之前預備米蘭景點時，除咗米蘭大教堂之外，另外必去嘅就係艾曼紐二世迴廊(Galleria Vittorio Emanuele II)，個名咁長嘅？我同小朋友介紹呢度係「古代商場」，呢個迴廊建於十九世紀後期，到而家有130以上歷史，商場？有冇冷氣，係冇嘅，個別鋪頭內部應該有嘅，不過迴廊部份就唔太覺囉~呢度原來正正就係大教堂旁邊~
好宏偉嘅外型
大教堂影到七七八八，就過去睇下啦，雖然人好多，但入到去都要嘩一聲~
好富麗堂皇
(除咗詩之外)大家都好興奮
笑下啦唔該
地面鋪嘅磚拼砌圖案拼得好華麗
兩旁名店林立，櫥窗都好吸引，而且一間間餐廳見est幾年幾年，好多間都好有歷史~
拱形玻璃頂好有氣派，打風落雨都唔影響行街lu~
雖然十點幾先係麥當勞食完少少嘢，但兩個鐘後又有少少肚餓了，呢度啲餐廳又冇想像之中咁貴~
不如試下呢啲百年老店啦，我哋揀咗迴廊嘅第一間餐廳，呢間Motto 1928年開始就營業啦，同兩位太婆差唔多年紀，不過比起我同老公當年去過，西班牙嗰間健力士世界紀錄歷史最悠久餐廳(請參閱：8-11-2013：西班牙day 9(part 3)．健力士最悠久餐廳Botin@Madrid)，Motta都係好年輕啫~
雖然第一次正正經經係意大利入去餐廳食嘢，好在之前睇過啲旅遊書講過少少用餐小知識，起碼知道入座就要收「coperto」(有譯作座位費或桌布費)，其實就係香港中式酒樓嘅茶芥咁上下啦，入到嚟就要俾，唔事先知道咪會覺得好奇怪或者唔公道囉~果然旅遊書講得啱，正式餐廳ristorante同小酒館trattoria除咗食物價錢唔同之外，coperto都係ristorante貴一截，Motta應該係我哋成個旅行食過咁多間餐廳之中coperto最貴了，要每位5歐，我記得後來去威尼斯嘅一間trattoria好似係2歐~你可以當coperto係佢送上嚟嗰籃麵包嘅費用嘅，既然俾咗錢，梗係食下啦(後來成日都食唔落)~早於我中學時期第一次去意大利時，我已經知道，意大利坐低食嘢一定要叫飲品，唔可以好似去美國咁叫佢俾tap water，即使只係飲水都一定要叫樽裝水，一早知道文化係咁就唔會嬲嬲嘅，不過孤寒就在所難免，我哋唔係嗰啲食嘢一定要飲嘢嘅類型，開頭多數都係叫大樽水，後來嚟到日子耐咗，熱嘅時候都叫下其他飲品，另外試過意大利嘅國民雞尾酒spritz之後真係一試愛上，有機會就叫嚟飲，好似去西班牙時咁成日都飲sangria一樣~
覺得玻璃樽裝水好特別嘅小朋友，不停話自己好似飲酒~
麵包籃，貴啲又真係唔同啲，有多幾款包~
平時香港食嘢，我哋兩大兩細多數都叫三個大人份量，原來係意大利佢哋唔習慣咁樣，係Motta，我哋揀咗三個主菜之後，侍應好friendly咁樣引導我哋，「你哋有四個人…」，okok，明，咁…揀多個size細啲嘅前菜湊夠數啦，佢睇落都ok咁嘅樣~後來望下周圍啲枱，即使帶住細過阿詩嘅小朋友，佢哋真係會order一個fish and chips俾個小朋友自己鋸喎~我哋咁遠嚟到旅行，點都會share share share，後來上到郵輪，每餐無論前菜、主菜、甜品都有好多款式任揀，我哋都盡量叫多啲款式，share share share，樣樣都想試下嘛~
最後叫咗呢啲~
Tentacolo di polpo con pomodorini e timo su vellutata di finocchi (Octopus with cherry tomatoes and thyme on fennel cream)：個醬好軟綿綿，好似食緊啲雲咁~
