好多人專登係古寨食特色嘢，但我哋係糯干古寨時仲係好飽，點都食唔落~後來影埋櫻花，見時間差不多就諗住搵嘢食，我哋冇話特別要食咩，就打算途中見到咩適合就食咩啦~

原來條頸巾除咗可以保暖、變頭巾、做髮帶，仲可以做眼罩喎~

司機停低我哋係一間餐廳，見都有位，點知俾店家拒絕，因為佢哋做唔切，坐低都有排等，所以索性唔做我哋生意~後來去到另一間，冇直接拒絕，但都同我哋講會等好耐，咁都冇辦法啦，坐係度等，好過周圍搵啦~

小店家

飲杯茶，休息一下~

坐低觀察多一陣就明點解要等咁耐，因為根本得兩個人做嘢，一個落單、備料、上菜、收錢，另一個掌廚，而且佢哋習慣一次過上晒成枱叫嘅菜，所以煮晒三四樣先至下一張枱，我哋前面仲有三四枱，冇辦法啦，等下啦，好在廁所都ok乾淨，又有得坐，又有茶飲，仲有講明唔算呃~

菜式係簡簡單單嘅家常便飯，三餸一湯，印象最深刻係茶葉炒蛋，阿盆姐都有整過呀，茶葉味唔算特別濃，反而似係嫰嫰嘅菜葉~

茶葉炒蛋

蕃茄炒韮菜

酸笋炒牛肉

菇湯

味道樣樣都幾好，等咁耐都值得嘅~

之後去睇一棵蜂皇樹，話上面有幾十個蜂巢喎，而家呢個季節唔會見到啲蜜蜂出沒啦~佢哋扮蜜蜂，以防忘記咗張相影乜~

下晝去另一個古寨，叫翁基古寨~

翁基古寨依山而建，係村入面走動要上上落落，要小心睇清楚條路呀~本來一落車想去搵廁所(又)，但搵嚟搵去搵唔到公共廁所喎~呢個時候，唯有幫襯鋪頭再借廁所啦~呀，我想試罐罐烤奶茶呀，搵一間坐低飲茶(又)嚟借廁所啦~

我哋幫襯咗阿婆，佢個火爐、茶具、服裝都好有風味，大家輪流解放後就可以歎茶了，佢問我哋要幾多壺，要住一壺先啦~

原來一壺倒四個杯每人有兩三杯﹗﹗

大家發現咗個問題未？我哋明明嚟清空膀胱，但馬上又裝滿咗個膀胱了﹗﹗下次究竟要買咩飲品嚟爭取機會去廁所呢？所以一路飲一路都覺得爆笑~

翁基古寨印象最深刻嘅只有烤奶茶，其他已經唔記得了，應該都逛過少少鋪頭，影過少少相咁啦~

邊個扮孔雀扮得似啲？

返民宿前我哋去埋景邁山古茶林，免費入場，司機同我哋一齊落車行咗個圈，聽講個古茶林入面嘅茶樹屬於唔同嘅人，佢哋會自己入嚟打理、採茶~其中有棵叫做最古老嘅茶樹，大家埋去影下相咁，唔係好睇得出有咩特別~

呢棵好似唔係最古老嗰棵，不過好大棵，最老嗰棵又好似唔係最高嗰棵，anyway~

出到嚟，有啲小攤檔可以品茶買茶，司機問我哋要唔要飲茶，我哋即刻灑手擰頭，唔駛啦唔該，飲得太多，膀胱太脹，今日quota夠晒啦~

返到民宿，有舊嘅客人已check out，又有新嘅客人加入，大家正享用下午茶嘅烤肉同埋蕃薯，我哋又係食少少就好了~

晚餐試過一次，今晚大家冇咁緊張，亦expect到會發生咩事，既然尋晚唱過歌，今晚一定會再要唱啦，我同老公細細聲商量要唱咩，亦提早搵定歌詞同chord，免得到時急急忙忙~

今晚就唱<<The best is yet to come>>啦~

老闆請大家飲酒，佢拎咗啲珍藏出嚟，係酒精50度嘅烈酒，仲要非常慷慨地酙咗好大杯，我係飲慣酒姓胡嘅女兒，但50度真係太烈啦，完全火燒成個喉嚨+食道，試一啖就夠晒啦~

之後都係轉飲啤酒好了~

小朋友搵到自己嘅娛樂，剝剝剝瓜子﹗仲叫我幫佢哋影低佢哋嘅「戰利品」添~

返房瞓一覺，聽日我哋就落山出西雙版納，搭飛機返深圳啦，差不多到旅程嘅最尾了~

前往其他中國旅遊blog

Comments

comments