day 4我基本上冇安排任何觀光行程，因為今日係上郵輪嘅大日子，一定要準時上到船，最重要係交通上要妥當~郵輪網上check in時可以揀登船時間，我好樂觀地諗住中午前去到Ravenna，食個午餐，再搭巴士去港口…咁…下晝兩點半登船啦﹗所以訂咗早上十點左右嘅火車飛由Bologna出發~我哋個個都仲受時差影響，其實都算有進步啦，起碼起身時間係五六點而唔係三四點~因為曉比較早，為免影響未醒嘅人，佢入咗去光猛寛敞又舒適嘅浴室畫畫~我哋所有人起晒身、梳洗好仲玩咗陣UNO添，咁先至七點鐘~咁多時間，不如試下酒店嘅早餐buffet啦，雖然早餐每位15歐，比起出去飲杯咖啡食個牛角包貴好多，但小朋友係免費呀，免費呀，即刻好抵~
day嘅espresso，我都係比較鍾意加奶嘅咖啡~
早餐食物主要係歐陸式，bakery種類非常多，各種酥、各種包、各種撻、各種蛋糕擺滿枱，熱食就唔算多，但樣樣食物都好高quality，又maintain得好企理，我係筆記度mark低咗「魚蛋」芝士，哈，意大利梗係冇白魚蛋啦，我search一search芝士個名，應該叫bocconcini~另一樣比較特別嘅應該係食咗個果仁撻，好少晨早流流食咁多咁甜嘅嘢~個雜果沙律都好精彩，已經食到好飽都要再食一碗~
之前幾日又長途機又時差，唔太暢通，呢一餐食得又飽又開懷時間又鬆動，一餐時間大家輪住離座去某處~>v<
返房執好行李就去火車站啦，我哋今日搭火車去Ravenna—-我哋上郵輪嘅港口~
Bologna火車站
時間多咗少少，逐間火車站嘅鋪頭逛一逛，最有收獲竟然係一間糖果店，買咗少少紀念品，仲買咗一對寫住Rita同Davide嘅expresso杯，原來David嘅意大利文係Davide，不過由day 4帶住對杯帶day 15返香港真係有啲勉強，即使有個盒入住其中一隻都裂咗少少呢，其實我哋返到香港都唔會點飲espresso，所以用嚟裝飾收藏都仲ok嘅~
好可愛嘅鋪頭，好可愛嘅三父女，輪到我看住啲行李~
去到月台，人非常多，等等下突然間有啲意大利文嘅廣播，嘰哩咕嚕嘰哩咕嚕唔知講咗啲咩，月台上嘅人躁動不安，開始集體移動，我哋都唔知咩事，全靠羊群心理，跟住人行，去咗另一個月台上車，火車非常多人，又冇劃位，我哋好不容易可以一齊坐，day就去安頓兩件大行李~兩個小朋友係呢程車必定要瞓覺，所以個位對我哋嚟講真係好重要呀~
Ravenna都唔係尾站，又唔知有幾多人會落車，由我哋個位去到火車道門有一層又一層嘅人群，仲有啲後生女坐係條樓梯度，落車都有啲難度，我哋兩個大人要顧大喼手提袋背囊之餘，仲要顧住兩個未瞓得醒嘅女，企定個接近啲道門嘅位置，等一到站就確保落到車﹗
先落半條樓梯…
再企近門口…
原來都多人落車，而且如果book咗郵輪shuttle嘅話，一落車就見到著住郵輪公司制服嘅職員嘅指示了~
成功落到車，yeah~
一出站見到好多樹木，一種寧靜小鎮嘅感覺，同米蘭同博洛尼亞都唔同呢~可惜我哋冇乜時間慢慢explore呢個地方~
我哋為咗慳shuttle嘅錢，打算搭巴士去郵輪碼頭，出站先去買飛~
前面排隊嘅人個個都係去坐我哋架郵輪呢~
原來售票處轉個彎就係嗰架巴士個站，oops，已經有超勁多人，究竟我哋上唔上到架巴士呢？第二班又要等幾耐呢？
巴士開門，未有耐載滿人，車上面已經傳嚟一啲聲音話啲行李放唔落了，因為人人都係大喼，只能夠塞係中間條走廊，點算？排我哋前面有幾個只帶備輕裝嘅美少女，佢哋見我哋三母女係「婦孺」，就讓咗我哋三個上車先~
我同行李坐低咗，兩姊妹同前面個女士逼埋坐，美少女們上埋車已經差唔多逼到去上車個門口，屬於「壯丁」嘅爸爸會唔會上到車，我哋伸個頭望下望下，見到佢了，雖然佢差唔多企到去門口，總算齊人上晒車啦~
點解咁辛苦都唔坐shuttle？因為真係唔值嗰個價錢嘛，距離好近，搭巴士應該係每人2歐左右，shuttle每人要港幣100﹗﹗不過嘛，回程時我哋都搭咗shuttle，因為真係冇信心係中途站逼得上呢架巴士…
到咗最近郵輪碼頭嘅巴士站，好多人都落車啦，附近係安靜嘅住宅區，唔會搵到食午餐嘅地方，我哋即管去睇下郵輪碼頭嗰邊咩環境啦，我哋預約咗14:30-15:00辦理登船手續，早咗咁多，唔知俾唔俾我哋早啲上船呢？
見到我哋隻船啦﹗﹗好開心﹗好開心﹗好開心﹗就係佢啦—-Explorer of the Seas﹗我哋將會係呢度瞓七晚咁多呢~