Pasta fatta in casa e trafilata al bronzo con funghi porcini trifolati (Homemade Pasta with porcini mushrooms)：啲粉好有嚼勁，菇好味~
Ravioli gamberi e capasanta con pomodorini, gamberi e pesto (Ravioli pasta with prawns and scallops, cherry tomatoes, prawns and pesto sauce)：呢個最好味﹗﹗一咬落個雲吞就有大海嘅鮮味湧出來~
PIZZA MARGHERITA (Pizza with tomato sauce and mozzarella)：嚟到意大利梗係要試下Margherita啦，可能係大火烤，食落覺得有啲太熱氣~
食得芝士多，返香港時，臉仔都圓碌碌咗~
食咗少少嘢，對腳休息咗一陣，又可以行多一陣，不過都唔行得耐啦~
呢架米蘭輕鐵同屯門輕鐵非常相似，連顏色都一樣，可能影得太心急，影埋隻手指添~
返Cadorna拎番啲行李途中，見到一間有有好多層嘅Uniqlo，而家睇番意大利Uniqlo個網頁，原來全意大利得羅馬同米蘭有分店咋~
雖然置身於舊建築內，但內部裝修好時尚~
仲有色彩繽紛嘅大牆壁~
同香港嘅Uniqlo比，米蘭嘅Uniqlo貨品放得又多又密，可能間鋪大，貨品種類好似仲多過香港咁，大多數都係啲素色嘅休閒服裝/正裝，香港佔好大範圍嘅動漫/品牌crossover嘅圓領tee幾乎唔見~另外就係，相似貨品比香港貴好多，可能一件帶pad嘅女裝小背心，呢度賣要超過港幤200了，day出發前買嗰件用嚟襯西裝嘅白恤衫，呢度都貴一截~明明Uniqlo係又平又抵著嘅代表嘛，原來去到歐洲都貴咗(McCafe反而平咗好多，可能係意大利，咖啡實在太普通)~
另外沿路有旅遊書介紹嘅Starbucks Reserve Roastary，好似係超大Starbucks，入面有啲嘢可以參觀，當然都有食嘢飲嘢嘅部份，見到外面大排長龍，夠鐘可以返酒店check in嘅我哋就決定唔排了，而家上網睇先知道有得book定~
返酒店啦返酒店啦，我哋行返Cadorna拎行李，途中入咗一間叫做Flying Tiger Copenhagen嘅鋪頭，入面啲嘢好靚呀，睇到心心眼，由零食、文具、家品、玩具等好多嘢賣，總之全部都好靚啦，又唔貴，雖然只係第一日，但都買咗一大堆嘢打算帶番嚟送俾人，後來都有再係火車站入面見過另一間分店~打blog刻意搵下個網站，原來網店唔送嚟香港呢，太可惜了~
我哋拎得番我哋嘅行李啦，謎底終於解開，原來朝早招呼我哋唔太積極嗰個男人，真係隔離鋪架，我哋啲行李返咗去正式登記係寄存行李app嗰間鋪嘅位置，亦解釋咗點解佢影咗我哋個QR code嚟send俾某人~所以，以幫鄰居手嚟講，佢已經超級積極了，多謝你呀~
跟住到下一個挑戰，拎住行李搭地鐵﹗
Motta Milano網頁：
https://ilmercatodelduomo.it/en/motta-milano-1928/
意大利Uniqlo網頁：
https://www.uniqlo.com/it/it/home
Flying Tiger Copenhagen網頁：
待續
前往其他歐洲旅遊blog
前往其他郵輪旅遊blog
前往其他意大利旅遊blog