我哋住豪斯登堡大倉酒店三晚，所以亦會食酒店早餐三次，第一日去食早餐時先喺個房咭套度拎早餐券出嚟用，咦？點解唔係12張嘅？數下數下得9張，奇怪喇，接待我哋嗰個職員叔叔示意唔緊要，用簡短嘅英文單字+手勢動作，話每日用3張就得，唔知點解我哋意會咗，呀，兩個小朋友收半價，所以三張成人早餐券就得，佢拎住埋單用嗰啲細細嘅黑色皮文件夾帶我哋入座，黑色皮文件夾，裏面有張白色紙，上面寫住啲記號，anyway，食嘢先啦～
酒店早餐都幾多嘢食，和式、西式，選擇多，味道都好～其中一樣印象最深刻嘅，係連奄列都有三款揀，西式、和式、長崎式，咩叫長崎式？除咗淋一啲啡色嘅醬之外，仲有啲綠色、粉紅色切到細細粒嘅魚蛋喺上面，後來我哋先知道，長崎什錦麵有呢啲魚蛋，而超級市場都有得賣呢啲魚蛋，睇嚟係長崎中式食物嘅標誌～呢幾日我成日都食白飯，因為有好多襯白飯嚟食嘅小菜，好好送飯，其中包括名太子、山藥泥等～
今日我哋想試下搭船入園，所以計準時間去碼頭排隊，一班船得50個位咋，人太多就上唔到船㗎啦～
好在都ok，船沿着人工運河前往園區中心，爸爸都講過好多次，啲歐洲式建築物，明明都起得好靚、好真，但係唔知點解都係假假地，冇辦法啦，真係假㗎嘛～不過假得嚟，環境都係舒服嘅～
原來落船嘅位置係高塔城，而嬉水區嘅更衣室就正正喺高塔城，大型更衣室由一個劇場改裝，入口同游泳相關嘅商店，有泳衣、毛巾、拖鞋、防曬等商品售賣，左右兩邊就係男女更衣室，裏面有好幾排免費locker，雖然冇沖身設備，但都好唔錯啦～我哋換好泳衣就發現有啲問題，其實朝早執嘢出去時都有考慮過要唔要帶拖鞋，當時覺得，游水游得兩個鐘左右，拖鞋要孭住成日，好似搞到自己好辛苦咁～原來，拖鞋係必須！必須呀！！！因為更衣室離泳池又好一段路，天氣太熱，太陽太曬，只要離開更衣室，我哋就變成熱鍋上的螞蟻跳下跳下，搞唔掂～開頭諗住一鼓作氣衝過去游泳池就算，但來往幾個池之間都係好痛苦，返酒店攞拖鞋太浪費時間，買吧，記得間商店啲嘢唔貴，好過繼續痛苦～我哋派咗一個人痛苦地彈彈跳返去商店買拖鞋，多謝為我哋犧牲嘅爸爸～無啦啦，每人又多咗一對拖鞋，明明曉、詩今年先買咗新人字拖，我同爸爸舊年去越南旅行時，又係買咗一對人字拖拖去沙灘用，下次帶咩出去真係要諗清楚～
豪斯登堡夏日玩水區其實唔算好大，一個大池，圍繞着大池又漂流河，另外有一組滑水梯，同埋類似沙灘風格嘅淺水區，就係咁多～我兩個女時時都咁鍾意玩水，屋企樓下個泳池咁細都玩得好高興，所以呢度設施唔係好勁，都唔影響佢哋嘅興致～
有得玩水最開心~
圓形大池
拖鞋都有發揮功用嘅，反正我哋幾個池輪住去～去個大泳池排下韻律泳，去漂流河飄一兩個圈，去sir一兩次滑水梯，再repeat x N次～
個滑水梯都幾長，不過唔算好直，所以歡樂度高刺激度低，為咗令到sir落去加速，園方準備咗啲「腰封」俾大家着住黎sir，形狀有啲似尿片，包住條腰，魔術貼喺肚肚，開頭唔知搞乜，人哋做乜我哋就做乜，後來realize，應該係為咗速度而設～有大中小size嘅腰封，果然揀啱size效果先係最好～
爸爸手持佢自己嘅「尿片」~
另一樣得意嘅係，救生員每隔一段時間，會趕晒所有人上水，我哋又係雙眼幾個問號之際，佢哋識得轉channel，話「break time」～我諗咁樣做一方面避免大家曬燶，間中上岸休息休息、補水，另外就係要幫襯吓佢哋嘅小食亭吧～
break time ing
我哋玩到接近中午，都要唞唞啦，好熱、好曬，又剛剛遇着break time，有得賣好耐冇食過嘅刨冰，曉、詩根本就冇印象佢哋食過刨冰（其實有食過㗎），就買咗一杯嚟share～
都好多人排隊先買到架~
不過我哋稱佢為「化學刨冰」，唔似台灣嗰啲落紅豆、仙草、新鮮芒果、雪糕，呢度只有唔同顏色嘅糖漿，藍色同埋螢光粉紅我真係接受唔到，結果揀咗紅色同埋橙色，都係好artificial㗎啦，不過叫做心理上好啲啦～我仲揀咗加埋煉奶添～其實食落冇問題嘅，好清爽，好解渴！
跟住去換衫，食午餐～曬完一大輪，又玩水玩到好攰，冇晒精力，決定去附近最近嘅餐廳度食嘢～
