酒店存放好行李後，我話，第一件事要搵好下晝搭去雪糕博物館嘅巴士站，火車站前面嘅巴士站搵到87號了，但奇怪喇，點解其他路線都有時間表貼係度，偏偏87冇呢，有少少不安添，現階段未確認都有少少難搞，一係問人，一係等下見唔見到一班87啫，但87太疏啦，我哋決定信住架車會停呢度先，晏啲再返嚟啦~
關於上晝去邊，另有個好吸引嘅option係林寶堅尼博物館，不過太遠啦~最終決定去步行距離嘅國立博洛尼亞美術館(Pinacoteca nazionale di Bologna)~如果搭車十幾分鐘，行路廿幾分鐘，係咪應該行過去呢？起碼我覺得係囉，順便睇下當地嘅街道、店鋪、風景~
博洛尼亞比起米蘭行得舒服，個城市冇咁多人，而且好多行人路都有簷篷，唔駛咁曬~
意大利嘅聖堂真係多過便利店﹗行兩步忽然發現一間，入去祈個禱先~
特別有驚喜嘅係偶遇一個我事先冇計劃要逛嘅露天市場﹗
攤檔都唔少
衫褲鞋襪賣得都好平，又熱又熱鬧，啲bikini真係好平，係3歐一件呀﹗﹗
不過要係一大堆衫入面搵到心頭好，仲要啱size，一啲都唔易，加上目標為本嘅曉催我快啲行，都係冇乜機會有斬獲了~
呢段路唯一有買嘅係冰水囉，嗰間係水果店~
意大利啲本地產蔬果真係又平又靚，整個旅程我哋都買咗好幾次水果，次次都好滿意~
去到美術館了~
原來小朋友入場免費，我哋去地庫嘅locker放低背囊，去個洗手間，就可以入去參觀啦~
美術館只有一層，收藏由13xx年至17xx年嘅作品都有，幾乎全部都係聖經、聖人嘅故事，可以考眼力、估故事~day熟聖經多過我，佢認到比我多嘅舊約聖經故事~不過一啲聖人嘅故事就我哋都唔識了，不停見到同一個人隻手捧住一個城堡，又有另一個不停出現嘅人捧住三粒石頭，唔知有咩典故~
好多超大油畫，晝一幅唔知要晝幾耐~
一幅畫表現由瑪利亞懷孕，至耶穌係馬槽出世，到一家人去做戶籍登記~
影極都唔對路，呢張終於好少少，所以我哋嘅笑容先咁奇怪~
福福睇咩書睇到瞓著呀？
有啲畫作係由以前嘅聖堂度拆出嚟保育嘅~
畫面好震憾嘅耶穌顯聖容~
耶穌嘅第一個神蹟，婚宴中將水變酒~
古老壁畫
耶穌叫拉匝祿(Lazarus，或譯拉撒路)復活~
美術館勝在有少少冷氣，空間夠大，又有位坐，即使被兩個小朋友視為成個trip最悶嘅地方，佢哋都可以自得其樂~
睇呢啲寫實嘅畫，另一樣有趣嘅地方，係睇下啲畫家有冇細心觀察人體結構、肌肉骨骼靜脈等等嘅線條，有啲做得好好，有啲懷疑佢只係憑空想像出嚟畫…
例如…有腹肌嘅bb﹗
雖然有個光環，應該係耶穌，即是可以顯神蹟，但bb呢個動作真係唔係太符合佢年齡嘅大肌肉發展囉~^^”
美術館入面有個演講廳，應該係搞活動時用吧，小朋友發現張櫈個椅背可以挨低啲架~
行到時間差不多，我哋要出去搵食啦~
下晝去Gelato Museum，我哋book咗3點鐘嘅家庭體驗，唔可以搭唔到兩點嗰班巴士~
我哋搵咗一間叫做Burrito Zone嘅食墨西哥菜嘅鋪頭食嘢，因為係takeaway格局吧，睇落會快啲上到菜~
店員問我要唔要英文餐牌，乜我睇緊嗰個唔係英文咩？係喎，因為係墨西哥菜，睇落啲西班牙文好熟口面，唔覺得自己睇唔明，所以我話It’s ok~哈~
有凍嘢飲係咪醒神啲呀？
似乎呢度冇意大利餐廳咁正式，我好隨意咁好似係香港咁叫咗三份嚟share，份量唔會太多~
保守啲叫咗一個芝士漢堡包，另外兩個真正墨西哥菜，一個burrito，一個quesadilla，樣樣都幾好味，蔬菜夠多，我特別鍾意個捲裡餅面啲炒飯，好有飽足感~飲品方面，諗住試多幾款，爸曉組鍾意可樂，媽詩組鍾意檸檬味氣泡水，芒果汁冇人有興趣~
食完之後要加速步行返火車站啦，要趕巴士啦喂~
Pinacoteca nazionale di Bologna網站：
待續
前往其他歐洲旅遊blog
前往其他郵輪旅遊blog
前往其他意大利旅遊blog