裕元花園酒店一行出嚟，就見到一間24小時麥當勞，咦，good wor，咁第二朝咪可以食個靚早餐先去跑？都係穩陣啲，過去近啲睇下，會唔會話咩明早休息之類嘅通告張貼出嚟，okok，冇話唔開門~
酒店對面就係中港轉運站，係咪馬拉松架shuttle就係嗰度搭呢？我哋向嗰邊行過去，睇下車站附近會唔會多啲食肆，家姐話今個trip嘅其中一個願望係想食牛肉麵，好似唔多覺眼
其實附近都唔太熱鬧，終於行多一小段路搵到一間叫做墨竹亭嘅食麵嘅小店~
我哋決定要全部share，咁先可以試多幾款食物嘛~
主食一份鮮蝦抄手燃麵，一份香豚麻醬拌麵，wow，個抄手麵好有驚喜呀，因為我好鍾意佢啲花椒嘅香氣，麻醬嗰個就普通啲~
另外叫咗兩個冷盤小菜，豆乾就正常好味啦，梅漬蘿蔔好清新~仲有清新版中華沙律任裝，正﹗我哋都夾咗幾次~餐飲我叫咗酸梅湯，始終已經午後，我唔想任何咖啡因影響我晚上嘅睡眠，始終第二朝要超早起去跑步嘛，家姐就冇有怕，專登唔叫飲品，留番quota去隔離咖啡店買咖啡~除咗食物驚喜之外，價錢都好驚喜，食咁多嘢都係TWD 324，太抵食了~
我唔知家姐杯咖啡好唔好飲，但嗰間鋪頭有得賣好精美嘅drip coffee，仲有超多選擇，我揀咗10款唔同嘅俾day同埋姨姨做手信~屋企太多嘢飲，到打blog呢一刻(隔咗一個半月)都未飲過晒呢~
今個trip主要係去跑步，但個短短的trip雖然只有兩日一夜，但我都係空檔安排咗啲「行程」，得兩個大人去玩原來可以好高效率，短短時間都做到好多嘢，難怪以前可以去旅行4日5日，因為帶住細路行動力大大降低，近年都覺得要一個星期以上先夠皮~
食完嘢嘅行程係去自行車文化探索館，因為時間唔多，基本上我哋今次幾乎所有移動都係靠Uber，台中冇地鐵，巴士太疏太慢了~Uber司機太概聽到我哋講廣東話，落車時問，你哋唔係過嚟台灣玩咩，點解係呢度(Giant集團的office)落車呢？原來連本地人都唔知呢度有個自行車文化探索館呢~入面都唔多人，可能係新景點？
除咗個別體驗活動可以影相之外，探索館入面唔影得相，我哋可以專心欣賞展覽~估唔到呢個唔太出名又偏僻嘅展館居然好精彩喎~入面由單車嘅歷史開始講起，當然有唔同時期嘅真古董單車展出啦，至以現金最新科技嘅競技公路單車、越野單車、休閒日用單車，又講解一啲單車設計上嘅力學原理，同埋碳板技術等，大開眼界~對於我唔係特別鍾意踩單車嚟講，點解咁有趣呢？因為我係漫畫「飆速宅男」嘅fans嘛~主角小野田本來踩一般淑女車返學(本身唔明點解男仔踩嘅都叫「淑女車」，睇展館先知原來有分送貨為主嘅「男車」同埋載人為主嘅「女車」)，後來被帶進公路單車嘅世界，到最近嘅回數又講到佢認識越野單車，所以一路睇展館，我就一路同家姐講阿主角點點點~
即使唔特別鍾意單車，展館都有好多可以親身參與嘅體驗，VR單車競速、試試越野單車嘅感覺、扮晒嘢影相之類，仲有啲示範單車設計嘅力學實驗可以試做，自己設計單車等等(好似Mario Kart自己有得揀零件咁)~
VR競速體驗，不過得我哋兩姐妹自己比，要控制速度都唔容易呢，而且chur盡嚟踩都幾攰~我估即使我咁鍾意睇單車漫畫，我都唔會去玩公路單車，一來怕危險啦，二來玩一陣都坐到pat pat痛~
我知屋企嗰兩隻實鍾意呢個VR專用衛生眼罩，專登帶咗返香港>v<
同著名單車手「影相」，合成得又幾真喎~
呢部係我設計嘅單車，感覺麻麻地^^”車架有啲怪~
越野單車體驗
好傻咁嘅樣…
出嚟效果都唔錯架，幾搞鬼~
畫畫畫
我架車上鏡了﹗原來睇唔到(卡通)我個樣~
展館內容太豐富，我哋玩到人哋關門先走呢~紀念品店入面啲嘢都好靚，但又未至於要帶番屋企嘅程度，我拎咗兩張空白嘅填色紙返去俾兩個女，而家佢哋嘅大作仲貼係雪櫃上面呀~
填問卷有貼紙送~又係帶俾女嘅紀念品﹗
楝building都設計得好靚~
走嘅時候個天都黑黑地，晚飯前我哋去多一個景點，下一篇blog見~
前往其他台灣旅遊blog