我哋買好火車飛，去到月台等去米蘭中央車站嘅火車，時間慢慢過去，見到有班次準時到達，但後面好多班次係火車資訊看板上面就變成soppresso，咩叫soppresso？轉眼間，我哋班車應該要嚟，但都仲未到~
search下soppresso先知原來解作「取消」，咩事？咩事？見冇車搭，火車站又有啲聽唔明嘅意大利文廣播，周圍嘅人又有少少反應，然後全部人都走去搭前往Cadorna嘅班車，我哋見咁多soppresso應該都唔對路，去咗Cadorna先算啦~
莫名其妙地上了一架去Cadorna的火車
上到車，有一對泰國遊客夫婦問我哋架車嘅目的地，佢同我哋講原來今日有罷工，歐洲罷工聽得多，先前都有諗過萬一遇著罷工點算，估唔到一落地就遇到~search下罷工資料，原來火車、米蘭地鐵都罷工到中午，所以我哋去到Cadorna，如果唔搭的士，想返酒店放低行李都有啲困難~記得之前睇過一啲寄存行李app，唔係火車站locker，而係一啲店家提供限量暫存行李位，可以用app嚟預約同付款，我哋今次就試下啦~火車上三父女呼呼大睡，太多嘢未明朗我都唔係好瞓得著…
佢哋咁攰，梗係唔願醒啦，尤其係詩，今個trip多次係車程上叫醒佢落車都喊好耐，全靠上次去曹公潭camp買定又冇開嚟食嘅party size軟糖，先可以快啲令佢醒神番~
我哋決定，係Cadorna附近暫存行李，跟住就步行20分鐘左右去米蘭地標—-米蘭大教堂，有力嘅話就去埋少少附近嘅景點，因為我哋之後嗰日就去Bologna，而最後一日返嚟搭飛機走亦冇非常多嘅時間，所以今日去得幾多就幾多啦~用app訂好火車站附近商店嘅行李位…以為好近好易搵，對於意大利嘅街道、門牌編號等都唔熟悉，點解嗰間放行李嘅店…好似落咗閘嘅？定係兩邊鋪頭係前後通嘅呢？後面間鋪有個講緊電話嘅男人見到我哋眼望望，遞一遞手好似叫我哋等一等咁，佢好似係紀念品店嘅人，但賣花綠綠遊客T恤或者度假花裙子嘅唔係通常都係大嬸咩？佢講完電話就示意我哋動作快咁堆啲行李入去鋪入面，仲強調自己唔識英文，唔好同佢講咁多嘢，然後問我哋攞存行李嗰個QR code，佢唔係用番商家app嚟scan，而係影咗佢用whatsapp嚟send俾某人…希望我哋唔會第一日就遇到騙子，冇晒啲行李啦~anyway，呢一刻只能信住佢先啦~
雖然未到中午，但太陽已經好猛，天氣已經好熱，行咗兩步詩已經唔係好掂，要爸爸抱，唔係扭計嗰種，因為佢好快就瞓著咗，睇嚟飛機上休息得唔好，加上時差，令佢真係頂唔順，曉都攰，但都默默地跟住行~
攰攰詩+攰攰曉
覺得坐一陣飲啲嘢食啲嘢可能會好啲，唔係好熟悉呢度食嘢係點情形，之前睇旅遊書話意大利人食早餐好簡單，可能係一隻牛角包加杯咖啡，晏少少又食啲甜嘢又飲杯咖啡，中午可能會食啲pizza、panini之類，每日最豐盛嗰餐係晚餐~我哋有入過去啲鋪頭，好似冇凍嘢飲啱曉，跟住又出番嚟~跟住米蘭大教堂方向一直行，行行下我哋就知道肯定冇行錯路了，因為有一團又一團嘅旅行團向住同一個方向行，入到去一條步行街，就感受到旅遊區嘅氣氛了~
吸引我哋嘅，除咗各種商店、建築之外，就係感覺可以叫得安心、食得安心嘅第一餐—-麥當勞~
有得涼冷氣，張枱仲係砌圖遊戲，詩詩醒咗都可以順利投入lu~
有自助點餐機，yeah，冇咁緊張，同埋原來意大利嘅「McCafe」都真係好意式，我哋好意式咁叫咗兩個牛角包早餐set，爸爸飲expresso，我就飲cappuccino，另外叫咗兩個果汁俾小朋友們~
我買好嘢食，傻下傻下咁諗住好似香港咁等叫number，咦，唔對路喎？點解啲人好似排排地隊咁嘅？原來…要遞飛﹗﹗好在發現得早~
意大利嘅牛角包比香港嘅大，而且興有各種餡料，今次叫咗朱古力同開心果兩款，我覺得開心果特別啲好味啲~
少少嘢落肚，有啲幹勁繼續行了~
詩詩有番少少表情
影下米蘭街道
好靚嘅庭院喎，不過兩個未到嗰個年紀，跟唔到我指示擺啲少女挨柱pose~
共享單車香港見得多，福建都有見過共享電頩車，但共享滑板車就第一次見，大家扮晒嘢踩上去影相，原來企上去太耐唔啟動會whew whew whew響，哎吔，快啲走~
發現國際米蘭紀念品店，我廿幾年前都成日睇國際米蘭架，捧羅拔圖巴治奧場嘛，大家有所不知，我當年有寫過信俾佢，仲收過佢嘅(球會公式、電腦print)嘅回信添呀~
發現Lego店，爸爸靜靜雞帶咗福福出嚟影相，呢張本來係福福獨照，我哋三個衝埋去就變咗熱鬧合照了~
地上嘅可愛動物，我揀咗好似祈緊禱嘅水獺，爸爸揀咗代表聖神嘅鴿子，曉就同蜻蜓一樣動作，而詩詩就揀咗可愛嘅兔子~
唔知係咩嘅雕塑
發現意大利國旗顏色嘅沙冰呀﹗
米蘭大教堂果然好宏偉，見到時要哇一聲，當年去西班牙時，聖家堂仲未興建完成，哇得嚟都有少少地盤嘅感覺，而且米蘭大教堂睇落更闊更大~
廣場上好多鴿子
唔同角度，唔同組合
我哋商量過一陣要唔要買飛入去參觀，曉好想去博物館(?!)，因為期望有冷氣(?!)，但見大家真係睡眼惺忪，睇嚟唔捱得好耐，入場費貴事少，排隊期間未入到去已經冇晒力事大~算吧，都係欣賞下外觀算數啦~
呢度門都好誇張，全部都係浮雕
耶穌bb俾人摸到立立令呀
原來米蘭大教堂正旁邊，就係另一個必去景點，艾曼紐二世拱廊啦，下篇blog就去啦~
待續
前往其他歐洲旅遊blog
前往其他郵輪旅遊blog
前往其他意大利旅遊blog