22-8-2025：胡宅九人越南之旅day 5(part 1)．至抵玩Dam Sen Water Park

Oakwood Residence Saigon嘅早餐都唔錯~

餐廳好寬敞，光猛明亮空間夠大，坐得好舒服～食物唔算好華麗，但選擇都夠多，仲有廚師即席煎蛋同淥湯粉～

我哋照舊分兩架Grab去今日嘅重點項目——水上樂園！我搵嘅Dam Sen Water Park距離酒店大約半個鐘頭多少少車程，遠唔係好遠，只係12km，因為全部都係local路，零高速，沿途就係當地人嘅生活，早餐店、水果攤檔等～為咗精力充沛咁玩，小朋友們瞓得著都係車上小睡一會，詩今日嘅圖畫遊記就記咗呢件事——家姐瞓咗四次晏覺！去水上樂園，返酒店，出市區景點，返酒店，每一程車都瞓！果然係我家嘅睡寶寶～

點解要去Dam Sen Water Park？其實呢度唔係旅客之間嘅知名景點，亦冇特別出名好玩，就係特別平！！！去東南亞旅遊，都會諗玩水，我嗰兩個更加係玩極都唔厭，無論係屋企樓下泳池，定係附近沙灘，去極都唔嫌多～我search胡志明市有咩水上樂園，搵到呢個Dam Sen Water Park，入場門票平到你唔信，大人都只係港幣$60左右，小朋友就更優惠～相比起剛剛去完嘅澳門新濠影滙水上樂園，每位要$300+，真係差好遠～價錢咁平，期望都相對調低，去到發現設施都唔錯喎，唯一一個唔好嘅，就係身高嗰條線畫得比較高，1.4米先路路暢通，今次去旅行時，最大個嘅小朋友曉都係差<1cm先夠1.4米，水上樂園都係唔俾佢玩啲刺激嘢～所以小朋友有得玩嘅設施就少啲囉，但係我哋有咁多人，樂趣又唔會少咗嘅～

yeah~抵達water park﹗

學校竟然夠膽帶學生去water park玩~

Dam Sen Water Park設施地圖

落車要figure out點樣買飛放locker，Dam Sen Water Park都好公道，既然1.4米高先俾玩所有嘢，亦變相1.4米以下嘅小朋友收費極平﹗新濠影匯條線cut係1.2米，咪身高夠嘅大小同價囉~原來行李寄存要另外買飛，買好佢俾個膠袋同索帶你，將要寄存嘅物品放入去再交俾櫃枱，職員幫你保管~更衣室比較簡陋，要有嘅嘢基本上都有嘅，更衣間、洗手間、淋浴間，設計就basic啲咁啦~

換好衫準備放locker

入到去玩就完全唔覺得有問題了，兒童區、漂流河、各種滑水梯、造浪池、普通游泳池…地方好大，設施好多，人好多，但都唔覺得太多人~周圍好多枱椅，俾人休息嘅地方，好多家庭帶埋食物嚟野餐，似係一個朋友gathering、聚天倫嘅地方，多過尋求刺激體驗嘅地方~

兒童區

我哋玩得最多係漂流河，速度好快，唔花氣力已經可以前進，加埋游水前進會以為自己游得好快，非常刺激好玩~後來有一次我帶住三隻嘢全力衝刺，跑足一個圈，然後係後面追番大伙兒，難怪走嘅時後人人都攰到散晒~

漂流河

sweet sweet

小朋友都玩得嘅水泡滑水梯~

有爹媽同兩個爸陪住啲細路，我同家姐都可以去玩啲刺激嘢，有一個未玩過嘅係手握索道手柄滑出去，然後直接跌落水，準備滑出去前都冇話唔緊張~

我同家姐去挑戰刺激嘢時，小朋友們同公婆浸按摩池~

要記錄玩過嘅嘢：

Green Dragon

左邊就係Green Dragon嘅出口喇~

下次應該曉詩都敢玩呢啲了~

今次有啲失策嘅係唔記得咗戴con﹗﹗我戴住眼鏡行出行入，最弊係玩滑水梯時要放係樓梯最高處，sir完要上番去拎~有啲刺激啲嘅唔係全部人去sir，佢哋就幫我保管住個眼鏡囉，但我排隊時同玩時就要矇查查~另外就係我個防水手機套有啲問題，變成入水手機套﹗﹗緊急係water park度買一個新嘅，唔知點解不約而同地有唔同人唔記得帶毛巾，又要係嗰度買~

我哋係water park嘅餐廳食嘢，又好好彩搵到張大枱，我同家姐出去搵食~職員唔識英文，餐牌有相，家影就影低我哋想order嘅直接show俾個職員睇~都係飯嗰啲抵食啲，份量足，價錢仲要比起一份薯條唔貴得幾多，後來再買啲串串加碼，咁就食飽啦~可以繼續去漂~