去完耶穌山返來，人人成身大汗，一定要沖晒涼，換過晒乾淨衫，防止再出汗，因為下晝我哋去做spa呀，我哋又點可以交一個濕濕黏黏答答臭臭嘅身體俾治療師呢？
所以我哋決定午餐叫room service，將出汗嘅可能性降至最低，去爹媽房食就最啱喇﹗佢哋係套房，有客廳，可以容納我哋全部人~我係今個trip嘅領隊，當然係我安排膳食啦，我打算打電話落order，唔知係咪酒店方面擔心英文溝通會出錯，佢哋直接派咗個英文好好嘅職員嚟爹媽間房外面幫我哋落order，咁就好放心喇~
美美的午後陽光
叫好食物，我同day落去下面便利店買飲品，記住，要慢慢行，保持心情輕鬆，唔好出汗呀~無糖茶、果汁、汽水，樣樣買啲啦，仲有零食﹗最正嘅係有得賣冰粒，令我哋嘅飲品更冰涼美味~
等嘢食嚟時最好做乜？當然就係玩玩遊戲啦~
食物好華麗地用餐車推上來，仲貼心地預備埋咁多人份嘅餐具~
到咗部分食物～
點解食物睇落得咁少嘅？會唔會唔夠呀？每次我咁諗，其實到最後都會夠食~
未夠鐘去spa，我哋又玩咗一陣今期最愛嘅「誰是臥底」，不過詩同逸太細個，識字同練歷都未夠多，好多時唔明個題目係乜，於是要同各自嘅爸媽組隊，一係入廁所，一係去窗，密密斟，研究下要點present~
時間差不多，我哋call車出發去spa，去親東南亞旅行，我都會研究下有冇得做spa，服務一流，價錢中比香港平好多，不過暫時都未有邊度，可以挑戰得到我同家姐好多年前去曼谷嗰次spa嘅經驗～今次去越南，我揀嘅，首先係搵下有冇都可以招呼小朋友嘅spa，我兩個女跟得我多，雖然唔係好貪靚，但最鍾意按摩、浸浴、敷mask呢啲舒服嘢～如果我自己去，唔預佢哋，一定冇咁開心，相信佢哋寧願去spa都唔去playroom～第二點，就係要間舖夠大，可以一次過容納到我哋九個客人～滿足到呢兩個條件，就係我預約咗嘅Quyen Cat Spa了～越南人都多用WhatsApp，喺網站或者Facebook IG專頁搵到個電話號碼，就可以直接send message booking，而且感覺佢哋英文都OK，唔會neglect啲英文message～Quyen Cat仲一早send埋個spa menu俾我哋揀做咩treatment添～
我問大家做長定短，好似我咁嘅spa愛好者，梗係越長越好啦，小朋友就體驗下好啦，太長可能會冇耐性，老公（本來唔算特別鍾意按摩呢啲）抵得諗陪三個小朋友做短嘅treatment，即係299000盾嗰款，我哋其他人就做599000盾嗰個plan～唔好睇小個299啊，都有個幾鐘㗎，到時佢哋搞掂，可以喺waiting area坐下、飲下嘢等，或者老公帶佢哋出去行下都得～
Quyen Cat
我哋去到大家坐低，我同店員溝通一下，講返邊個人做邊啲treatment，佢哋就好好蕩蕩咁樣搬啲盤出嚟，放水俾大家浸腳，點解詩冇嘅？佢都係小客人嚟㗎，係咪唔夠盤？定係人多得滯睇唔到佢冇？好在佢哋話陣間完咗補返俾佢～
浸完腳就上樓，男子組同女子組分別換衫，其實係除低自己嘅外衣，換上佢哋提供嘅圍布，電視影啲人沖完涼，咪用條毛巾包住胳肋底以下嘅部位嘅？你就想像條圍布就似嗰條毛巾，不過有橡筋箍實，問題嚟啦，嗰幾位小客人太細粒，撐唔起見橡筋圍布，放手就會直接掉落，大家笑到卡卡聲，啲治療師姐姐話唔怕，因為瞓喺度做，唔會睇到，大家就放心啦～好在三個女孩子以曉為首，大家拍住上壯下膽，唔會驚驚，事關離開更衣室，佢哋三個就同我哋三個女人分開唔同房做treatment，佢哋又真係OK喎，可能體驗新嘢太高興～
我哋三個女人入到房，其實都叫分分地開，有簾隔住每張床，見就見唔到，講嘢就聽到嘅～
按摩、facial呢啲都係正常嘅舒服啦，環境寧靜，佈置比較簡樸，但係忽然間有種好勁嘅感覺，就係到頭嗰部份～因為冇擘大眼睇，感覺治療師打開咗一啲裝置，跟住就有環形嘅花灑由四面八方淋落個頭度，仲好似可以調整角度，例如可以用嚟洗面添～後來唔知點樣關埋個罩，就可以係裡面有蒸氣~所謂「越南洗頭」都花好多功夫時間係個頭髮上面，按摩、梳、抓、搽、磨~係幾舒服，同埋印象最深刻嘅係，啲香味會持續好耐，後來幾日洗多幾次頭，啲香味都唔消失﹗﹗另外一樣對我嚟講好特別嘅係耳燭，雖然香港都曾經流行過一段時間，但我一次都未試過，今次試咗都有啲心驚肉跳，有啲嘢係自己耳邊燃燒，仲要好大聲噼噼啪啪，加一陣燒嘢嘅味道，好想呢個過程快啲結束，亦好慶幸曉逸詩個package冇耳燭，如果唔係佢哋一定好驚，我其實當時都驚瞓係我隔離嘅媽咪會驚，但佢食鹽多過我食米，佢又冇乜嘢喎，哈哈~
做完treatment出嚟，個個香噴噴精神爽利啦~走咯走咯，我哋傍晚仲有另一個重要活動呀~
前往其他越南旅遊blog