差不多算係旅程嘅最後一日了，因為今日會由景邁山落山，出番去西雙版納搭飛機返深圳，係深圳只係過一晚夜，第二朝就返香港嘅屋企啦~
一來車程長會悶，瞓覺都瞓唔到咁多，二來我亦唔甘心最後呢一日只係搭車冇嘢玩，我就問司機，途中有冇咩景點，最好有啲觀光農場可以摘菜摘水果返香港嗰啲~
好正式架，有民宿名印上去嘅早餐券~
民宿環境好雅緻~
食多一次湯麵早餐，我哋就返民宿執行李了~
已經了解到我哋間民宿係包羅萬有，叫做all inclusive都不為過，老公膽粗粗問有冇咖啡飲，老闆竟然準備咗啲勁嘢嚟招呼佢~我冇跟出去睇，聽講係有唔同咖啡豆揀，揀完再磨再沖咁，拎咗成壺返房慢慢飲~
我飲咖啡唔加糖都得，但一定要加奶，好在房間入面有牛奶，我用咁啲沖咖啡飲之後，其餘嘅俾啲女飲佢哋又好高興~
歎埋最後嘅雲海露台，我哋就要走啦~
同老闆娘合影一張，多謝招呼~
原來屋頂嘅呢個三葉標誌係茶葉嚟架~
九點半左右開車~我哋呢三日以來都係咁坐啦，爸坐前面，我哋三個坐後面~
好大霧﹗我哋係咪穿過緊個雲海呢？
大概搭咗一個半鐘，司機停低係我哋嘅第一站，參觀景真八角亭，可以鬆鬆腳、走動走動，睇乜都好~我哋當時只知係佛寺建築，其他又冇乜深究~吸引我哋嘅，係即榨蔗汁﹗
好清甜，yummy~
全靠影咗呢個招牌，先記得睇咗啲乜^^”
行上去入口
入場冇人賣飛，不過有建議香油錢，自行以微信支付，本著搵人倒垃圾、掃樹葉都要成本啦，我哋都掃咗碼俾錢入場，估唔到唔太多遊人嘅佛寺，都有好幾個攤檔，我哋揀咗幾個掛飾俾曉送俾朋友~
最搶眼嘅金輝煌大佛寺
大樹下有不同生肖嘅雕像，詩搵到佢嘅生肖—-雞~
其實都冇必要計下我幾多歲嘅~
孔雀浮雕彩繪
景真八角亭原來有好耐歷史，百度百科話，跟據傣文記載，八角亭搬過三次，第三次搬遷係傣曆1063年，對照我哋認識嘅曆法，係清朝康熙時期，亦即係1701年，咁即是興建比呢個年份更早啦~不過到咗1980年代，就由國家撥款係保持原貌嘅前提下修葺，變成今日嘅面貌~
呢個就係八角亭喇，見到曉嘅「八」同埋詩嘅「角」嗎？
我影女仔
爸爸影男仔
你哋兩個係人仔同牛仔？﹗
大概二十分鐘左右就逛完了~之後去食午餐~司機都有問我哋想食乜，我哋只係叫佢推介，佢帶咗我哋去食得獎人氣食店谷花烤雞~
店面都幾大，我哋坐上二樓，叫好嘢食去去洗手間，小朋友對呢度個廁所印象好深刻，因為入面有兩個踎廁位，冇一格格隔開，但又可以上鎖，即是話，我哋三母女入去，可以兩個人同時使用，冇私隱得嚟又好有私隱，都幾特別，哈~
之前都講過好幾次，唔知係咪因為雲南啲雞都係走地雞？全部都係運動選手？雞肉好有嚼勁，脂肪好少，同我哋平時食慣嘅肥雞唔一樣，而且炆、烤、煲湯等都經常出現烏雞，今次嘅谷花烤雞都可以揀黃雞同黑雞，我哋本來諗住每樣一隻，不過黃雞冇貨，咁就食住一隻黑雞先啦~
谷花烤雞
開餐﹗
umum…都係偏硬唔夠滑，調味粉係幾惹味嘅，不過都係香港/廣東啲雞好味啲~
但係呢間店出現咗一樣我哋估唔到，讚歎不絕，全個trip number 1嘅菜色﹗
就係呢個雞豆花，面頭係炸到鬆軟滑滑嘅蛋白，加蛋絲，裡面個湯係美味因子爆炸嘅濃厚雞湯，好味得不得了，大家飲到個肚脹卜卜，佢叫「雞豆花」，我哋改佢個名做「雲朵湯」，因為上面嘅蛋白就好似雲一樣軟，大家去到一定要試下﹗
另外其他菜式，包括菠蘿飯、老奶洋芋(中式薯蓉)、炒牛肝菌，樣樣都好味道﹗
菠蘿酒店嘅自助早餐同埋夜市都有見過呢個菠蘿飯，應該算係呢度嘅名物吧~
「中式薯蓉」
雲南嘅菇當然好出色啦~
食完出到嚟先知原來間鋪頭咁出名~
正好旁邊有一間零食店，我哋入去逛逛~
哇，原來所有零食都係按重量稱﹗﹗正喎，咁就樣樣都可以買好少嚟試~
戰利品
我究竟算唔算滿載而歸呢？買咗好多樣嘢，但又只係買咗好少錢~
跟住司機就帶我哋去果園啦~
前往其他中國旅遊blog