返Comfort Hotel拎返啲行李，我哋就過去JR博多站，今日下晝就搭火車去豪斯登堡啦，火車大約一點半開車，為免感覺搭車太耐，我安排買車站便當上車食，博多站係大站，便當有好多選擇，我同曉睇中一間，爸同詩就睇中另一間，大家都揀到心水便當，嘩，有草莓大福賣呀，上上上上次同爸爸去大阪時第一次食過就愛上了，2024年同兩個去熊本都介紹佢哋食，大家都食到眯眯眼，今次又有得賣，梗係要買嚟做甜品啦，爸爸話試多一款新嘅同我share，好呀，所以我哋買咗三個草莓大福，一個檸檬芝士大福，究竟邊款好味啲呢？
一切都比想像中順利，有自助換票機，塞張信用卡落去，三程長途火車嘅12張車飛一次過print晒出嚟，買便當、買大福、買飲品、搵月台都好smooth，我哋時間預得多咗添，喺月台坐下啦～其實夠時間食埋個便當，但兩個女好堅持要開車先食，飲住蔬菜汁先都得啩，好在得啫～^^;因為真係有啲餓了～
我哋架火車終於到啦~
座位可以轉方向，我哋可以四個對住坐，不過就唔似意大利嗰次咁中間有張枱，所以食嘢要捧住喺手，食完亦冇張枱可以用嚟玩啤牌～
我同曉嗰個叫夏日便當，佢嗰盒係我嗰盒嘅細版~便當入面有好多當季蔬菜，最驚喜係中間三個唔同口味嘅飯糰，栗子甘甜、鰻魚濃郁～醃蘿蔔食落特別清爽，應該係因為加咗柚子汁～
yummy~
爸爸個便當啲炸雞太多，分啲俾大家～曉詩兩個就互相交換餸菜～
食完便當就輪到甜品啦，草莓大福好好味就唔使講，一個大福裏面有兩粒士多啤梨，好闊綽～
我同day再分一個檸檬芝士大福，檸檬清新，芝士濃厚，估唔到呢個combination都好好味，一樣食到眯眯眼，而且好有新鮮感添，因為呢個檸檬芝士大福，令我想下次試埋其他口味～
曉與小噹噹
食完嘢，收拾好，各自玩一陣，爸曉詩就進入午睡mode～
唔知點解曉可以瞓到咁奇怪嘅姿勢～
呢個正常少少
落車有少少狼狽，因為詩又流鼻血了，我哋喺月台坐多陣，等佢啲血止得好啲先再行～
上返去車站，過條天橋，就已經係我哋入住三晚嘅豪斯登堡大倉酒店lu～大倉酒店都貴貴地，但園區入面嘅幾間酒店價錢更貴，加上大倉酒店有相連房，即係有足四個床位，啱晒我哋嘅需要～
豪斯登堡大倉酒店
我去check-in，爸爸陪住兩個小朋友，等阿詩再撳多個鼻一陣～
本身就諗住買豪斯登堡1.5日入場券，第一日黃昏入園，先玩水同埋睇夜景，第二日先full day玩其他部份，但詩啱啱流完鼻血，即刻玩水好似有啲風險，萬一喺個泳池度再流就大件事，都係day 2先游水啦～
返房稍稍休息一陣，個製冰機嚟我哋間房好近，叫曉出去裝啲冰，serve大家飲冰茶，正呀！
explore酒店房，發現可愛嘅熊熊拖鞋，詩就啱啱好，對曉嚟講size太細啦～
去酒店concierge買好入園門票，本來可以搭免費船，由酒店自家碼頭直達園區中心位置，不過船嘅班次比較疏，都係唔等啦，直接行路入去啦～
稍稍休息後再出動
入口已經有Miffy歡迎我哋，呢度有個位可以卡住個電話，俾你自助較10秒自拍用，我哋應該zoom少少，咁就perfect啦~
入園第一個景點係泰迪熊博物館，啲熊熊有啲殘舊，而且somehow詩覺得入面氣氛有啲詭異，佢覺得驚驚wor，確實，除咗哈哈鏡之外，確實係冇乜看頭～
睇bear bear
巨bear
反而係配角嘅哈哈鏡比較有趣~
