雖然話較咗三點幾鬧鐘，其實整晚都瞓得唔好，不停醒，可能又緊張比賽，又緊張起唔到身吧，以致出現一個奇怪現象，就係家姐明明遲過我瞓覺，我瞓咗之後佢先喺Facebook度post咗啲嘢，但居然佢一起身打開電話，我都未起身，已經like咗佢個post～
我哋輪住梳洗之後，要執埋行李預備check out，因為我哋跑完就唔再返嚟啦，book酒店時有問過延遲退房，我話我哋跑完馬拉松要沖涼先搭飛機返香港，當時酒店回覆話延遲退房要加錢，但就俾我哋跑完步返嚟免費用健身中心嘅沖涼設施，咁都幾好喎，不過我後來有更好嘅計劃，就決定唔留低行李喺度同埋唔返嚟沖涼啦～
打算去隔離24小時麥當勞食個暖粒粒早餐…
晴天霹靂，點解冇開門㗎？
居然臨時話要消毒清潔喎？！點算？呢啲咁嘅凌晨時分，如果要食嘢，恐怕只能夠去便利店，打開Google Map，好在最近嘅便利店都唔係太遠～
跑步要多啲能量嘛，我打算食啲有飯嘅嘢，家姐話佢一個飯團就夠，天氣凍，我想食熱熱地，見到有炒飯，竟然仲要係鼎泰豐嘅炒飯，我就揀咗，店員仲會幫你叮埋，配埋杯咖啡就完美喇！家姐食咗個飯團，發現有筍中式包，抵擋唔到誘惑食埋個包～結果我哋兩個都食得太多啦，開跑時好飽不特止，沿路補給真係好勁好多嘢食，其實早餐真係求其食少少都ok～
我哋喺便利店食完嘢之後，返過去酒店嗰邊搵比賽嘅shuttle，原來架車唔係停喺中港轉運站㗎，反而仲近酒店，根本就停喺酒店後門，我哋去到時都好多人上咗車啦～如果係台灣本地選手，佢哋一早領取咗選手包，已經有埋車飛，至於我哋去到現場先領取選手包嘅外地選手，我哋報名時預約埋shuttle接送，只要報上自己嘅姓名，就可以上車啦～
上咗shuttle安樂晒~
雖然時間好早，但路上竟然有少少塞車，我哋去到比預期晏咗啲，要快啲攞選手包同埋寄行李啦～
大家進入會場，你睇，有啲小朋友都好細個架咋，可能一家大細參加6km樂活組~
發現配速員們正在準備，紅色係全馬pacer，藍色係半馬pacer~
係香港比賽，計時晶片多數夾喺號碼布入面，原來今次嘅計時晶片係外置嘅，要自己綁喺鞋上面，賽事完畢之後會回收，咁又幾環保喎，要用嚟做紀念，淨係塊號碼布就夠啦！
我哋綁計時晶片喺鞋度唔熟手，搞咗好耐，個天又黑麻麻，變成開始光lu～
寄存行李嘅地方喺室內，一排排大大個嘅手挽袋整整齊齊咁排列好，原來台灣人跑馬拉松興用呢啲叫做衣保袋（衣物保管袋？）嘅手挽袋嚟寄存行李，今次嘅完賽禮物，都有一個衣保袋呀～
寄存好行李之後，都唔係太多時間剩低落嚟，開跑前最重要當然係去廁所啦，我哋冇為意，寄存行李嘅花舞館入面都有廁所，只知道流動廁所喺賽道起點嘅另一邊，當時，早我哋10分鐘起跑嘅全馬選手已經開始喺起點準備，我哋要兜去隊尾先過到對面去廁所，好在排隊唔算好長，令人感動嘅係，竟然大會安排咗一個清潔叔叔，stand by清潔廁所～話說2024年嘅渣打香港馬拉松係我第一次參加嘅大型賽事，嗰次起點嘅廁所真係令人好難忘，有舊x喺度，你都只能夠照去，唔通排過隔離條隊咩？重新再排過單止起跑會遲到，你亦唔能夠保證隔離個廁所會乾淨啲～
