我哋17號出發去日本，其實14-16兩個小朋友去咗教會camp，我同老公亦趁機去咗西貢staycation，享受了11年半以來久違了嘅二人世界～咁又點？咪就係16晚有超多衫要洗，unpack三日嘅行李，再重新pack七日嘅行李囉～今次坐香港快運，買機票時我索性買連行李額嘅票型，如果單買機票後再加行李額價錢仲貴，雖然有四個20kg行李額，但我決定帶一大兩小行李，真係非常好嘅決定呀！兩個女負責自己個喼，我同老公share大嗰隻，佢哋管理番自己嘅物件，我真係輕鬆好多，有公家嘅嘢又可以叫佢哋幫手拎～
出發嘅早上曉返學校練中國舞，我就返三個鐘工，趕返屋企再出發時間剛剛好～爸同詩就係屋企執埋最後嘅行李～
小朋友第一次自助check in、自助bag drop，覺得好新奇，我上次同家姐去台灣時試過一次了～好在係三件行李，因為詩未夠大個可以自己寄～
寄好行李快啲食午餐，有啲餓到暈暈地了～爸爸見到有好耐冇食過嘅Jolibee，就帶兩個女試下啦，佢哋一次都未食過～
同記憶一樣，雞皮好脆、雞肉好嫩，好味！意粉啲汁對我件白色衫有好大威脅，好在成功保得住冇滴到落去，yeah～
機場有可愛得不得了嘅行李動畫～
仲有加咗眼睛同嘴巴就會變得可愛嘅蛋撻～
但唔知點解，明明個菠蘿包都有眼睛嘴巴，但又唔太可愛，所以skip了～^^’’
另外，平時好少去T2 check in，曉以為機場裝修過呢～
旅行愉快的心情:D
去到閘口，當然要先影出發認證照啦～
今次帶咗兔仔小噹噹同羊羊BB（羊羊家姐黃色，係YY，佢藍色所以係BB，並非baby嗰種BB），佢哋都要影出發相～2隻動物朋友一齊去，估唔到變成5隻返來～XD
等上飛機時爸爸補補眠，我哋三個就開始畫畫今個旅行嘅圖畫遊記啦～
冇得揀位坐，航空公司安排咗3+1嘅座位俾我哋，而且仲同爸爸距離有好幾行遠～HK express當然冇機上娛樂啦，要自己帶去，用Netflix download定電影係ipad，帶定睇嘅書、Switch、圖畫遊記+文具，曉帶咗樂理功課（結果一丁點都冇做過），三個幾鐘好容易就過啦～
因為一個60幾歲嘅patient同我講，佢個女為咗鼓勵佢多步行，download咗Pikmin Bloom兩母女合作玩，媽媽負責步行，女就種花～我一search之下先知，原來皮克敏係好有歷史嘅game，Pikmin Bloom只係近年一個旁枝嘅project，係手機度玩嘅散步game，只歷代係任天堂主機度玩嘅皮克敏game，已經幾年前出到第四集，最令我驚喜嘅係，遊戲總監係薩爾達傳說嘅宮本茂，即係信心嘅保證啦﹗﹗而且同Zelda一樣都係策略類冒險遊戲~所以冇更多detail之下我買咗2023年出嘅舊遊戲<皮克敏4>，wow，非常精彩，細細粒嘅皮克敏有唔同屬性同強項，陪住我去歷險，同為救援隊嘅一份子~所以今個trip嘅其中一個機上娛樂就係用Switch玩皮克敏，而且最尾一日去任天堂店，除咗搵我哋熟悉嘅林克、Mario之外，亦順道去搵搵皮克敏~
兩個未有時間一齊坐低傾download咩電影，我就悄悄地幫佢哋出主意，除咗大路嘅卡通片之外，仲download咗一套美少女戰士嘅劇場版，哈，純屬我嘅個人喜好(但係download嚟俾佢哋睇)~
估唔到有幾套電影係ipad度，佢哋又揀咗睇Sailormoon先喎~詩知道我鍾意睇變身，明明一對耳機得兩個人可以聽，所以一直係佢哋兩姊妹睇，一到變身就拍拍我，叫埋我一齊睇，sweet~
出發前一日小朋友出camp，明明攰得不得了，我哋都去咗圖書館一趙，借旅程時睇嘅書，小朋友每人帶咗兩本左右，老公揀咗本東野圭吾，我好肯定嗰本我之前睇過了，所以我帶咗佢staycation時已經睇完嘅<<在咖啡冷掉之前>>去，點知佢唔記得咗執自己借嗰本書落去﹗﹗
曉影嘅晚霞
廉航冇飛機餐提供，我哋食飽飽上飛機，即使其他人訂咗餐，啲香味都吸引唔到我啦~
三個鐘鬆啲，好快就到達福岡了，日本比香港快一個鐘，突然之間變成七點幾lu～其實我好耐之前都有去過福岡，應該有超過20年，我都唔記得咗福岡有個好大嘅好處，就係機場離市區好近，兩個地鐵站就到博多車站，只係要由國際線搭free shuttle去國內線搭地鐵，花多咗少少時間，比起好多其他大城市嘅機場出市區方便好多～
下一篇再講我哋出到市區嘅嘢啦～
前往其他日本旅遊blog