出返嚟，人多番少少，見到有租家庭單車嘅地方，如果有時間我都想踩下～
美美的太陽花
話說我哋係因為想去長崎Bio Park先順道去埋豪斯登堡，其實豪斯登堡對我哋嚟講，仲有另外一個意義～之前喺Netflix睇過一套日本綜藝《全員逃走中》，幾十個藝人/YouTuber等，要夜晚黑麻麻三個鐘頭內捉迷藏，逃離獵人嘅追捕～啲獵人好有型，着住全套西裝帶墨鏡，而且一跑就速度非常快！我哋都話，唔知啲獵人喺邊度搵返嚟，係咪睇體育大學之類，定係要招募再通過考試？其中一個最搶眼嘅hunter留長直髮，造型有啲似漫畫《天生妙手》入面嘅北見醫師XD～因為睇咗《全員逃走中》，所以對於豪斯登堡入面嘅環境好熟悉，跟住就會話「佢哋喺呢度做咗啲乜」、「呢度咪升起氣球嗰度囉」之類⋯
除咗全員逃走中之外，我話俾兩個聽豪斯登堡有Miffy專區，都令佢哋好期待~屋企有一隻毛公仔係Miffy個friend Dan(灰色兔仔)，因為Donki買，所以佢個名叫小噹噹，小噹噹個性好強烈(記住係小噹噹，唔係Dan)，好活潑、鍾意認叻，喜愛玩啤牌(我哋平時唔夠人玩時佢會過嚟玩)，又係乜都得大樓做兼職(我哋嘅想像設施)，今次小噹噹都有嚟日本睇佢嘅偶像Miffy小姐呀~
入口比較靠近「冒險樂園」區，嘩，飛索排隊20分鐘咋！唔而家去玩好似好可惜，不過連曉都唔夠重玩，變成得我自己一個去，爸爸睇住兩個細嘅，佢哋自己去玩其他先～
其實前面只係排咗幾個人，排隊時我要先填網上健康問卷、免責聲明嗰啲，之後要過磅，確認夠35kg先可以玩（當然成年人都好難唔夠啦），放locker，連手機都要放低，怕你飛緊出去時個手機都飛埋出嚟跌落個湖度，真係好難幫你執～之後着安全帶，之前去camp玩過繩網、攀石，對於點樣着安全帶都唔陌生～之後到我緊張嘅事發生啦，工作人員拎住張寫住日文嘅卡紙，同前面嘅人講解，佢哋點點頭，工作人員指另外嘅方向，大家就出發行，原來飛索嘅起點好遠，要行上坡少少，甚至離開園區，去到Rotterdam Hotel嗰邊，所以我要緊緊跟住前面嘅日本人，唔好跟甩呀～
去到飛索嘅出發高塔，工作人員有多種語言嘅指示文字比你選擇，唔識日文都唔驚～
飛索好好玩，飛出去好爽快，歡樂度高、刺激度高、嘔吐度低，係臨尾去到終點時有啲chok～如果有人一齊玩就更好啦～
攞返啲隨身物品就去搵返三父女，原來佢哋去咗坐三層旋轉木馬，仲好貼心地坐咗2樓，因為留返同我一齊先至坐3樓:D
原來我玩緊飛索嘅同時，另一邊廂…
影咗相，仲有買咗凍檸水~
會合嘅一刻
上面影出嚟
旋轉木馬旁邊，有個室內兒童遊戲室咁嘅地方，對大人小朋友嚟講都係天堂，咁好玩，有得爬上爬落，梗係正啦！對大人嚟講，有冷氣又有得坐低，一樣係休息好地方～曉詩都係大個咗少少，如果細返兩歲真係唔使走，喺度留好耐都得～
繩網中嘅秘密基地
BB區都有興奮嘅玩法
好有動感
有活力到鏡頭捕捉唔住
摩天輪都喺附近，又唔使點排隊，去坐埋啦～
出發
不過摩天輪呢一段有少少唔開心，因為出發前幾個星期爸爸工作有啲唔太順利，一直都處理緊，所以朝早喺大濠公園都唔可以唔出席一星期一次嘅會議，我都明白佢要keep住睇message同指示下屬嘅工作，有時唔能夠全心全意同我哋一齊玩，坐摩天輪時我爆炸咗～辛苦啦，爸爸～可以順利出發，完成旅程都好好啦～
少少遺憾的摩天輪
之後開心番~
前往其他日本旅遊blog