時差關係，米蘭醒來嘅day 3，我瞓醒時居然未天光，睇一睇鐘仲只係凌晨四點鐘﹗絕對唔係半夜扎醒嘅情況，因為真係瞓得好夠又身心舒暢嗰種，梗係啦，香港時間都十點鐘咯~我醒咗，詩又好快都醒埋，我哋兩個自己搵節目~
唔好嘈醒爸爸家姐，我哋第一個節目先畫圖畫遊記，今次帶咗活頁簿同文具顏色筆嚟真係好好呀，可以趁記憶尤新，感受最深嘅時候將旅途嘅小故事畫落嚟，比起返到嚟先開始打嘅blog更加原汁原味，佢哋要等候、覺得悶嘅時候又可以消磨時間~
出發前$12店買嘅娛樂可以出場啦，畫完遊記，我同詩開咗幅砌圖嚟玩，好在張床頭枱仔夠大，燈光都算足夠，砌砌下曉都起咗身加入~
細細張枱好熱鬧~
完成﹗
其實爸爸都醒咗啦，不過佢自己窩係張床度睇電話自得其樂~但到砌完我又去瞓多一覺啦，佢哋三父女自己玩，我半夢半醒之際好似聽到佢哋玩輪流收埋啲公仔又搵番嗰類遊戲~
正式起身梳洗，今日嘅早餐係to.market買嘅包+飛機食剩嘅包，唔好浪費嘛~
to.market個包原來係鹹包，先一日Motta個麵包籃入面其中一款包係橄欖包，幾好味，to.market都見到有得賣橄欖包，我本身都想臨返香港前買一個請橄欖愛好者公公食，但最後嗰日去嗰間超級市場見唔到啲睇落吸引嘅橄欖包呢~估唔到飛機包都有幾款，大家都揀搭飛機時冇食過嘅款式，詩詩就請咗中式早餐嗰卥蛋俾家姐食~
仲有未食晒嘅清甜杏子~
食飽咗仲差啲咩？未飲嘢囉，我哋執好行李，check out去火車站再買嘢飲啦~
今日早上出發去Bologna，所以住一晚就執齊行李離開米蘭啦~早係香港上網買好火車飛了，一早劃好位，只要提早少少去到車站搵月台就ok了~
邊個最似？
古色古香嘅米蘭中央車站，我後來去仁愛堂個圖書館，睇到一本書，專講全世界嘅特色火車站，入面都有介紹米蘭中央車站呢~
米蘭中央車站外型好古典，裡面，特別係地下商場就好新淨好舒服~
我哋係一間叫12oz嘅早餐店買咗兩杯咖啡，wow，係意大利好難得嘅凍咖啡呀~
果汁就俾小朋友~
原本想叫小朋友幫手影下個玻璃天花，但指導下都唔係太get到點影~
到到候車大堂都未夠鐘顯示我哋嘅月台，好在soppresso冇再係今個旅程出現~
咁等一陣啦~
輪流去行街，發現到Crocs嘅高踭鞋，香港有見過鬆糕鞋，高踭好似未見過~
新與舊
byebye米蘭，十日之後再見~
我哋搭嘅火車~
對於車廂好好奇嘅小朋友~
坐得好舒服~
大件行李原來要咁擺，不過都有試過有啲車廂嘅呢個位比較窄，我哋個行李厚得滯就塞唔到入去了~
我哋個車廂除咗我哋四個之外，好似其餘全部都係童軍嘅outing成員，感覺呢班中學生童軍都幾乖，除咗正常嘅嘈之外，都好規矩，good﹗
三父女好快就瞓晒~
城鎮之間都係綠油油一片~
唔知係咩農作物~
車廂有free wifi，我就可以upload下相，打下機，又plan下接住落嚟嘅行程，一個鐘鬆啲嘅車程好快就到啦~
Bologna車站同米蘭中央車站真係兩個世界，古老冇咁古老，現代又冇咁現代，我哋最高興嘅係可以去埋個乾淨嘅洗手間先繼續移動~
Bologna嘅酒店更近火車站，直情行出去就係正對面﹗
就係呢間Starhotel Excelsior了~Bologna叫做二線城市，所以以差不多價錢嚟book火車站附近嘅四人房，呢間酒店最靚，可以值得期待一下~
我去搵酒店職員幫手寄存行李，原來三父女咁歎~
一早就計劃咗下晝去Gelato Museum，上晝有啲時間，幾隻嘢係火車上呼呼大睡時我好努力睇旅遊書同埋開Google Map篤篤篤，有定案了，就去美術館睇畫啦~
待續
前往其他歐洲旅遊blog
前往其他郵輪旅遊blog
前往其他意大利旅遊blog