上一篇blog講咗第一道菜越南春卷，接住落嚟就到第二道菜——香蕉花沙律啦～以前未食過香蕉花，估唔到可以做食材，香蕉花嘅花瓣一層一層，主廚One教我哋要浸泡切開嘅香蕉花，而家睇返個食譜，先知原來啲水入面加咗醋，為嘅係消除香蕉花嘅樹液，之後再加上其他切絲蔬菜、調味料，就完成啦～要令到沙律有越南風味，最重要都係dressing入面嘅魚露、青檸汁，同埋後尾撒上面嘅花生碎吧～
要令到沙律又好味又好睇，當然要跟住主廚嘅擺盤啦，用香蕉花嚟托底，中間放入沙律，面頭嘅花生碎除咗好味，令道菜睇落更加靚～
煮嘢食期間發生一段小插曲，我哋六大三小，家姐照顧住逸，我照顧住詩，曉比較大個，我覺得佢可以自己follow instruction，平時都有入廚房幫手煮嘢食，用刀我都唔擔心，但烹飪教室有幾個助手，其中有個姐姐，可能見曉冇大人傍住身邊，就貼身幫佢～姐姐拿捏唔到呢個小小少女嘅心，唔覺意幫得太多，曉又唔夠膽出聲話自己得，搞屈住屈住唔係好開心，喊咗出嚟，嚇親姐姐啦～主廚One果然見慣大場面，好淡定，叫啲助手們準備過啲未用嘅材料，俾佢自己再整過，太體貼了！
之後我哋入返廚房裏面，因為要整第三道菜——雞肉河粉～
個湯底用雞髀熬咗咁耐，變得非常濃郁鮮味~
配搭越南湯河粉嘅各種新鮮蔬菜
啲蔬菜有啲要生啲，有啲要淥一淥，每個人可以按自己嘅喜好去處理～
投入
完成﹗
同越南春卷一樣，呢個越南雞肉湯河粉，係我咁耐以嚟，食過最好味嘅越南湯河粉，真係因為自己煮？我覺得係個recipe囉，真材實料，鮮雞熬製高湯，無添加人造香料味精，所以咁鮮甜～
我事先通知烹飪教室媽咪唔食雞，佢將媽咪撥落素食者嗰邊，所以佢個湯河粉，湯底係各種蔬菜熬製，我哋個雞湯係鮮、濃，佢嗰個湯底就係清、甜～二代替雞肉嘅餸菜，係各種豆腐製品、菇類，都好好味呀，兩款都可以試晒，正！
等候時兩個黏住爸爸，sweet sweet~
小朋友食完自己嗰三條春卷已經飽咗大半，後來嘅香蕉花沙律、湯河粉都只能夠試下味～但接住落嚟，第二個胃要啟動啦～係廚師們預備咗甜品請我哋食！
兩個甜品之中，一個係芒果片配糖蓮子~
另一個係鮮制香蕉雪糕切餅～個香蕉雪糕有幾好味？好味道我哋返到香港，試過自己喺屋企整，教會開party帶出去同大家分享～
食埋都甜品，一個早上嘅烹飪課程就圓滿結束啦～同大家影返張大合照先！多謝你哋呀！
下晝約咗司機3:30pm喺酒店出發去頭頓，見仲有少少時間，我提議趁呢個時間去咖啡公寓～喺越南call車主要用Grab呢個app，用法同Uber差唔多，之前去沙巴時，我哋都有用嚟call車，今次我哋一行九人，多數都係call兩部Grab，一部standard四座位，一部大車六座位，咁就可以坐晒全部人喇～為咗好計數，通常都係我call一部、day call一部，之後落嚟咁多日都係咁樣運作～
咖啡公寓係一棟10層樓嘅舊公寓，而家活化成為各種文青商店，有好多間特色Cafe，同埋賣靚靚嘢嘅精品店～
咖啡公寓
其中一樣好特別嘅係，搭𨋢要買飛，唔知點解，貴啲嘅嘢都唔爭在一角幾毫，但偏偏好平嘅搭𨋢費，就會覺得，既然行路都行到，又有乜必要俾錢搭𨋢呢？哈！
有啲Cafe好多客人，好難搵位，我哋咁多個人，既然冇特別preference，就隨便去咗一間冇乜人坐嘅（冇人氣？）咖啡店坐低飲嘢～少有地用唔到電子收費，唯有出動cash，買咖啡呢一次，我深深感受到越南啲錢銀碼好大，我對於英文點樣講好多個零嘅數字唔太純熟，加上對啲紙幣硬幣唔熟悉，俾錢找錢時hang咗機，要個店員好似落指令比機械人咁，你比呢張呢張呢張我，我變咗個阿嬋⋯慘～
爽呀~
其他人叫咗咩我唔係好記得，我自己就飲咗凍嘅越南咖啡，即係煉奶咖啡，好味～去完越南一趟之後，我返到嚟香港，都多咗用煉奶嚟沖咖啡～其他飲品越南人口味都係偏甜，唔係太啱我～
戶外都好舒服~
難得的獨照
爸爸出咗去幫大家影，原來我哋嗰間叫Oops~
可愛詩~
我哋喺呢度坐坐、影下相、休息一陣，之後再行下咖啡公寓其他啲舖頭～好多手作嘢都幾靚～
睇睇個地圖，睇嚟我哋慢慢散步返酒店，時間就剛剛好～
午後散散步
路上見到胡志明雕塑，同佢影張相先～
everybody
殖民時代舊建築~
前往其他越南旅遊blog