舊年去台中跑咗人生嘅第一場半馬賽事，當然會考慮下會唔會跑一次全馬啦，當時train半馬我都覺得花得太多時間，心裏面盤算，或者到我10k跑到一個鐘之內先再算啦～但係當時已經諗，如果跑初馬，一定要去台灣跑，台灣會有好隆重嘅初馬獎座，好有紀念價值～
到咗報名今個秋冬賽事嘅季節，家姐提議去嘉義舉行嘅故宮南院馬拉松跑我哋嘅初馬~
呢場賽事特別適合初馬嘅原因，係因為賽事限時7小時，時間鬆動啲，心理壓力冇咁大～
（俾個reference大家，香港嘅渣馬全馬限時6小時）加上家姐話，佢想去呢個博物館好耐啦，而吸引我嘅，係以「肉形石」作為設計嘅完賽獎牌，同埋以「翠玉白菜」作為設計嘅初馬獎座，好得意啊～
肉形石完賽獎牌
好想要呢棵白菜﹗
好啦，七個鐘，行下跑下都完成到嘅～故宮南院馬拉松同上年去過嘅台中國際馬拉松一樣，都係經樂活報名網去報名，所以感覺好熟悉，對於要搵台灣朋友幫手付款已經唔再覺得驚訝，亦唔擔心領取選手包嘅問題～處理好報名手續，當然就係買機票、book酒店啦～
詩又大多一歲，今次我去多一日應該都得啦啩？上次係兩日一夜嘅超快閃，今次稍稍拉長到三日兩夜嘅一般快閃，星期五上晝帶埋行李返工，一放工就衝去機場，夜晚到台灣仲可以book間靚餐廳食下嘢添～
去就去三日，跑就跑七個鐘，訓練就係幾個月嘅時間，年頭跑完渣馬，之後幾個月嘅跑量就急劇下降，體能、耐力都要從頭train過～之前用跑步訓練app「Runna」感覺都唔錯，今次都繼續用，set咗一個星期跑三次，兩短一長，另加瑜伽同Pilates～如果Runna太睇得起你，訓練強度係會好高，高度吃不消，從而會有抗拒心理，我決定今次要以舒適、可接受嘅程度嚟訓練，點train我都唔會得獎啦，目標只係順利完賽，攞到棵白菜之嘛（忽然押韻）～weekdays嘅兩次跑介乎5km至7.5km之間，weekend嘅long run距離就慢慢遞增至最長嘅32km，係呀，冇㗎啦，嚟真嘅之前係唔會跑一次全馬㗎，因為以前跟過Runna，我決定相信佢到底～
天氣熱啲，我喺戶外跑步就好容易dur，所以夏天嗰幾個月都跑得多跑步機～另外，今年免費報咗虛擬跑步活動app Run2gether嘅「港景100」，係一個去位於全香港各區、總共100個地點打卡嘅活動，暑假期間帶詩出尖沙咀綵排芭蕾舞表演時，我就順道去各處跑下步打下卡～家姐佢哋一家今年因為個女鍾意Pokemon，佢哋打開返閑置咗好多年嘅Pokémon Go出嚟玩，我又跟住玩，跑下、捉下Pokemon、打下道館咁，跑起嚟態度比較鬆散～另外又買咗Switch嘅新遊戲卡帶，沉迷玩牧場物語玩咗一排，除咗堅持有跑步，瑜伽、Pilates都做少咗，直程完全冇做重訓～頭嗰兩三個月，感覺冇乜太大長進～
到天氣慢慢轉涼，多少少去戶外持續地跑，先慢慢有啲就嚟比賽嘅感覺～初馬前有兩次B Race，即是，係就係比賽，不過唔係我最重視嗰一場，分別係山賽「Fish N Sheep 28km」同埋香港街馬嘅半馬賽事，喺Fish N Sheep充分感受到，冇做重訓，上山時肌肉唔夠力～街馬原先都唔錯嘅，最弊係最後3k時急大大，花咗全身90%嘅力氣去忍，得返10%力可以繼續前進，最後基本上係行路返終點，真係好可惜，唔能夠喺全馬前測試一下自己真正嘅實力～
完咗街馬，之後就係de-loading，即是減跑量，準備期待已久嘅全馬比賽啦！！
前往其他台灣旅遊blog