參觀完自行車文化探索館出嚟，距離晚飯預約時間仲有少少時間，按照計劃搭Uber去審計新村~聽到審計新村呢個名，完全唔會知係咩，其實係一個舊區活化嘅項目，以前係政府審計處職員嘅宿舍，後來冇再用嚟做宿舍之後荒廢多年，再活化成為今日嘅文化創意產業區，命名為審計新村~Uber司機話，咁晏仲去審計新村，收工lu bor，聽到時都驚驚地，落車行兩步，唔係丫，仲好熱鬧呀~市集嘅攤檔同鋪頭都未關門，區入面仲有live music演出添~

其實本身係book咗晚飯嘅餐廳，先再搵附近有咩地方去，先搵到審計新村出嚟，我哋周圍逛下先去食飯總冇錯啦~

影下審計新村個招牌先~

果然有好多靚靚攤檔，各種手作小玩意，袋、飾物、擺設、手機配件、衫…好似黃金海岸周末市集嘅大型版~

小伙子彈結他彈得好好，我專登錄咗一段俾day睇~

我係一間有門面嘅鋪頭買到手信俾啲女，一個柴柴磁石貼同埋香膏~講起香膏，大家當然係用手指頭嗰舊肉，輕輕打圈抹啲出嚟搽係身上面嘛，之前我哋有次一家四口又係去台灣旅行時，爸爸送咗香膏俾我哋三母女，曉大個少少識得點樣抹出嚟用，詩嗰陣仲好細個，用隻手指好似挖泥機咁樣大大舊香膏挖出嚟搽>v<，結果好快用晒勁唔開心，佢唔明點解同家姐一人一盒，點解自己嗰盒會咁快用完？﹗今次大個女唔會啦，慢慢用啦~

逛完市集慢慢行過去餐廳，仲有啲時間剩，我哋再逛下餐廳旁邊嗰間超大便利店，居然咁都有收穫，哈~買咗台灣風味嘅果酒，本來打算返酒店慢慢歎，結果食到飽得滯，我決定帶返香港，而家好似都未飲添~又買咗包煎荷包蛋味薯片，咁都得？

今晚book咗嘅晚餐，係米其林必比登推介嘅馨苑小料理西區店~

自從好耐年前試過去陽明山食過一次好正嘅套餐料理之後，每次去台灣，都好想再食一啲好精緻嘅set，對上一次去高雄墾丁，就去咗深山入面食咗個素食套餐(話時話，嗰次2023嘅blog到而家2025都未完成﹗)，今次都一早plan定要搵個精緻少少嘅地方食個套餐，就搵到呢間馨苑小料理，係米其林必比登推介餐廳嚟架，食嘅係台式套餐~

侍應帶咗我哋去坐一張高腳兩人枱度坐，我哋叫咗個倆人合菜，湯、主菜、甜品、飲品都可以揀，前菜、燙青菜同埋飯就一定會有嘅~

食物嚟到都靚靚嘅，自然為主，冇話好刻意咁擺盤，食落比較清淡，可以充份品嚐出食材嘅味道，但又冇話好驚喜，或者食到讚歎不絕咁，後來先見到張餐巾寫住「輕鬆吃台菜」，呀，明白啦，原來食落清淡輕盈先係馨苑小料理嘅賣點~又真喎，食咗好多嘢，好飽，但一啲膩嘅感覺都冇，好似返娘家或返老爺奶奶屋企時咁，好飽好滿足，但唔會食得辛苦~可能就係精緻少少嘅家常菜，大家先鍾意嚟吧~

果汁好fresh，好似係芭樂鳳梨汁，充滿台灣風味~

呢個小魚乾辣椒俾你配餐食，仲可以成樽買走，但對我嚟講太辣啦，試咗一啖就食唔到第二啖lu~

簡單燙青菜

芋頭糕

白飯都要post？因為菜單註明係關山米，家姐話關山米係出名嘅米嚟喎，佢之前唔知去台灣邊度旅行時有認識過呢種米~

炸豆腐

芋頭愛好者—-家姐揀嘅芋頭雞

酸白菜炒豬肉係店員介紹嘅，係幾好送飯~

食完兩個清清地嘅主菜，先突然發現呢張「輕鬆吃台菜」餐巾~

原來佢哋習慣食到八八九九先上個湯，我哋兩個湯一個係玉筍嫰鴨老火湯~

另一個係清燉菱角排骨湯，湯我就兩款都咁鍾意~

食埋最後嘅甜品紅豆糕就結束啦~

食完飽飽本來打算試下搭巴士，睇定Google Map嘅班次，點知等等下車又話誤點，結果又放棄咗，又Uber咗返酒店~

返去要盡快瞓覺啦，第二朝三點幾就要起身了，五點鐘上接駁巴士，又要預時間食早餐同搵架車，仲要check out酒店，都係鬆動啲好~

我哋住一晚嘅係裕元花園酒店，酒店房好靚好舒服，房嘅另一邊仲有張書枱同埋小偏廳，間房都幾大間~

浴室有浴缸，但趕住瞓覺，我都係快快脆脆沖完就去瞓覺啦~

前往其他台灣旅遊blog

Comments

comments