早上我哋Klook報咗名參加市場導賞加烹飪班，約好大家lobby集合，之前各自按自己方便時間食早餐～酒店嘅自助早餐冇侍應生帶位，自己搵位坐，今日都坐得full，見到有兩個位，就比食得慢嘅曉同詩坐低食住先，我同day之後再搵位坐～
食物選擇都多，酒店接待西方遊客比較多，除咗常見嘅西式早餐之外，都有唔少越南特色食物，有啲都叫唔出個名，總之好多食物都係有米做㗎啦～朝早爹話媽咪有啲唔舒服，佢帶咗啲早餐返房俾佢食，都擔心唔知可唔可以按計劃出動，好在後尾再唞吓添，狀態恢復，都可以同大家一齊出去～
我本身睇定地圖，計好時間行路過去市場tour嘅集合地點——濱城市場～點知…
原來胡志明市嘅路況好瘋狂，超級多電單車，喺馬路上萬馬千軍咁樣奔騰，我哋見到嘆為觀止~而且過馬路仲好驚添，有啲地方有紅綠燈都仲好少少，冇嘅就仲弊～
呢個狀況，應該就係我同詩過咗馬路，但對面嘅朋友們未過到嘅樣子~
其實好多國家同香港唔同嘅係，即使行人綠燈，都依然要留意有冇車經過，因為佢哋都可以同時係綠燈～有個位只有車有燈睇，行人就冇指示，我哋企喺度等、望、等、傾、又等、又傾，唔知過咗幾多時間，曉先提醒我哋一眾大人：「我哋究竟幾時過啊？」果然係眾人皆醉佢獨醒，勁呀～
後尾行到有個超複雜路口，應該係重點旅遊景點獨立宮附近，直程有個著制服嘅官方人員為我哋開路，佢簡直係我哋嘅過馬路英雄，如果唔係佢，我哋真係到天黑都未過到～
過馬路花多咗時間，我哋人多，隊伍拉長咗，間中又有人想停低影相，路上花費時間比原先計劃嘅長，所以到後來，我哋喺急步咁行，仲不停催促大家行快啲，趕及9:00之前去到～
到咗濱城市場，我哋一眾遊客樣周圍望，又有個本地女仔好似等緊人咁，烹飪班？佢真係等緊烹飪班嘅客人，不過唔係我哋嗰間囉，睇嚟都有唔少公司辦類似嘅行程～聯絡我哋嘅烹飪班，原來廚師未到，我哋等多一陣就同佢哋會合啦～我哋一行九人，有廚師One同埋助手Vivian帶我哋分開兩組行市場～
好多年前同家姐去曼谷嗰次，都camp參加咗市場導賞tour+烹飪班，嗰次覺得好正，所以今次都搵咗類似嘅嘢同大家一齊去玩～邱氏四人跟住Vivian行，始終我哋廣東人同越南地域比較接近，用嘅食材都相對比較相似，蔬菜？難唔到我哋嘅！內臟？嚇唔到我哋嘅！
香料？一啲啲啦，有啲識有啲唔識～Vivian佢哋可能習慣帶西方遊客，英文當然好好啦，而且食材嘅英文名稱都好熟，講起一樣嘢，佢講個英文名，唔？咩嚟㗎？呢？ Google search一search，我哋不期然叫咗個中文出嚟，反而嗰樣材料嘅中文名，根本就同個越南名差不多！果然地域好接近～
海產
一睇就認得出嘅胃同埋腸~
頭先話內臟嚇唔到我哋丫嘛，尤其我做呢行，豬腦、豬心、豬腸、豬肝睇落去都唔會覺得太核突，不過有一樣，真係點都睇唔出係咩內臟，原來係「豬奶」（豬乳房），形態同人類嘅好唔同，因為人類係左右一對，但豬係成排，放喺街市度，就好似一餅長方形嘅脂肪咁，唔講真係唔知道係乜嘢～
豬紅後面，冰上面嗰一排脂肪，就係「豬奶」(豬乳房)~
