我哋繼續向前進，下一個景點係企喺度玩嘅鞦韆，呢個得大人玩得咋，小朋友之後有其他機會玩森林鞦韆嘅，唔使擔心！
yoooooooooooohoooooooooooooooo~~~~~~~~~~
爸爸影我呢張影得太好，簡直可以用嚟整旅遊產品宣傳照~
中途影相位
呢個雨林徒步整得唔錯，用心設計好多「遊樂設施」得嚟又唔會太人工化，令你覺得真係處於大自然之中，應有嘅基本安全措施由恰到好處，隨便得嚟又有足夠嘅認真～
之後去爬樹！
爬樹始終比較花時間，逐個人輪住爬，快極每人都要幾分鐘吧，所以未輪到我哋就坐下玩下水先~
等到凍~
終於到我哋啦﹗
詩第一個出發
oops，個頭盔唔太fit…
細細個佢都俾你爬上去，只要你隻手抓得高，對腳有踩上去企穩，下面拉安全繩嗰位叔叔就會拉你上去，唔夠力都唔怕～大人就要自己出多啲力，佢唔會幫你咁多啦～
下面嘅人都睇得好投入
曉到上去最高點呀~
我覺得最難嘅部份係對水鞋，水鞋有啲鬆，唔夠貼腳，有時會卡住喺啲樹根之間，你要抽到隻腳出嚟，先可以邁步上去高一級～下面好多對眼望住，好多人排住隊等玩，自己算係年輕力壯，又唔可以隨便放棄咁樣衰，另一方面，又唔可以拖得太慢，阻住後面啲人～即使冇比賽，都要留意速度～
上到頂，大家會指導你，放開手，瞓低，呢個係指定嘅網紅打卡姿勢，我唔夠膽放晒兩隻手，就放一隻嚟影啦～
行多一段路就到森林午餐嘅地點啦，原來開闢咗一個食堂，擺咗好多枱凳，附近有幾個兒童鞦韆，仲有大家期待已久嘅廁所～呢度個廁所都係其中一個經典，極其簡陋，但又唔太令人厭惡，簡單有塊簾遮一遮，好似電話亭咁嘅獨立廁格，男女通用，廁盆係一個大膠盆鋪上膠袋，踎嘅位置係兩條木板架空係膠盆上面，變成經典踎廁，唔知係咪因為係山入面夠空氣流通呢？臭又唔算臭得太嚴重，核突又上唔到嘅榜，總之ok啦~
團餐方面，食物種類算多，款式就比較樸素，味道尚可，人人食得飽飽~
雲南少不了嘅菇菇清湯、米飯、烤雞、烤豬肉、烚蛋、烤魚、炒雜菜、蒸蕃薯，飯後果有柑~
食飽飽小朋友急不及待要去玩兒童鞦韆了，之前冇份玩嘛，邊有可能大人有得玩鞦韆，小朋友反而冇得玩嘅道理架~
導遊姐姐幫手坐好，扣好安全帶~
go~幾開心~
曉真係最正，大小通殺﹗大人項目有啲又夠高玩，小朋友項目又未至於太大粒玩唔到~
又有啲古怪樹木影相位~
有導遊姐姐幫手影相，可以影到好多一家四口嘅合照~
下晝掃埋未玩嘅項目~
有弱少少嘅射箭體驗，距離非常短，不過當小朋友弓都唔多拉得開已經足夠，我嘛，力量就夠，協調有問題，放弓同放箭嘅timing唔係好manage到，變成搞笑版~爸爸大學有玩過射箭一排，有姿勢有實際~
好高呀，yeah~
之後有另一款森林鞦韆又要排得比較耐，今次曉都夠高玩，得我哋兩母女玩，爸就陪住詩冇玩~話說去完呢個trip返嚟，睇新聞話第二度又有呢啲鞦韆，有人跌咗落去，我諗番轉頭都有啲驚驚~不過我哋去呢度見啲職員扣安全帶時都認真嘅，但啲安全網穩唔穩陣就無從得知了~我諗好緊要嘅係，一方面係設施保養維護啦，真係要定期檢查，另一方面係唔好overload個景區，如果遊人太多，大家等到鼓譟，就難免會急同鬆散，危險就係咁樣發生，呢個要靠上面嘅人去睇住先得~
飛~
我又飛﹗睇我表情就知當時嘅心情~
全部「景點」玩過晒之後，旅程就結束啦，我哋要步行返出去放行李嘅地方，呢一段對小朋友嚟講都有少少挑戰性，要攀一段幾陡嘅山，手腳並用，仲要導遊姐姐間中托一托佢哋~
後來嘅平路就冇問題啦，只係冇晒電啫~
返到去「基地」，居然有證書派喎~不過要自己寫名~哈~
回程上車都有少少搞笑，我哋成團幾十人，竟然唔見咗咁大架大巴同個司機﹗﹗佢哋有個微信group，司機同每個party嘅聯絡人都係入面，司機拍咗段片講佢去展示佢停車嘅位置，但段片係完全睇唔出佢係邊囉，附近嘅山、樹木同馬路，對於我哋外地人嚟講，根本睇唔出有咩分別~我哋估佢停係山嘅上少少位置，行上去望下，搵到架車，再由我哋嘅小組長—-爸爸，清晰少少用文字講解俾大家聽個位置，各路朋友終於上到車了~如果個司機等到夠鐘，放棄搵齊人咁就大件事了~
好啦，呢個淘寶報名、中途間網店close咗，令我心驚驚嘅基諾山巴朵雨林徒步day tour總算順利完成，我哋成功返去西雙版納市區啦~
前往其他中國旅遊blog