今日晏啲就離開頭頓啦，我哋點都去一次沙灘玩下水啦～先一日去耶穌山時，太陽明明好曬，仲要熱得不得了，但偏偏，我哋打算去沙灘呢一日，反而落雨～雨勢一時大，一時細，我哋都唔肯定落唔落到水，決定只要唔係滂沱大雨，我哋都落水玩一陣啦～
一早用ipad嚟影雨中沙灘嘅曉，旁邊係先一晚係街邊小店買嘅人字拖~
照舊大家各自食早餐，喺lobby集合～
我哋由酒店房望出去，整條海岸線都係後灘嘅範圍，所以，我哋過條馬路就去到沙灘啦～我哋租咗兩張沙灘椅，可以放低啲隨身物品～爸爸同姨丈唔落水喎，咁你哋幫手看住啲嘢，同埋幫我哋影相啦！
呢下「跳」睇嚟係我指揮bor，哈哈，曉最優美，逸最狂野，詩最自由，婆最奇特，爸同家姐都最冷靜~
店家楝晒啲商品係度，潮漲再多啲啲會唔會變咗水中商店架？
天陰陰，落住微雨，啲海水都有啲凍，個人keep住郁都唔怕嘅，不過，我哋成員之中，有兩個人特別容易變「紫嘴」，就係逸同埋詩，如果佢哋兩個開始變紫色，就大夥兒都上水啦～
冇藍天，海水都不太藍~有啲可惜呢~
返上酒店，我哋四個同爹媽再上去酒店泳池玩多一陣，海水太鹹，唔係好游到，曉都想展現自己游水俾公公婆婆我哋睇～
酒店個頂樓泳池好細，游兩步就到對面啦～
酒店泳池放咗塊直立板喺度，大家都忍唔住爬上去平衡下～
玩多一陣大家返房，沖涼，執行李，午飯後我哋就嚟開頭頓，返去胡志明市啦～
沖好涼去公公婆婆房集合，同佢哋分享一下我哋畫咗嘅圖畫遊記(圖畫遊記blog)~
午餐我哋想搵個舒服啲嘅地方食，見到Ibis Styles酒店，既然係國際品牌，應該有啲質素保證嘅～留喺酒店食午餐嘅客人唔多，餐廳空洞洞的幾乎就係serve我哋一檯～
食物方面，越式、西式選擇都有，賣相企企理理，味道未至於驚為天人，係食得舒舒服服嘅一餐～食物portion唔算大，可以叫多幾款嚟試～今次旅行顧住帶隊，影得好少相，平時做史官都唔叻，今次素材更加少之又少，打開Ibis Style Vung Tau個網站睇吓餐廳menu，都喚起唔到我嘅記憶添，等家姐都打咗blog先click過去睇啦～
越南國旗在中間
我哋出到嚟，有人要補一補啡，有人想飲下嘢，大家分頭搵嘢飲，總之司機嚟接我哋之前去到lobby集合啦～
想去靚cafe買嘢飲…
好多飲品睇落去都好甜，結果都冇幫襯～
約咗司機14:30嚟酒店接我哋，大家上車瞓一覺啦，恢復體力再繼續玩！
前往其他越南旅遊blog