點解呢個day 2可以有四篇blog咁多呢？因為我哋由香港飛過嚟係先「賺時差」，北京出發時係凌晨一兩點，飛11個鐘，嚟到又係清晨六點左右，賺咗六個鐘，當然會返香港就有借有還啦，所以到day 14、15時又會平平淡淡咁好快過晒啲時間~因為飛機上休息得唔好+時差+已經活動咗好多個鐘，我哋係街上遊蕩到酒店可以check in就返酒店啦~今次旅行除咗郵輪嘅七晚之外，我哋前前後後會係意大利住五晚總共四間酒店，我book酒店都係target越近火車站越好，減少travel嘅時間，可能因為追求近，要平衡價錢、質素、位置等都花費一啲工夫~
去郵輪前，米蘭我哋住一晚嘅酒店叫Esco Hotel Milano，你Google search都search唔到添，因為酒店只佔一楝大樓入面嘅其中一層，格局有啲似我哋當年去西班牙時馬德里住嗰間咁(請參閱：7-11-2013：西班牙day 8(part 4)．溫暖的鬧市hostel．最後tapas衝刺@Madrid)，到到大樓門外仲要按鐘等樓上reception開門俾你，不過佢嘅優點係離米蘭中央車站只係620米，距離地鐵站Centrale FS更只係190米~
我哋決定由Cadorna搭地鐵返去Centrale FS，米蘭搭地鐵唔係車站買飛，而係幫襯啲煙草店買，去到博洛尼亞搭巴士都係類似操作~
米蘭嘅地鐵可能真係有啲歷史，實在…麻麻地﹗站內指示唔清晰，車站非常熱，企係度等車乜都唔做都成身汗，最搞鬼係個到站時間顯示牌，先一秒明明顯示話仲有六分半鐘到，轉個頭居然變成七分鐘﹗﹗令兩個攰到極點嘅小朋友非常崩潰~車廂都好多人，我哋費事兩件大行李塞實晒，同爸爸分開咗企~
好在出站真係好近酒店，睇住地圖，好輕鬆搵到酒店嘅門牌，但更花時間嘅係入去大樓，因為大樓外面，甚至對講機都冇酒店嘅明顯招牌，唔敢按個掣落去~好在上到一樓，reception嘅小伙子好friendly，英文又好~可惜房間未ready，要坐reception旁邊嘅早餐餐廳一陣等入房，變咗四pat嘢~
房間都唔錯，冷氣夠強勁，我哋訂嘅係家庭房，雙人床同兩張單人床都好舒服~係咪我哋太矮？個座廁有啲高，連我坐上去都吊腳，詩詩就更難坐上去了~
我哋決定沖涼瞓覺之前出去附近超市買水先，步行幾分鐘嘅呢間to.market麻雀雖小、五臟俱全，除咗買樽裝水之外，我哋仲買咗啲杏子呀，原來扁桃、杏子、布冧之類係意大利非常平，2-3歐已經一大盒，仲要又新鮮又甜，果然需要在地飲食~我哋仲買咗特價果汁即飲，同埋聽日做早餐嘅麵包，非常滿足~
路上經過一間賣夏威夷poke嘅外賣店，我哋晚餐就食呢間啦，可以買番酒店食，唔駛出嚟逗留咁耐，咁就唔駛沖多次涼啦~
買水發生小插曲，返到酒店打開樽水嚟飲…
oops，原來買錯咗氣泡水，除咗爸爸都ok氣泡水之外，我哋三個都飲唔掂~反正要輪流沖涼，爸爸落去to.market多一趟，買多一支普通水~繼soppresso之後，我哋學識多一個意大利文，就係frizzante，你嘗試下讀下個fri同埋zzan嘅部份，其實已經係擬聲詞，感受到嗰股湧上嚟嘅氣泡了，之後唔會再買錯，連英文唔識多個嘅詩都識得搵naturale而唔要frizzante了~
沖完涼可以上床坐坐了
大家輪流沖涼就瞓第一覺啦，我哋預計六七點左右起身食晚餐，之後再瞓埋夜晚長嗰覺~今次成個trip都係咁啦，日頭不停要叫醒係車上未瞓夠嘅詩詩，次次都大喊特喊一陣先冷靜，係咪要9歲先可以隨時瞓隨時起身？鬧鐘響時，兩個小朋友都係deep sleep緊，好難先叫得醒呀~
我哋真係去咗買夏威夷poke魚生飯做晚餐，一個價錢，可以揀兩款蛋白質類，香港人嘅我哋當然揀三文魚同吞拿魚魚生啦，唔係揀豆腐或者雞胸肉呀嘛(我當然好欣賞佢提供各種option，俾素食者同埋減肥/增肌人士選擇)，其他材料就可以揀三款，醬料又可以任揀，都幾開心~至於個底，我揀咗半飯半菜，唔駛食得咁heavy~為咗增加佢哋嘅食慾同興致，曉詩嗰碗仲upgrade揀咗牛油果添呀~
好味poke，大家估下邊一碗係我嘅？
可愛曉，可愛詩
食完好似跟住又再瞓覺了~
福福都要瞓多一覺~希望可以盡快適應時差啦~
待續
前往其他歐洲旅遊blog
前往其他郵輪旅遊blog
前往其他意大利旅遊blog