飛機抵達北京時已經係深夜，轉機櫃台其中一邊close咗，我哋又問下職員又跟下其他同班機嘅人溝通下，先搵到安檢位置~北京呢邊對於充電寶、電池管制特別嚴格，除咗要個別拎出嚟之外，關員仲要一個一個睇清楚啲規格~雖然搞耐咗，但因為飛米蘭嘅班機更加超級delay，所以去到閘口仲有勁多時間~

影咗指定動作先

其實周圍都有好多水機可以refill水樽，但我都想挑戰買下嘢飲，今次冇為咗轉機買國內嘅上網日費，所以買飲品機就要連接機場嘅wifi先用到支付寶俾錢了，登入wifi要入埋passport資料，買呢樽飲品都花咗少少工夫~

飛機又delay起飛，等到冇晒電…睇下爸爸手上嗰樽嘢飲﹗就係好難先買到嘅運動飲品了~

打blog呢一刻已經返到嚟香港，又經歷多一程長途機，事情發生嘅先後順序我唔係好記得了，全靠有旅途中即畫嘅圖畫遊記幫我記錄一啲細節，而家先可以同大家share~等上機時已經累得不得了，所以上機安頓好就即刻瞓一覺先啦~

記錄一下舒服嘅腳~

本來我哋帶定拖鞋上機，但拖鞋係爸爸度，大家坐得太遠，結果都冇拎過啲拖鞋出嚟，去廁所都係次次著番波鞋就算~

瞓覺

我同兩隻坐，爸爸自己一個坐三行嘅後面，我哋除咗出去去廁所之外，都冇特別去探班lu~我哋三個呼呼大睡期間，我感覺周邊有啲動靜，深夜時分竟然派飛機餐﹗﹗

呢餐嘅名堂係宵夜，可能知道大家都會瞓覺，所以每樣食物都係獨立包裝，方便你先留起，遲啲食都得~我不嬲都係食食食達人，無論係幾差嘅飛機餐，或者幾淡嘅醫院餐，我都會食晒佢，所以宵夜送到，三文治、小蛋糕同乳酪我都一掃清光~小朋友嗰兩份餐我就幫佢哋留好咗，之後肚餓先食~

11小時機程上我睇咗兩套電影，比起睇自己download定係ipad嘅影片，我更鍾意係機上娛樂搵下同我有緣份嘅影片~第一套叫做Weekend Rebels(機上影片譯：週末反叛者；或譯：56種喝采)，講一個自閉症譜系嘅少年，適應唔到主流學校嘅群體生活，因為同學之間討論每個人都有自己生出嚟就捧嘅球隊，為咗搵出自己支持嘅球隊，爸爸應承逢週末同佢去晒全德國唔同球場去睇現場球賽，因為佢生活上有好多自己訂嘅規則，兩父子出門當然遇到好多問題啦，就係一個咁嘅故事，既有趣又溫馨感人~

第二套叫Free Guy(機上影片譯：失控玩家；或譯：爆機自由仁)，講主角係網上遊戲嘅NPC(非玩家角色)，佢係利用AI去創作嘅角色，佢會自我成長，當佢係遊戲世界入面遇見咗一見鍾情嘅女人，發現咗自己係NPC之後，決定要改變命運，而且更引領其他NPC一齊走出框框，活出自我~呢套就誇張搞笑，轉下口味都幾好嘅~

點解我可以睇到兩套戲咁正？有部份時間佢哋兩個瞓緊覺啦，另外有部份時間佢哋一齊睇ipad download定落嚟嘅<玩轉腦朋友1>，有廣東話聽就梗係投入睇啦~我有段時間曉自己睇英文對白、簡體字字幕嘅Minion電影，詩就自己睇ipad download定嘅Peppa Pig~我哋三個座位之中，其中一個位個電視壞咗，所以成程飛機係咁調位囉~

大家又有玩下機上娛樂啲game

除咗睇戲之外，我哋都開咗副新UNO出嚟玩~

平時屋企玩開UNO Flip，今次買嘅新game係UNO Flex，可能大家攰得滯，個腦唔係好運作得到，新咭牌、新規則有點難以掌握，所以玩咗一鋪就放棄了~

落機前當然仲有多一餐飛機餐食啦，我哋去到時係米蘭嘅清晨，所以有一餐早餐食~

我同曉食西式、有腸呀、蛋呀、薯仔塊呀嗰啲，詩就揀咗中式，佢不嬲都鍾意粥，估唔到白粥佢都ok，而成份餐之中，佢最鍾意嘅係包榨菜囉，平時我屋企整榨菜，佢都會係我打開包裝時過嚟拎幾條嚟食，隻鹵蛋佢剩低咗，反正真空包裝可以留，我又放埋係我哋個食物庫度~

到咗lu，yeah yeah yeah~可以伸伸腳伸伸腰，自由活動啦~過關排隊比較耐，我哋趁機會比較下啲意大利文同英文，之後我會同大家介紹幾個重要意大利文架~

去到意大利影嘅第一張相，以pizza店做背景~

好多程火車我都係香港上網買定飛，但飛機變數太多，所以出市區呢一程就冇買定，去到火車站先買~

順利買好飛落去月台等車~

原來意大利嘅火車係咁嘅樣嘅~

究竟我哋可唔可以好快去到米蘭中央車站旁邊嘅酒店落腳呢？

待續

前往其他歐洲旅遊blog

前往其他郵輪旅遊blog

前往其他意大利旅遊blog

Comments

comments