對上一次同家姐兩個外出旅行，已經係2013年去泰國嗰次了，今次唔駛湊住啲細嘅應該輕鬆啲，但我又可能會好掛住佢哋，心情有啲忐忑不安~只係去兩日一夜，比起上次去曹公潭入camp嘅三日兩夜仲要短，行李應該好輕便吧，即使搭HK Express，我都完全冇考慮過行李額嘅問題，帶個背囊就夠晒啦~見家姐話帶個大啲嘅背囊，我專登去咗迪卡儂買咗個52L，出發前一晚正興高采烈pack緊啲嘢入去新背囊時，收到家姐提醒，我哋個機位冇手提行李額，只可以帶放櫈底嘅手提包一個，oh no no，咁即係52L背囊都大得滯，結果只係係平時出街嘅背囊之中揀咗一個最大嘅嚟用，嗚嗚…所有嘢都要考慮清楚先帶得啦~好小心咁執，連正常牙膏都唔敢帶，淨係帶咗支酒店嗰啲好似手指尾咁細嘅兒童牙膏，盡量減低行李嘅size，居然個背囊仲有位剩喎，輕輕鬆鬆仲好啦~
詩呢一兩日諗起我要出門兩日都有啲愁，間中都有喊下，好在佢都做咗心理準備好耐，到我出門口時都未至於太激動，後來聽爸爸講，兩姊妹係呢兩日表現都好出色，好乖~咁實在太好啦~出發當天曉要好早返去學校，我送佢上咗巴士我就搭機場巴士去機場了~
已經好多年冇行過自助通道，入禁區前嘅安檢我哋近年都排有人類主理嘅家庭隊，原來俾大人行嘅自助通道連證件都唔駛拎出嚟，就咁認你個樣就過到，真係大鄉里~
Trip.com送咗機場貴賓候機室嘅免費飛俾我，平時一家四口出去啲飛唔夠用，今次得兩個人，正好試下服務，所以我哋專登唔食早餐住，諗住去到候機室先食~一去到，wow，咁多人嘅？﹗居然要攞飛等位入場﹗﹗難怪咁疏爽咁送飛出去啦，根本唔係好矜貴嗰種，記得陀住曉去babymoon嗰次用Asiamiles換咗business class機票，可以用貴賓候機室，嗰陣都唔係咁嘅？見到要等咁多張飛，我哋直接走人，上去美食廣場食嘢算lu~
我哋食咗點心拼盤+粥，樣樣都幾好味，食得飽啲啱啦，去到台中settle down再食lunch應該都晏晏地了~
雖然未到十二月，但機場已經擺好聖誕裝飾lu~你睇我啲行李幾輕便~
指定動作~
好耐冇搭過HK Express，一上機見到啲咁薄嘅座位覺得好新奇，即刻要影低﹗﹗去沙巴時搭Air Asia明明都係廉航，都冇薄得咁誇張，印象中仲坐得幾舒服添~
我哋預備好出發啦~
HK Express冇機上娛樂，我專登出發前買咗電子書，要少行李嘛~我經博客來買咗東野圭吾嘅2024年新作<<你殺了誰>>上飛機睇，都幾好，可以揀書頁嘅底色、字體嘅大細，睇得好舒服，亦因為可以成本download定落嚟，又唔會太食電~除咗睇書，當然唔少得我每日必玩嘅手機遊戲<夢幻家園>啦~登咗機好耐都唔起飛，好在後來都冇話delay得太多~
見到台中啦~
降落後打開電話，就收到曉嘅錄音，佢早上代表學校去參加校際朗誦節嘅普通話集誦，佢哋嗰隊係14隊之中得到冠軍呀，叻叻~恭喜晒﹗「會不會，變成一朵蘑菇？」我淨係記得呢一句﹗
去到台中，我哋換好錢就搭的士去酒店啦，今次book咗位於西屯區嘅裕元花園酒店，本來停留咁短時間唔應該住間咁好嘅五星級酒店，我哋揀佢嘅原因就係，去馬拉松會場嘅shuttle就正正係呢度旁邊開出，要5am搭shuttle，住正隔離都好值得嘅~未夠鐘可以上到房，我哋雖然得好少行李，但都擺低兩個背囊先出去活動~睇下附近有咩好食先~
前往其他台灣旅遊blog