當決定飛胡志明市，就已經決定，要一部份時間留喺市區，另外花一部份時間去海邊或者郊外地方，研究完一輪之後，都係決定去最近嘅頭頓～理論上，去頭頓最快嘅方法，應該係坐高速渡輪，船程個半鐘至兩個鐘左右，弊在我哋要先由胡志明市嘅酒店去碼頭一程，搭完渡輪，又要由碼頭轉車去頭頓嘅酒店，人多行李多，轉來轉去更費時失事～為咗節省時間，連人帶行李一次過搬，最妥當嘅方法，應該都係包車啦～人生路不熟，感覺經Klook包車會好啲，起碼有個中介平台，有咩事上嚟都可以介入幫手（只係一程車，唔suppose有咩事發生囉）～

約好司機3:30由傳奇酒店出車，車程照理上兩個半鐘就到，上晝玩到攰攰地，大家車上瞓一覺長嘅，醒咗坐多陣就到啦！

睡寶寶~

開頭確係跟我嘅劇本理想地進行，大家瞓到自然醒之際，發現我哋架車喺高速公路旁邊停低咗，咩事？好似係有警察截停要查牌之類，小事一件啦，應該好快搞掂就可以繼續前進～

點知司機落埋車之餘，仲要喺警察站位置坐低咗，莫非真係有咩問題？我哋正正當當咁樣book車，身家清白，係有問題都唔係我哋有問題，但係我哋真係控制唔到包車公司有問題～我哋都算有耐性，等到一個位，連我哋個個都覺得太耐，忍唔住要contact Klook嘅在線客服，佢又真係有幫我哋做嘢，向包車公司查詢，但覆返嚟都只係話例行安全檢查之類嘅門面答覆，我估，包車公司都唔會向Klook坦誠自己啲車/司機/牌照有咩問題啩？！

在路上卡住了﹗

我哋嘅處境，只能夠決定等，或者唔等，in the middle of nowhere，要重新call車，要容納九個人+一堆行李，一啲都唔容易，仲要大家分散晒就更安心，都係等住先啦～萬一司機要扣留，我哋死lur，叫警察負責任，送我哋去頭頓啦～警察有上過車，望下呢架「可疑車輛」上面載住啲咩人，發現係啲有老有嫩、唔識講越南話嘅外國人，佢哋客客氣氣咁笑笑口，唔attempt向我哋解釋任何事～突然有張form要我哋填，又唔係要求啲乜資料喎，只係填姓名、年齡，證件編號都唔使，總之就古古怪怪啦～

一直監察住事態發展，我哋通過車窗望住司機、幾個警察，行嚟行去，自己嘗試去配音、解畫，成件事都幾搞笑～等得太耐，講起大家都開始有啲急，要去廁所，我哋正喺度討論啲警察喺咁荒蕪嘅地方站崗，佢哋去邊度廁所？馬上就有位警察，用行動嚟解釋俾我哋聽，就係——大自然戶外廁所！！佢嘅行動已經被我哋一行人目擊，仲要被記錄喺呢篇blog，同埋曉嘅圖畫遊記入面～

醒晒~

應該耽誤咗超過個一個半鐘，我哋終於可以繼續上路，第一件事，叫司機搵個廁所俾我哋～我想show off下我喺Duolingo學咗嘅越南文，問司機nhà vệ sinh，點知佢聽唔明，結果都係用返世界共通語言——body language，扮一扮踎喺度去廁所嘅姿勢，佢1秒即明！佢帶我哋去個收費廁所，OK啦，起碼乾淨～

剩餘落嚟嘅行程，我download咗個party遊戲app，玩咗「誰是臥底？」、「大電視」等遊戲，玩下、笑下，時間好快過，大家愛上咗誰是臥底遊戲，我後來返到香港仲淘咗一套誰是臥底卡牌添～

好不容易抵達尊貴明珠酒店~

我哋唔suppose搞到咁夜先嚟到頭頓，晚上book咗枱去食海鮮嘛，我哋兵分兩路，我、家姐、爸就留喺酒店check-in，放好啲行李上房，其餘嘅人，就先去海鮮餐廳settle down～

即使有大半嘅人唔見咗，酒店對我哋都冇怠慢，捧咗訂房人數嘅welcome drinks嚟，我哋亦冇令佢哋失望，一口一杯咁掃光啲welcome drinks～

放好行李上房，我哋三個就睇住地圖跟上去啦~途中忽然爹話有蟲飛入眼﹗﹗好驚嚇﹗﹗佢好慌亂，即使係路上，我哋都要停低落嚟，用手機電筒照嚟望下，果然有隻蟲仔完美飛咗入下眼皮中間，okok，抹到出嚟啦，但整走咗都仲係好唔舒服，我同家姐拖住佢行咗一段路，後來去到餐廳再洗再清理，姨丈好似有抗敏藥黃色小丸子，幫助消腫，好在後尾都冇乜事~

點解揀呢間Quach’s Seafood Restaurant？因為係Tripadvisor入面頭頓最受歡迎嘅海鮮餐廳，睇落啲相都唔錯咁，啲人話海鮮好抵食~

食海鮮當然要啤一啤啦，曉詩就飲咗椰青~

大大海鮮拼盤

蝦﹗哈﹗哈﹗

未試過加花生嘅烤蠔~

我哋除咗叫海鮮之外，都按大家喜好同需要叫多幾款唔同嘅食物~

竟然encore春卷﹗

炒飯

薯條

我鍾意呢個青芒果沙律﹗加咗蝦米好惹味~

呢個係炒小南瓜，見咁特別就試下，食落似翠玉瓜~

最驚喜嘅食物居然係蒸雜菜？﹗我打到呢篇blog時，諗起要講啲乜，未睇番啲相都記起呢碟蒸雜菜，因為係蒸，所以可以lock住蔬菜本來嘅甜味，最重要係店家提供一人一小碟啲青色醬，呢款唔知叫乜嘅青色醬酸酸甜甜辣辣，好惹味，無論點海鮮定點蔬菜都一流，我哋後來去超市都買咗細細樽返香港，平時係屋企就咁焗咗啲三文魚，唔調味，就咁點嚟食都好好味~

食完海鮮係咪變得好生猛？

邊個最可愛？我投票俾公公﹗

至於海鮮，睇嚟都係冇中國人，應該係廣東人，煮得咁好味，去三聖食啲海鮮應該更正~不過都叫做試下當地煮法吧~

食飽飽慢慢行返酒店，訂呢間頭頓尊貴明珠酒店時，我貪佢靚海景、近海灘，最重要嘅係有四人家庭房﹗﹗我問家姐，床位重要啲定浴缸重要啲~事關爹媽間房係suite，有浴缸，有客廳，就係趁去物價較低嘅國家地區旅行時住啲靚啲嘅房，但係suite無論幾大都好，都係預兩個人住，冇得加床~結果家姐都係揀要床位，所以我哋係四人房，佢哋係三人房，景觀一樣好，不過冇浴缸，果然，瞓得鬆動比乜嘢都重要~

房間可以望到無盡沙灘

歎~

沖完涼咁舒服，玩多鋪牌先瞓啦~

第二朝我哋節目豐富，要休息啦~

前往其他越南旅遊blog

Comments

comments