭大睡～
第二朝都早醒咗，瞓得唔算太好啦～
我哋間房行出嚟個view都幾靚㗎～
八點食早餐，都係營地簡簡單單嘅港式早餐，自己額外買埋個咖啡就完整啦！
其實呢兩日天氣都唔穩定，一時好一時落雨，幸好我哋都成功游到水～
游水又係包場，得我哋一夥人游，平時自己去游泳池，曉、詩通常都唔肯游背泳，怕撞到其他人，呢度就唔驚啦，我哋仲可以舉行游泳比賽添！曉不愧係校隊，自由式贏晒全部人，蛙式就同爸爸一樣，再train多陣、再大個啲，就快得過爸爸啦～
游完水又玩到我想試下嘅匹克球，不過營地冇正式嘅匹克球場，只係借波借拍俾你喺網球場度玩，我哋未玩過，都唔知匹克球場事實上細幾多，但係個拍同埋個波都比網球輕，打起嚟成功感大好多，難怪近年咁受歡迎，不過嘛，太陽太曬、天氣太熱，真係跑到好辛苦，流汗流到成個人濕晒～
剩低少少時間，再打多次乒乓波，就要返房執行李離營啦～
營地合照
一場嚟到西貢咁遠，我冇訂到營地午餐，一早就決定要出西貢搵好嘢食～
食埋個海邊靚靚lunch，今個兩日一夜宿營就圓滿結束啦～