本身預約咗14:30-15:00辦理登船手續，我哋咁早俾唔俾我哋上船架？

排隊等check in上船~

估唔到登船非常順利，因為出發前print好行李tag，我哋仲可以行快啲嗰條隊添，不過郵輪公司只幫我哋搬大件行李，兩個背囊同一個手挽袋就要自己照顧住直至可以返房，嗰兩個背囊就算喇，話晒都係成日要拎出嚟用嘅嘢，但個手挽袋…係啲禮服﹗﹗真係好唔想拎住囉~

可以上船lu，好大呀~

開心~

早上船雖然房間未ready，但有個好處，就係慳咗一餐飯﹗網上啲人教路，話記得帶定泳衣係隨身行李，未返到房都可以即刻享用游泳池，我哋未至於咁渴望馬上跳落水，所以一開始都冇諗住hand carry泳衣，反而想day 1多啲認識下隻船，周圍逛逛~

睇下船嘅資訊

好大好開心，見到呢啲轉轉樓梯好興奮~

逛逛畫廊

開頭時成日都要睇呢個船嘅立體地圖先識行，有啲樓層又船頭通唔到去船尾，得某幾層係通嘅，後來慢慢就行到熟晒啦~

1pm可以入到房放低啲手提行李，我哋可以輕裝上陣，出去隨便行下影下相~

透明電梯可以睇下嘢~

熱鬧嘅購物大道，我哋都係中段先知，原來呢度間cafe都有免費飲品同小食，填補自助餐廳唔開放嘅時間serve大家，不過我哋最多去飲下嘢，都冇乜幾可有餓嘅時間要去搵嘢食~

即使早餐食得好飽都開始肚餓啦，我哋去咗11樓隨時歡迎你嘅自助餐廳食嘢~

船上第一餐﹗

早餐、午餐、下午茶、晚餐，只要係自助餐廳開放嘅時段，你鍾意入去食幾多次嘢都得，所以呢幾日有時我哋口渴入去飲少少嘢，又或者入去只食少少水果咁，好free~最唔free嘅部份就係門口有人守住，守住？守住你有冇洗手，一定要洗咗手先准入去食嘢，佢哋仲會拎住結他唱住歌叫大家洗手，但所有熟悉嘅歌曲，歌詞內容都會變成「wash your hands」之類嘅嘢，好搞笑~咁又係，郵輪啲食物佢哋有信心做到好衛生，但客人唔洗手搞到肚痛，怪嘅咪又係怪餐廳，嚴格執行係好嘅~

曉幫手拎餐具

雖然係船，周圍都係海，但要坐到海景靚位用餐都要少少運氣呢~

呢度應該係緊急會合點，以前坐郵輪要啟航前做一次緊急情況嘅演習，所有人聽到訊號就要去集合點，而家方便大家，郵輪app有得睇安全示範嘅video，總之係啟航之前睇咗，同埋係指定時間期間去集合點報到就完演習了~

天氣好好，周圍睇下影下相~

見到無盡大海就心情好舒暢~四個影好開心﹗

兩個影就好sweet sweet~

看海

未有耐開始航行，外面嘅風景主要係Ravenna嘅海邊~

附近都見到有啲沙灘擺滿太陽傘，如果有多啲時間，我都好想享受下地中海嘅陽光與海灘呢，即使今次頭尾有15日，都未夠時間慢慢歎~

船上有緩跑徑，後來我都真係有跑過一次呢~

甲板泳池

其實都只係扮歎，因為上到船太興奮，根本就唔願意停留一個地方太耐，只係想睇下呢度睇下嗰度~

大家首先想試玩mini golf~

爸爸技術最好，通常最少桿數可以推個波入洞，我就非常不濟，同阿詩鬥渣，曉都偶有佳作~不過要完成全部course嘅最大敵人，一定係個太陽同炎熱嘅天氣，係咁曬住唔對路，玩到咁上下我哋決定返房休息下~