參觀完市場，我哋要等埋爸媽家姐嗰組，同埋等車到，Vivian提議我哋可以買啲嘢飲，佢推薦蔗汁，又好味又大杯又抵飲~
果然冇推介錯，好似仲有少少檸檬味嘅感覺添～
佢哋call咗兩架Grab分頭返去烹飪班嘅廚房，落車行入去嘅小巷有少少殘舊陰暗，但係烹飪教室就時尚又光猛，好舒服，我哋喺locker放低嘢，可以坐低飲嘢休息一陣~
小廚師們已經預備好了~
原來今日仲有兩個冇參加市場tour嘅同學仔會一齊上堂～一對外國男女睇落20出頭，個女仔係純素食者，所以今日廚師教嘅餐單會有兩個version，一般版同埋純素版，我當初remark咗我阿媽唔食雞，烹飪班嗰邊some how當咗我媽咪都係素食參加者，結果我哋可以試多幾款口味添～
今日烹飪班嘅菜單，有越南春卷、香蕉花沙律、越南雞肉湯河粉～大枱嗰度主要俾我哋預備食材、切嘢、調味、擺盤、食用，唔似得泰國嗰次Blue Elephant人人都有個爐頭，好處係安全啲，特別係對小朋友嚟講啦，不過煮食要用火嘅部份，就集中喺裏面嘅廚房，就變成唔係人人都有機會落手去做～
河粉嘅鮮雞湯底需要長時間熬煮，所以做所有嘢之前，廚師One同我哋入去有爐頭嗰個廚房裏面煲落個湯先~
無論係雞肉湯定係素菜湯，都落好多香料，唔記得咁多啦，好奇嘅話要睇返個食譜，原來個雞肉湯用咗啲大雞髀去煲，煲到骨肉分離，會撈返起啲肉上嚟，手撕成肉絲，到時用返喺個河粉度～純素食者外國女生，對於廚房嘅用具有冇掂過啲肉好緊張，我都覺得有少少心理壓力，一般餐單同素食餐單同時喺同一個廚房度整，究竟work唔work呢？可能烹飪教室要modify下啲工具，例如一般餐單用紅色夾仔紅色勺子紅色筷子，素食餐單就用綠色夾仔綠色勺子綠色筷子之類嚟分清楚～
我又試，我又試~
出番去大廳，我哋坐番埋自己個位，正式開始第一道菜—越南春卷～烹飪越南春卷嘅方法應該唔難，要整得好味，又真係需要專業人士嘅指導～
我哋首先準備餡料，將蔬菜切絲、豬肉調味，預先製作蘸料~
你睇爸爸幾忙，又要整自己嗰份餐，又要忙住影相~哈~
製作餡料
One話佢做咗好多試驗，發現呢種春卷皮效果最好~
專心學下點樣包春卷~
我哋將餡料用春卷皮包好~
三條搞掂﹗原來越南唔同地區，包嘅春卷嘅形狀都有唔同，有啲扁啲，有啲圓啲~
之後輪住落油鑊炸，炸至金黃色～
叮﹗炸好了~
之後到重點啦，主廚One教我哋用生菜、各種香葉，裹住剛剛炸好嘅春卷嚟擺盤~
step by step，人人都可以做大廚~
試食﹗
毋須多講，表情可以解釋一切﹗太美味了~
原來唔係單單為咗靚㗎，清脆嘅蔬菜，配上熱辣嘅鮮炸春卷，味道、口感層次更加豐富，要學下烹飪節目嘅講法，啲蔬菜可以解膩，令人食好多都唔厭，細細個詩，居然一個人仔，自己食晒屬於佢嗰三條春卷，真係估唔到，我都覺得係我咁大個女以嚟，食過最好味嘅越南春卷，詩都食得晒三條，我又點會食唔晒呢？我食完三條冇問題，之後每一道菜都可以食光光，詩就有啲弊，食飽咗大半，之後其餘幾道只能夠試試味啦～
之後嘅幾道菜就下一篇再睇啦﹗
前往其他越南旅遊blog