離開Gelato Museum，我哋要搭番同一架巴士出去火車站，突然發現一個嚴重問題，之前講過，搭巴士要預先買飛嘛，我哋買咗去程嘅巴士飛，但唔記得買定回程飛﹗﹗雪糕博物館嗰度人跡罕至，根本冇得賣飛，點算？其實仲有另一個方法，可以上車嘟信用卡搭車都得，平時我幾張信用卡係手，但去旅行就放低個大銀包，只帶一張出去活動，我哋四個人得兩張信用卡又搞唔掂，因為每張卡只可以for一個人搭車~咁唯有嘟住兩個大人先，兩個小朋友就看著辦啦~買咗飛好地地，偏偏就係冇正正經經買飛時先嚟查飛﹗﹗我心跳應該即刻跳到上120﹗﹗個職員check咗我哋兩個張credit card，跟住打量兩個小朋友打量咗幾秒，佢哋兩隻嘢乜事都唔知繼續自己玩，跟住職員就走咗~
我突然間有啲懷疑其實佢哋兩個係咪唔駛買飛呢？因為米蘭嘅公共交通真係講到明14歲以下免費…而家我都唔太肯定我哋有冇搭霸王車^^”
anyway，我哋順利返到Bologna火車站，我哋去超市買埋嘢就返酒店check in啦~除咗水之外，當然要買又平又靚嘅水果啦，除咗買咗布冧，仲買咗兩個好靚嘅大蘋果，但有少少可惜呢，我哋飽得滯又攰得滯，今晚食唔到蘋果，兩個蘋果帶埋上郵輪，但郵輪上咁多嘢食，結果只食得一個，另外嗰個仲留低咗係郵輪房個雪櫃添~慘~
意大利啲沙律菜真係好平﹗﹗
食gelato食得太飽，未想食飯住，上房稍稍休息再出發，係Starhotel Excelsior我哋又係book咗四人房，今次係一張正式雙人床，一張係雙人梳化床，本來詩想貪得意試下瞓梳化床，咪玩啦，你最後咪又係要黐住我~哈哈~
有四個床位，應該可以瞓得好鬆動舒服了~
未出發去食晚飯，兩個小朋友搞呢搞路好多嘢玩，玩到冇晒電~
原本計劃係慢慢步行至Bologna最熱鬧嘅中央廣場Piazza Maggiore，影下相，逛下商店，搵下好嘢食，Google Map話行22分鐘，點知佢哋冇晒電，每見到一間鋪頭就話「不如食呢間啦」，我哋結果去咗一半路程左右嘅Ristorante Il Moro坐低咗食嘢，因為佢哋已經前進唔到了，而且個老伯waiter非常熱情招呼我哋~
小巷子入面嘅戶外餐廳係幾有風味~
坐低一定有麵包食~大家都有即刻開動即係證明好肚餓了~
我哋叫咗樣「唔知乜嘢」可以用唔同醬汁去煮，仲可以揀in broth，清湯好似清清地，就試下啦，上菜先知道…
係意大利餃嘅一種﹗﹗仲要係之前紀念品店見過有呢種餃嘅磁石同襪，即係唔小心叫咗呢度嘅名物呀~
去到Bologna梗係要試下Bolognese(蕃茄肉醬)口味嘅意大利麵啦，除咗味道偏鹹，都幾好味嘅~
貪有薯蓉，所以叫咗個牛扒，呢個弱咗少少，又唔算好嫰，肉味又唔算好濃，一般般啦~
唔想食得太heavy，我哋通常都會叫一個沙律~
呢個trip嘅沙律之中，所有芝士都係非常闊綽，芝士係香港係貴嘢，呢度有時甚至仲多過菜，打blog嘅呢一日係屯門市廣場嘅牧羊少年食咗個所謂希臘沙律，umum…要有嘅嘢都係有，但同希臘食到嘅希臘沙律啲比例唔太啱囉，芝士極少~
精神樣x2 + 攰樣x2
不過講到呢一餐印象最深刻嘅，莫過於我係意大利飲嘅第一杯Spritz~
Spritz差不多係國民餐前酒嘅地位，好多餐廳飲品嘅第一行都先寫Spritz，係香港，係餐廳飲酒比起飲非酒精飲品會貴好多，但係意大利當飲水都要俾錢時，顯得Spritz特別抵飲~冰涼又甜甜地，淡淡嘅酒味，係夏天戶外嘅餐廳一呷，非常清爽，除咗第一杯Spritz特別好味之外，另一杯最好味嘅，應該係去威尼斯玻璃島時好熱好熱嗰陣飲嗰杯~後來我仲買咗樽裝Spritz返香港同我爸媽家姐分享，又買咗個Spritz磁石貼咗係雪櫃，寫番我哋自己屋企嘅postcard我都係畫咗Spritz﹗
食飽飽我哋都係放棄去Piazza Maggiore嘅計劃啦，慢慢散步返酒店算lu，何況佢哋仲想浸浴~途中有大發現：
Hotel Regina﹗﹗所以Regina非常興奮~Regina係意大利文係女王嘅意思，所以後來仲見到Regina廚房紙同Regina pizza添~
返到去攰到成pat嘢，我記得我哋好似睇咗好多電視先去沖涼，其中一個節目係日本遊戲節目，但參加者真係啲歐洲少男少女咁~
今晚嘅酒店係成個trip唯一一次有浴缸嘅酒店，兩個女邀請我一齊浸，係時差丫定飲醉咗呢？我浸到差唔多瞓著咗…
好好休息，希望今次唔好咁早起身啦，差不多時候要適應到時差啦~