雖然叫做飛福岡，頭尾七日，但實際上係福岡市嘅自由時間只有兩個half day，最尾嗰個半日留嚟行街shopping，初段呢個半日就睇下去邊啦~搵下福岡市景點、親子景點都不難見到大濠公園，因為近市中心，有湖有樹有新鮮空氣，可以歎咖咖、泛舟，而福岡市美術館亦係公園之內，確實係好天氣壞天氣兩全其美嘅好地點~下晝我一早買定去豪斯登堡嘅火車飛，諗住買火車便當上車食，所以我哋係大濠公園逗留到十一點幾就差不多了~
早晨當然有早餐開始啦，Comfort Hotel屬於經濟型酒店，好多人輪流去個小食堂食早餐，所以酒店本來就實施比較detail嘅分流，我哋去到時好好彩唔駛等位，到我哋食完走嘅時候就已經要排長龍了~食物如預期有和式有西式，去到日本我好難抵擋食白飯嘅和式早餐，可能就係因為咁好明顯地肥咗返香港~
Comfort Hotel啲餸菜比較有個性，詩都鍾意白飯，但唔鍾意黏黏嘅秋葵，同埋加咗香料去煮嘅薯仔，應該主要靠炒蛋同香腸送飯啦~
寄存好行李係酒店我地就搭地鐵去大濠公園了～
爸爸有工作要做，要同美國人開會，所以我哋先去玩兒童遊樂場，放低爸爸同啲袋係涼亭就趁太陽未到最曬時玩咗先~
香港冇嘅當然要試下啦~
古怪通窿隧道
香港有嘅都要玩，因為平時太多人要排長龍~
詩竟然話呢個搖搖海豚好刺激wor～
有個好大嘅日晷
哇，對一對隻錶，真係準時bor~古代人真勁﹗
爸爸開完會，太陽又越嚟越熱，我哋去下其他地方啦~
足底按摩
沿住湖邊散散步，公園種咗啲好靚嘅太陽花~有個日本老伯set咗個大相機連腳架影住朵太陽花，應該係會整成睇住佢慢慢轉向太陽嗰類video吧~
柳樹
香港好似未見過自動售賣機有雪糕雪條呢～
熱到咁上下，美術館又開門了，應該入去涼下冷氣先啱~
迎接我哋有草間彌生嘅大南瓜，呢位國寶級藝術家剛剛係早幾日以97歲高齡過世了，之前係M+有佢嘅專題展覽時我哋都有專登去睇過呢~
邊個最似？
今次去福岡市美術館啱啱撞正有姆明特展，我哋順便睇埋啦~
原來姆明嘅作者Tove Jansson女士嚟自芬蘭，佢係接受傳統藝術教育出身，佢早期嘅作品係正正式式嘅油畫，到成年後先開始插畫創作，憑姆明令全世界都認識佢了～原來Jansson有幫兒童醫院畫壁畫，展覽有展示出嚟俾我哋睇～而姆明亦有登上漫畫、舞台，我都唔知佢咁出名呢！
姆明漫畫手稿
姆明特展
喺紀念品店買咗幾張postcard，全部都順利喺旅程期間寄出～
睇完姆明特展，我哋都有睇埋常設展覽，不過當代藝術比較難明，有時都唔了解作品嘅藝術性、表達嘅意思之類～
呢個作品幾好睇，中間嗰條桿繞住圓心轉，一邊畫好似日式庭園嘅圈圈圖案，但另一邊又不停掃平，循環不息，係徒勞無功，定係睇落去好healing呢？
兒童美術館嗰部份可以做手工～
詩作品
曉作品
媽作品
睇完全部展覽，搵個靚位坐低寫下postcard啦～
驅使我哋必須要離開美術館嘅係，我哋要去坐天鵝船啦，呢個係去大濠公園嘅重頭戲～沿住湖畔行返過去租船嘅位置，弊啦弊啦，好多天鵝船已經出動，如果開舖嘅第一輪全部已經租出，咁我哋咪要等半個鐘？我都同兩個女打定底，作最壞嘅打算，如果有機會趕唔到火車就唔坐啦～
好好彩，仲有船～
好多天鵝船
原來踩起嚟都幾攰，點解四個人踩同兩個人踩一樣攰嘅呢？就係四個人踩時有人根本冇出力！！我提議輪流踩啦，有人嗌攰就換人，每次要最少踩10下，後來又好似玩「大風吹」咁，例如「戴眼鏡嘅人踩」（只有我一個？！）或者「今朝食過麵包嘅人踩」（曉？），增加趣味～
我哋隻天鵝
前面湖中心嗰個亭係景點嚟㗎，不過已經熱到冇人想跟我去lu，爸爸肯定有義氣嘅，但唔可以掉低兩個細嘅喺度嘛～
時間差唔多，還返隻船，買凍嘢飲，要回程返酒店拎行李去搭火車啦～係bor，入去公園時經過郵局，我哋寄埋寫好嗰兩張postcard啦～
去郵局寄postcard
姨媽同姑姐嗰兩張就係由福岡大濠郵便局寄出㗎啦～
再見啦，福岡Comfort Hotel！
前往其他日本旅遊blog