19-4-2025：十人大隊上海遊day 3(part 3)·全員高效率移動、上海君瀾度假酒店、老上海餐廳經典上海菜

整個trip只決定包一程車，就係搬酒店呢一程，上午逛完溫室花園，午飯後直接上車，長輩們同小朋友們可以係車上瞓覺休息，車返到去白玉蘭酒店時，我哋幾個後生壯健嘅，就落車搬行李上車，再直接駛去靠近上海迪士尼樂園嘅新酒店——上海君瀾度假酒店～

啲細路呢？

here!

大家去到day 3，要休息休息啦，上車各人呼呼大睡，太好了！兩段路程加埋都要超過一個鐘，呢個安排大家應該坐得舒服啲～

去到啦！果然，上海同香港一樣都係寸金尺土，白玉蘭酒店位於早期嘅黃金地段，殘舊嘅大樓，細細間房，房價都唔平，呢邊新區，未發展到好旺，大大間房，新淨好多，房價反而更平，爺爺嫲嫲、姑媽佢哋，book咗兩人一房，房間有個小小前園，我哋住公主家庭套房，有角樓，可以容納晒我哋四個人~

上房稍為安頓，大家晚飯前可以自由活動~

我哋完美嘅房間combination就咁，兩張單人床…

加一張雙人床~

有埋浴缸就最開心喇~

三個細嘅小朋友嚟講就開心咯，先去室內嘅遊戲室跑呀玩呀跳呀，好在冇乜人哋啲細bb，佢哋可以自由啲~詩居然呢個時候流鼻血^^”平時雖然間中都流下鼻血，但千祈唔到滴啲鼻血落遊戲室入面呀~

室內遊戲室

佢哋玩遊戲室時，我同爸爸周圍explore下，發現有免費咖啡飲，原來做緊promotion，好似係推銷濾水器，總之like and share甚麼就可以免費飲咖啡，順便聽聽關於產品嘅講解~

免費飲咖啡

嗰部濾水器有埋製冰功能，都幾好丫，不過我哋個雪櫃已經可以自動製冰，呢啲咁大部嘅濾水器對我哋冇乜特別吸引力啦~

玩完室內，再戰戶外遊樂場~

有啲同香港唔同嘅設施，玩起嚟係開心啲~

有表姐係度仲大膽啲添~

最重要就係有buddies嘛~

好逼丫~

係呢個遊樂場，對於我嚟講印象最深刻嘅，一定係遇到一個嚟自蘇州，我好欣賞嘅男孩子~佢睇落大曉少少，我覺得唔尋常嘅係，只有佢自己一個人嚟玩~佢玩咗一陣坐低休息時我哋傾起上嚟，原來佢今日去完迪士尼返酒店了，佢同我哋分享去迪士尼嘅經歷，有咩心得同推薦，點解咁欣賞佢？因為佢只係大曉少少(12歲左右？)，但同陌生嘅成年人講嘢態度大大方方，有文有路，有自己主見得嚟又唔會好自我咁~總之當時嘅感想係，如果有一日曉帶嘅男朋友返嚟係咁嘅話，我應該會好鍾意XD

亦因為佢嘅意見，對於day 4去迪士尼嘅策略我哋有所調整，本身諗住唔好太早起身，聽咗佢嘅意見，決定搭最早嗰班酒店shuttle出發，多謝你呀，蘇州小男孩~一來對佢印象好好，二來今個trip之前爸爸去咗蘇州公幹一趟，佢都覺得蘇州地靈人傑，比起一線城市冇咁chur，雖然我以前都去過蘇州，但隔咗咁多年，令我都想再去體驗一下呢個城市~

姑媽話想食一餐正宗上海菜，我哋search下周圍有咩餐廳，發現步行距離有一間老上海餐廳，去美團睇睇有咩食，果然有經典菜式，爸爸就訂定個餐、訂定枱，晚上大伙兒一齊去食~

雖然話我哋呢間酒店「比較近迪士尼」，其實並唔係真係咁近，附近一帶唔太熱鬧，local人住嘅、開嘅鋪頭比較多，冇乜看頭，所以只係步行去餐廳而已~

老上海餐廳係間local小菜館，佢俾咗個VIP房我哋，其實就係一間獨立房，有冷氣，照理係幾好，但有一個嚴重問題，啲櫈非常「guit」﹗﹗即係大家個pat pat坐係自己張櫈上，稍稍移動，就會發出非常刺耳嘅「guit guit聲」，令人神經衰弱，笑死~其實真係好難控制嘛，平時冇聲，都唔會發現自己坐係度原來會郁咁多~

食物樣樣都好好味呀~除咗美團嗰餐，我哋再叫多幾個小菜，同啤一啤~本來見到美團有$1/支可樂，我哋見咁抵就order多幾支，結果老闆向我哋「求饒」，話咁樣搞法真係做唔住，哈哈，明嘅，下次唔好咁樣上架啦~