下晝我哋搭包車返胡志明市，嚟頭頓嗰程非常唔順利，今次返去就正正常常，順順利利兩個鐘鬆啲就去到我哋將會入住三晚嘅Oakwood Residence Saigon～
辦理入住手續
大堂坐坐等入住
Oakwood Residence Saigon係公寓式酒店，我哋一家四口住兩房兩廁嘅單位，爹媽同家姐佢哋三個就住三房兩廁嘅單位～
比起酒店，公寓式酒店大啲闊落啲，活動空間多啲，仲有我最鍾意嘅洗衣乾衣機，同時又同酒店一樣有游泳池、gym、自助早餐～呢間公寓式酒店係離市區遠少少，位於第七區，但反正喺越南移動都係靠call Grab為主，遠少少，時間、車費都差別不大～
有得洗衫最開心
爸：有得飲咖啡最開心
大家稍稍休息，就逛逛酒店自己嘅設施，同埋去隔離嘅商場食晚飯啦～
游泳池嗰層就好似住宅嘅會所咁，有大家坐下休息嘅大廳，有啲兒童遊樂設施，游泳池、gym都係同一層，我哋最尾嗰日就有落嚟游水喇～
游泳池
小朋友玩嘅設施就bb啲啦～
酒店旁邊有個SC VivoCity大型商場，類似居民去嘅local商場，入面有大家熟悉嘅國際平民品牌～
經過麥當勞，發現有越南限定嘅menu呢，家姐後來好似有去幫襯，可以去佢個blog度睇下～
我最想搵超級市場，去任何地方旅行，都要逛過超級市場先算圓滿，同埋超級市場絕對係買手信嘅好地方～
SC VivoCity個超級市場都幾大，嗰度強制要放locker，所以可以兩手fing fing入去行，不過燈光比較暗，氣氛比較陰沉，唔係太提起我嘅購物慾，睇落啲嘢硬係唔係好啱咁，只揀到少少，起碼買咗啲水果夜晚食啦～行行下大家開始肚餓，我兩個女仲有少少hangry，一定要出去搵嘢食啦～
又餓又攰
我哋去咗間日式西餐廳，好似係新開張，仲係試業階段～我哋叫啲蛋包飯、咖喱飯、忌廉湯、沙律之類share嚟食，都唔錯～
湯
蛋包飯
肉醬意粉
yummy～
食完仲可以抽獎，我哋由最好抽獎運嘅家姐負責轉輪盤，umum⋯係現金券，我哋冇機會享用啦，唔通剩低兩日仲嚟食多次咩？
夜貓子家姐一家話要再行下街㖭添，我家嘅睡寶寶寧願早啲返去浸下浴，窩喺房度休息，早啲瞓～
聽日見啦！
前往其他越南旅遊blog