我哋去食壽司，今個trip都未食過～
叫咗三個set，再加小食嚟share～樂園食嘢價錢梗係貴啦，但係佢哋都幾體貼啲學生，好多餐廳都有「修學旅行套餐」，價格親民好多～
扮小貓食魚
壽司、烏冬各樣都係好味嘅，但係後來再喺外面食過另一間壽司店之後，呢間嘅記憶幾乎被抹去，因為嗰餐實在太精彩啦，之後再講～
壽司店
食完午餐我哋將大部份嘅隨身物品放喺碼頭附近嘅收費locker，輕裝上陣～睇睇樂園app，決定先去玩深海任務，曉開始大個，對各樣刺激嘢躍躍欲試，詩仲係小BB，樣樣都好驚，但係又唔想錯過，所以驚住嚟玩～深海任務係講，我哋坐住潛艇，去人類未踏足過嘅深海，營救我哋失聯嘅隊友～係環境黑啲、突然有鳴笛聲、大聲嘭嘭嘭咁啫，都冇核突怪獸丫～豪斯登堡列出嘅排隊時間有少少古惑，排喺正式嘅一條隊確實係佢列出嘅30分鐘，所謂「入到去」，仲有一個一個房間，有啲就睇下片，有啲就有演藝人員着住故事相關嘅服裝，投入地演出角色，帶領遊客進入氣氛，有啲部份又睇安全示範，直至你正式坐上個ride，又隔咗20分鐘以上，究竟係等咗30分鐘定50分鐘呢？好難答～
其實仲有另外一個新開嘅刺激嘢，係新世紀福音戰士主題嘅ride，我同曉都興致勃勃，但詩要回一回氣，佢仲未決定到要唔要鼓起勇氣一齊玩，唔緊要啦，我哋去住啲溫和嘅先啦，之後再返轉頭玩啦～
咁我哋做少少溫和嘅先啦~啱啱有show睇，原來劇場就正正喺先一日個遊戲室旁邊~搵位坐低再慢慢睇介紹，原來係寶塚風格嘅歌舞表演，咩叫做寶塚風格？即係全部演出者都係女性，佢哋會分別演繹男角同女角，以誇張、華麗嘅化妝同服飾打扮載歌載舞~我有對於「寶塚」嘅印象，<<叮噹>>入面，有次可以用道具扮演啲咩嘅時候，靜兒有話要扮演寶塚嘅演員~另外，<<偵探學園Q>>入面，美南惠第一次見到天草流時，話佢嘅外貌好似寶塚男演員咁靚~即是話，係唔同年代嘅日本人心目中，寶塚歌劇團都有一定地位，而且打blog呢一刻wiki下，感覺AKB系嘅女團結構，某程度上都好受1914年成立嘅寶塚所影響~你話好唔好睇呢？豪斯登堡嘅唔係正式嘅寶塚，不過我都唔太明白，當呢個世界仲有男人時，點解要男扮女裝演出，唔係歌藝唔好，始終女性嘅聲線都係比較薄同埋高，都唔能夠代替男聲嘅魅力吧？而且長得高挑嘅女性只可以扮王子風格，大隻風格都係唔太可能吧~
演出時冇影相，出到嚟影咗個劇場門口，做個記錄啦~
之後去咗巧克力伯爵館，嗰度最出名嘅係打開水喉就斟到嘅朱古力飲品，我哋嗰陣仲好飽，所以冇幫襯啦~
朱古力伯爵館
曉朱古力
brubrubru~~~
之後去咗一堆乜乜幻想城…
萬花幻想城以花、香做主題~
揀咗一種花，掃一掃個QR code，坐係個「花灑」下面，就可以進行「花香浴」了~睇我個表情就知道我有幾努力去聞，哈哈~
呢度會幫你配對你嘅個人專屬花朵，同埋話你知佢嘅花語~
至於宇宙幻想城嘛，入去一個室坐定定，有段短片介紹各種星雲嗰啲，好似去咗太空館，presentation比較老式，確實唔太吸引，係涼冷氣休息嘅好地方~
大家有一樣心願未了，就係坐旋轉木馬嘅3/F，趁人唔係好多，坐咗先啦~
我哋唔係fans，唔駛特別飲特飲啦~尋日飲咗Miffy特飲了~
普通可樂就ok~oops﹗有人已經倒下了~
鼓起勇氣，我哋去排新世紀福音戰士ride啦~
我哋係NERV佐世保支部臨時職員
坐咗上一排坐椅，就好似凌空升起咁，係豪斯登堡上空同敵人對戰，新世紀福音戰士聽過好耐，我都唔知係咩，原來係啲高高瘦瘦嘅巨型機械人，乜咁瘦長唔係好難企得穩同埋容易斷咩？anyway，正義梗係必勝啦~有趣嘅係，坐我哋隔離嘅幾個大人玩得非常投入，因為呢套動畫都耐耐地歷史吧(check wiki，原來1995年首播)，我睇落佢哋都似三字頭，但玩得好開心，拍晒手，wee wa鬼叫，感染到大家都開心~我都覺得精彩呀，詩最鍾意問「你最鍾意係乜嘢？咁第二呢？咁第三呢？」，沒完沒了，如果問到豪斯登堡最鍾意係咩，呢個大概排第二啦，Miffy區排第一~
前往其他日本旅遊blog