拎埋行李，搭free shuttle去國內線~
落到去機場嘅地鐵站時，已經日本時間晚上九點鐘左右，晏晏地添～
住一晚嘅Comfort Hotel就係正博多站旁邊，不過估唔到嘅係，原來博多站大得咁交關，而且地底嘅通道非常複雜，出口幾十個，又連住晒幾個商場，我哋只能夠按地圖，睇到酒店靠近西8出口附近，去到再算，行多一兩次就發現好方便啦~
雖然叫做自助check in，不過都係有個職員企係度幫手，我哋確實第一次用全自助嘅check in機，自己scan埋passport，用部機俾埋宿泊稅，然後部機會出埋房卡，仲要好貼心地有四張，如果係四個大人嚟，鍾意各自行動，咁就方便得多~
發放早餐券反而比較舊式，係寫住唔同時間嘅實體咭仔，自己攞，你一睇就知幾點係peak hours，究竟係要同人逼丫，定係避開人潮就自己決定啦~
我揀Comfort Hotel除咗近博多站，同埋間房可以容納全部人之外，其中一個最大嘅原因就係鬧市之中都有和式房間，可以齊齊瞓地，所有人想黐住媽媽都可以堆過來~
好啦，放低行李就去搵食啦，其實本來day 1嘅唯一行程，係想去中洲屋台食拉麵，啲檔口會開到午夜後，但大家實在已經筋疲力盡，唔想出去遠少少嘅地方~但時間已經比較晏，好多餐廳都差不多或已經打烊，抱住最壞嘅打算，搵唔到餐廳就買便利店嘢食返酒店食啦，正差不多要放棄之際，搵到博多站連接嘅商場某處嘅一間居酒屋仲未關門~
入面大多數係放工後嘅上班族，有啲獨自一人，有啲三幾個一齊小斟，正常都唔會有我哋呢啲家庭客係呢個時間出現~不過睇餐牌佢都係準備咗招呼外國人架啦，因為有英文餐牌~好驚訝嘅係啲嘢飲嘢食好平，小碟菜式普遍100+yen至300+yen一款，貴價嘅去到500+yen佔小數，飲品方面，有酒精嘅都係300+yen一杯，總之我哋叫好多，全部人食飽飽埋單都係5800yen，實在太驚喜了~味道方面，係好味嘅，不過因為係下酒菜，所以大多味道偏鹹，又冇白飯叫，要用凍豆腐嚟送^^”
第一道上嘅菜係福岡特產明太子，大家一向都鍾意明太子，有時係香港都會買嚟食~
我叫咗個檸檬燒酎梳打，好清爽，味道偏甜，其實似汽水多啲啦~後面個大叔飲到醉醉地，走嘅時候經過摸咗曉個頭一下，嚇咗佢一跳~相入面仲有「解鹹」嘅凍豆腐、椰菜沙律、醃黃瓜、薯仔沙律~唔記得影明太子沙丁魚，如果配飯真係一流，空口食就太鹹了~
全部大大件嘅關東煮
好好味嘅炸魚
食物應該冇影齊呢~
返酒店途中詩流鼻血，有少少狼狽，返到去到要按多陣先止得住，所以爸爸同家姐沖涼先，我哋兩個殿後啦~
沖完涼舒服晒，佢哋話玩幾鋪牌先瞓喎~
前往其他日本旅遊blog