day 3嘅行程上午去耶穌山，早上各個小組各自食早餐，按照約定集合時間再一齊出去～
一朝早，就望到好靚嘅海，頭頓呢個沙灘好神奇，無論幾點鐘，都一定見到有人喺個海入面玩緊水，早至凌晨五六點，夜至天黑之後，都一定有人～
曉居然咁有文化+識歎，一早坐窗邊睇書~
頭頓尊貴明珠酒店係比較local嘅酒店，相信係來自全國各地嘅越南本地遊客為主～
早餐嘅餐廳都幾大，不過都係唔夠大，啲枱放得好迫，要搵位都唔容易～食物冇話好驚喜，整體印象都OK，只係拎嘢食時人多得不得了，特別係飲品station，沖咖啡有少少爭先恐後，可能太多選擇吧？又有煉奶，又有冰，大家真係喺現場度沖調自己獨特嗰杯咖啡～
另外印象深刻嘅係，啲酸乳酪放喺啲碎冰上面，一邊有個牌寫住原味，另一邊個牌寫住甜味，但係每一杯乳酪嘅外表完全一模一樣，而一堆乳酪嘅中間亦見唔到界線，究竟由邊杯到邊杯開始係原味變甜呢？唯有拎最邊邊嗰杯，答案嘛，食落去嗰刻就會知啦～
水果有咩特別？就係可以加調味粉食，鹹鹹辣辣，阿盆妹個妹阿霞好鍾意嘅蘸水辣係咪就係咁嘅concept？
食完早餐仲未夠鐘出門口，我哋去gym睇睇，今次佢哋好開心，gym冇唔准細路入去~
認真操abs
仲有時間畫多一陣圖畫遊記先要出門口~
我哋酒店步行去耶穌山嘅山腳大約10幾20分鐘路程，今日天氣好熱，行咗冇耐已經成身濕晒～
以前返大陸都成日見到一家大細坐一架電單車，而家少咗好多lu，越南都仲有呢個景象~
路上發現美美的雞蛋花~
邊個最似？
抵達入口~
去到山腳，有secu守住，佢會檢查大家嘅衣着合唔合格，我哋九個人之中，三個小朋友被豁免審查自動合格，媽咪着比較長嘅及膝短褲短袖衫合格，三位男士同家姐短衫短褲唔合格，最離譜係我，背心短褲，嚴重唔合格！！我哋一個option係返酒店換衫，一係就幫襯山腳嗰間舖頭買衫～了解清楚規則，原來條褲只要蓋過膝頭就合格，男士們靜靜雞將條褲頭向下移，成功變成及膝褲，合格！家姐原來個袋入面有替換衫褲，換咗就合格！只要我個case係死症，買啦買啦，簡單直接～無論係邊一件T恤，點睇下次都着唔返，條褲就OK嘅，仲幾舒服添，望就望返到去洗唔會甩色啦～
變身成功﹗好啦，全部人ready，可以登山啦！
行咗冇幾多步，居然就出現咖啡店，仲要叫做Holy Beans咁神聖，飲埋先繼續行啦～咖啡係一件事，cafe嘅景觀更加係一流，吹住海風，舒服到唔想走～
Holy Beans咖啡店
望海，正﹗
呢個view
咁熱嘅時候飲冰凍咖啡又點會唔正呢~
上路﹗
耶穌山嘅登山路，全部都係修葺得好靚嘅樓梯級同埋斜路，行起嚟唔會好困難，即使體能唔好，行下休息下都問題唔大，沿路有好多聖經故事場景嘅雕塑、門徒同先知嘅雕塑、十誡等等，大多數只有越南文，我哋估估下邊個係啲乜都幾好玩～
呢個係邊個？
坐低研究中
300級﹗
差不多到了~
終於上到去耶穌隻腳趾啦！大家都好期待登上耶穌個膊頭～原來呢度設置衣着嘅第二度關卡！！今次要求更嚴格，要短袖遮晒膊頭，長褲腰到腳踝，小朋友豁免，咁即係有幾多個人合格？只有我一個大人，同埋三個小朋友可以上去～雖然仲有機會俾你買衫，大家決定由我哋四個做代表上去就算啦～
上去都好嚴格，唔可以帶袋，要除鞋，佢會借locker俾你放嘢～
耶穌像裏面條樓梯陡，好在三個小朋友而家大個咗好多，唔會驚～
神聖的地方，大家要安靜呀~
Hello！
耶穌個膊頭可以容納人嘅地方，比起一個家居露台仲要細，大家要排隊先可以出去，好在人唔算多～
望返落去，佢哋好細粒~
我哋落返去下面，稍稍休息，去去洗手間，跟住就落山啦～
望遠啲係海呀~
發現毛毛蟲﹗
好熱丫﹗未有得馬上食午餐，食支雪條降降溫+保充糖份~
我哋落山時係lunch hour，竟然個secu位冇人﹗﹗莫非呢個時間上山可以著乜都冇人管？﹗
下晝我哋仲有重頭戲節目，要返酒店沖個涼，變返乾乾淨淨先得呀～
前往其他越南旅遊blog