我哋住7晚嘅房間~

同我哋一齊去旅行嘅小動物們~

大多數嘅晚餐我哋都係主餐廳度食，book郵輪時已揀咗早嘅時段，即係六點鐘用餐，主餐廳係serve比較正式嘅餐飲，可以揀頭盤、主菜、甜品，其實都係任點任食，不過上菜需時，所以如果後來想再追加，又會等好耐，所以都係要一早plan好晒食啲咩、食幾多~我哋嘅專屬侍應係兩位來自菲律賓嘅男士，Kelvin同埋John，特別係Kelvin，好細心親切，熟悉咗我哋嘅用餐習慣之後，就自動同我哋配合~

開頭佢哋覺得小朋友應該會鍾意Kids’ menu，即係啲鬼仔鬼妹鍾意嘅漢堡包呀、炸魚薯條呀、雞塊呀、芝士通心粉呀嗰啲，後來發現我兩個女會同我哋一齊食大人嘢，就會拎定多一隻大碟俾詩，等我哋分啲食物俾佢~我哋屋企主張「乜都share」，以達至所有食物大家都有得試嘅目標，而食多幾餐之後，我哋發現咗主餐廳嘅「order黃金比例」—-四個前菜、三個主菜、兩個甜品~開頭佢哋都好疑惑「我哋食咁少」，其實好夠食啦，大家都食到好盡興夠晒皮，就係因為有節制地食，今個trip咁多美食，仲要上郵輪有得任食，我先可以肥得1kg返香港咁理想囉~

主餐廳嘅餐牌

郵輪上面有主餐廳、自助餐廳、購物大道嘅cafe供應「免費」餐飲(應該叫「費用已包含」餐飲比較準確)，其實仲有好幾間額外收費餐廳，但呢幾間啲食物已經咁好咁足夠又咁多選擇，我都未搵到原因要額外俾錢去食，可能成日去郵輪嘅人會想多啲新鮮感吧？另外一樣好稀奇嘅係，真係好多人會俾錢買各種飲品plan，有任飲樽裝水、任飲品牌汽水、任飲精品咖啡、最勁嘅plan係任飲所有酒精+非酒精飲品，但啲飲品plan真係好貴bor，其實如果一日飲三杯，散叫應該都仲抵過買plan，加上本來就有啲免費飲品，好似連散叫都冇需要^^”(可能我哋要求太簡單)，仲有，上岸觀光時其實都可以買酒買汽水買咖啡飲嘛，只係酒唔可以帶上船度飲啫，其他飲品唔太多都俾你帶架~

Kelvin見兩個小朋友唔主動點kids’ menu嘅食物，佢就送上rainbow salad俾佢哋試下，見佢哋咁鍾意呢個水果粒沙律，就每晚都自動送上，變成「傳統」啦~上面中間嘅蝦cocktail，係後來encore次數最多嘅食物，見到有佢出場就會嗌，仲會叫多一碟添，因為我哋四個人人都鍾意食蝦~

kids’ menu另一方面都係一張解悶用嘅摺紙嚟嘅，後來發現等食物等得太耐，我哋索性帶埋圖畫遊記落去餐廳度畫住等食~

郵輪每晚都有show睇，因為要早瞓，我哋傾向趕睇早場~

第一晚嘅show係特技表演，表演者係懸掛高處嘅圈同緞帶上做出各種高難度嘅優美動作，仲有一個男演出者舞動一個好大好大嘅立方金屬框，要平衡都唔容易呢~

話說我哋係海上咁多晚，應該好多機會睇星星，其實要睇到星星真係唔容易，因為歐洲嘅夏天實在太遲天黑啦﹗我哋食完飯、睇完show，返房沖完涼，往往個天都仲好光，但小朋友又不得不上床瞓覺，結果咁多晚都冇話點樣睇過星星呢~

呢個就係我哋房嘅瞓覺格局啦，兩個小朋友本來都對碌架床好期待，結果都係得家姐咁多晚有瞓，詩詩嘛，到頭來都係要攬住我瞓，所以多數時間雙人床係我同詩瞓，爸同曉就一人一張上隔床囉~

要早啲瞓，第二朝好早起身呀，起身就到克羅地亞啦﹗

前往其他郵輪旅遊blog

前往其他意大利旅遊blog

Comments

comments