26-12-2025：雲南西雙版納景邁山day 2(part 1)．基諾山巴朵雨林徒步(上)

Good morning day 2!

邊個型啲？

day 2我哋參加咗雨林徒步day tour，我哋去菠蘿酒店嘅自助早餐時，仲未係好多人~

雲南非常多美味嘅新鮮蔬果，酒店提供好多品種嘅水果，樣樣新鮮美味~

最令人驚喜嘅係菠蘿都有三款，不愧係菠蘿酒店，第一日早餐我試晒三款菠蘿，唔，有啲甜啲，有啲酸啲，有啲濃啲，有啲淡啲，金鑽菠蘿最啱我口味，之後幾日就淨係食金鑽菠蘿啦~先一晚係告莊見過嘅菠蘿糯米飯呢度都有得食呀﹗

充滿新鮮美味嘅蔬果拼成嘅沙律，為一天開始提供滿滿嘅營養~

坐開咗呢個位，我哋後來每日都坐同一個位~

等大家輪流去辦事時，可以歎一歎個露台~

返房執一執袋，我哋就步行去day tour嘅集合地點，告莊西雙景~

後面就係我哋住三晚嘅菠蘿酒店啦~

個tour係邊度搵嘅呢？話說我決定好大致行程之後，就要搵包車上景邁山三日兩夜，我係淘寶問咗幾間，最後揀咗一間感覺最pro嘅，上次去上海時包車我都係淘寶搵，先落訂，用車後再俾尾數，經驗唔錯，今次叫我要一次付全額，其實我都驚驚地，day有話試下搵攜程，我問完之後，感覺都只係中介搵當地司機接job，攜程嘅好處可能係有事時有人幫你做中間人咁解，如果淘寶呢間個客服俾到信心我，不如直接試下啦，聽佢嘅回應好local，好熟當地行情，應該ok啩？我book咗好貴嘅包車之後，再睇下嗰間店，發現有啲day tour都唔錯，就book埋西雙版納出發嘅雨林徒步tour，同埋出發去景邁山當天嘅採茶tour~出發之前曾經有不安嘅事，因為我發覺我俾晒錢嘅淘寶店面唔﹗見﹗咗﹗好在個客服又仲係度喎，同之前一樣回覆得好快，令我好安心，雖然未出發可以取消全退款，但我又未至於不安到要取消，我決定繼續信佢~終於到咗第一個trip嘅呢日，我哋知道佢唔係假架啦~哈~

不過嘛，都係有啲混亂，其實淘寶個客服都問我要唔要加錢變私人小團，司機直接酒店pick up我哋四個去到雨林，但私人團同10人團每人都差幾十蚊，但玩嘅嘢一樣，我又覺得冇必要丫，而且集合地點咁近酒店，10人團都冇問題~去到先知，原來pick up大家嘅司機只係負責pick up，其餘佢乜都唔知~我留咗爸爸個國內電話同微信俾淘寶間旅行社嘛，司機先一晚就微信開咗個group聯絡大家，話幾點去邊度集合嗰啲~

集合處附近

點知去到告莊西雙景，成條路一整排都係旅遊巴﹗﹗﹗司機拍咗一段睇唔出係邊度嘅片send俾大家，話佢嘅位置，然後就要自己搵^^”好在我哋預時間預得多，逐架逐架睇車牌號都搵得到~上咗車不停有人係車窗外兜搭做生意，有賣水鞋嘅，有賣小食嘅，中國人果然會爭取各種機會做生意~因為旅行社話可以去到租鞋，我哋就冇理啲小販了~

車慢慢進入山區

雖然係10人團，但旅遊巴上面有幾十人，大家都唔知到時邊個係團友~去到目的地落車，大家又一頭霧水，因為當地嘅原住民大媽阿姨姐姐導遊們唔知邊個客人要跟邊個~anyway，我哋被分配跟一個年輕嘅姐姐去玩~

落車詩勁急要去廁所，未去到大啲嘅公廁，當地一個阿姨指咗我哋去一個得一格嘅農村廁所~今個trip佢哋去廁所叻咗好多，原本去踎廁已經去得好叻，今次仲經歷過各種好簡陋、好污糟嘅廁所，全部都成功去到，帶住你哋去邊都得啦~

首先大家可以租鞋或者買鞋，既然帶對水鞋返去都冇用，當然係租啦~

我、爸、曉都係普通腳size，好容易就搵到啱嘅鞋，我仲可以著到粉紅色添~詩嘅size要著小朋友嘅連身衫，姐姐就帶住我同佢去遠少少嘅店試鞋，好可愛丫，好似出海捕魚look~我哋將自己嘅鞋留係大本營，大家著住對水鞋去歷險啦~

我哋嗰團有我哋四個、一對年輕母女(小朋友細過詩)、一對成年母女(阿女細我少少吧)，冇10個人咁多~

出發~

大家跟住導遊姐姐行入山，開頭只係一般嘅靚山路，但旅程已經開始了，第一個景點係—-酸螞蟻﹗

今個trip摸咗好多蟲，我手上嘅就係酸螞蟻啦~

聽講話呢啲螞蟻可以食用，味道如其名酸酸地，當地導遊會即刻捉幾隻俾有興趣嘅人試味，umum…我信你﹗我唔試啦~thanks~

跟住就係為叢林歷險「化妝」~呢座山嘅河流裡面有各種唔同顏色嘅石頭，而且特徵係質地好軟，用顏色石頭同其他石頭磨擦就會「出色」，可以用手將「顏料」抹係面上，似乎係當地人先有眼光知道邊塊石頭會有「出色」嘅色，我哋面上面嘅黑、啡、紫好sharp，之後我哋要排隊等玩時都有自己試下整天然顏料，但係點解成日都會出屎色嘅？﹗