如果要講呢個trip點樣出現，首先要講下我開始跑步嘅歷史~除咗小朋友出世後嘅幾年懶啲之外，我一直都有運動習慣，但跑步真係同我一啲關係都冇，以前中學時每個學期一次要去屯門公園跑圈，係當年嘅惡夢，每年都會有人跑到嘔，個個跑唔慣好辛苦~之後我即使有固定去做gym，除咗上啲group class之外，自己踩機都只會踩elliptical同埋單車之類，跑步機我都好少掂~直至舊年五月，我哋一家同家姐一家一齊去參加咗Snoopy Run嘅1km障礙賽，先開啟咗我嘅跑步之旅~家姐之前都有玩過其他fun run，所以比較留意呢啲消息，舊年10月有個茶記為食跑，佢同我講起，我就俾啲完賽獎牌吸引咗，為咗嗰隻菠蘿包獎牌，我跑咗人生第一個10k比賽，以前真係估唔到自己會玩長跑~當茶記都未跑，就開始渣馬報名，我又好自然地報咗個10k，2023至2024先先後後跑咗幾個路跑同越野跑，進入咗呢個以前從來未知嘅領域~
當跑過本地比賽，你又關心呢個領域，你就會留意人哋去跑海外比賽，雖然冇乜實力，但我呢個旅行愛好者都好想試下跑海外比賽~跑過10k，就會諗，下次或者可以挑戰半馬？渣馬未有耐開始報名之際，呢個台中國際馬拉松嘅宣傳就feed咗俾我了，台中馬並非台灣出名嘅賽事，點解揀咗佢？因為睇個日期，十拿九穩唔會撞小朋友嘅考試，事關五月報名時仲未有新一學期嘅校曆表嘛~
報名方面都有少少唔太順利，雖然叫「國際馬拉松」，但付款方式非常「本地」，冇得網上用信用咭付款，總之最後勞煩咗家姐住係台灣個friend幫我哋去便利店俾錢啦~就咁，我哋就報咗我哋人生嘅初半馬賽事啦﹗
anyway，報咗名就要買機票book酒店啦，今次係小朋友出世之後，我第一次唔同佢哋一齊過夜，有兩個option，舉家一齊去，或者我同家姐兩個去~當小朋友返學要返full day，一齊去即係要星期五晚先可以出發，但賽事當天時間咁早，佢哋都好難、亦冇必要一齊去會場，結果都只會係得我同家姐兩個自己靜靜雞出門，而且四個人去機票成本大增，最後決定，兩個人去啦，而且為咗影響屋企嘅狀況少啲，公司又可以唔駛請假，就決定咗兩日一夜快閃之旅啦，唔返工去長多一兩日其實仲貴…星期六早機去、星期日晚機返，perfect呀~
book好機票、酒店，下一樣就係訓練啦，之前參加幾個10k，我嘅訓練都只係「大叔的跑」，即係冇理咩訓練方式，緦之有時間就跑啦嗰隻，今次想認真少少跟下programme練，我見人哋推薦跑步訓練App Runna，我就download嚟試下啦，好structural喎，可以輸入自己能力、可付出嘅時間、目標等等，然後會generate一個個人專屬訓練plan俾你，仲可以加入肌肉嘅strength訓練、每星期各一堂嘅yoga同pilates，就係咁，我就開展咗呢個23週嘅訓練計劃了，暑假去旅行時有偷懶幾個星期囉，忙嘅時候又會skip啲session囉~佢一直會根據我訓練時嘅表現，再adjust訓練強度，又會預算我嘅比賽成績，雖然我跑得唔快，但都清楚見到一日一日嘅進步，完成咗最長long run 22km訓練嗰一次後，我對於自己能夠完成半馬嘅信心大增，心情亦變得輕鬆了~下次不如再開一篇講訓練嘅過程啦~
intro講到呢度，下一篇要講出發啦~
前往其他台灣旅遊blog