排隊去廁所，作最後準備~
終於我同家姐都去完廁所，距離開跑得返好少時間，我哋要小跑步去起點啦，順便熱埋身～進入起跑隊伍中間，只剩低十幾秒，跟住就出發囉！
雖然大會網站有顯示賽道地圖，但因為唔識啲地方，其實會跑去咩地方都冇乜概念～
一開跑冇幾多步就一條大斜路上橋，首段主要係好闊嘅公路，所以好多人聚埋一齊跑都唔會太迫～今次比賽真係好多補給站，都未需要飲水，2.5km已經出現咗第一個水站，我都意思意思飲咗少少水～
第一個補給站，對面跑緊嘅選手應該係遲我哋一個批次嘅13km挑戰組了~
後尾補給站啲食物同飲品種類多到數唔晒，水果有蘋果、菠蘿、西瓜、香蕉、橙、芭樂、蕃茄仔，小食有蛋糕、燒雞、燒豬、飯團、薯條、薯片、餅乾，飲品有水、寶礦力、汽水，最驚訝嘅係，竟然未跑完，13km已經有得飲啤酒，仲要有個啤酒女郎斟俾你，因為仲要跑，我淨係敢飲細細啖咋～
至於路段方面，跑跑下就去咗一啲鄉村地方…
之後仲上咗山添，而家睇返個地圖，原來由5k至8k左右由200m攀升到350m，難怪不停上斜，斜到好似越野跑咁，我感到自豪嘅係，我真係冇行過路㗎，除咗喺補給站停低飲嘢食嘢之外，即使唔快都好，一直都keep住跑～
跑跑下時覺得呢個長庚橋應該係一個當地地標，唔理咁多，影咗先算~
大會有安排配速員，我預計自己完賽時間大約係2:20至2:30之間，所以唔好慢過2:30嘅配速員就ok，我發現佢哋唔係均速跑，次次都係我喺補給站飲完嘢之後，佢哋就會從後趕上，一枝箭咁樣追過我，到下一次補給站後，佢哋又喺我後面趕過嚟～
成條路線有各種唔同嘅風景，山、河、鄉、橋、隧道、樹⋯平時自己練跑，總會邊聽歌邊跑，為咗今個比賽，我仲download定振奮人心嘅3小時歌單，不過聽家姐講，佢會唔聽歌，話要好好感受下呢個城市，我又覺得好有道理喎，所以今次係我第一次跑半馬完全冇聽音樂～見到靚嘅風景，仲邊跑邊影相添！
有山有水
令人鼓舞嘅告示
早餐食得太飽，所以係補給站都冇話食好多嘢，我只食過蘋果、菠蘿，飲過啤酒、可樂、寶礦力同水咋~個肚一直漲卜卜~
我話有啤酒女郎斟啤酒，家姐話，乜有咩，斟俾我嗰個係大嬸喎，原來影相我都冇影到個美女，冇圖冇真相…嗚嗚…
舒服嘅林蔭大道，其實係單車徑嘅一部份，係度踩單車都好舒服啊~
多謝專業攝影師嘅照片﹗﹗因為今次去到現場先拎選手包，冇得著大會紀念tee，所以準備咗一套自己衫去跑，我揀嘅係近排著得最舒服嘅A餐，估唔到呢套顏色咁sharp嘅運動衫有多一個好處，就係影相好靚，而且係好多人之中好容易突出自己出嚟呀~
見到攝影師記得擺pose管理好表情先有靚相~
上橋
哇，有少少太魯閣嘅感覺，好靚啊~
自拍一張，不過睇唔到風景…
攝影師都覺得呢度好靚，所以係度影每一位參賽者~
啲相影得太好，好辛苦先忍住手唔好買咁多張~
我以一個可以長距離都唔辛苦嘅配速嚟跑，除咗不停上斜一段比較辛苦之外，其他都還好～
最辛苦一段，應該係差唔多到尾嘅9號隧道嗰段，有啖痰喺個喉嚨度，咳又咳唔出，吞又吞唔落，唞每啖氣都係個喉嚨度又上又落咁，可能因為隧道入面空氣冇咁流通，所以有啲辛苦啦，一出返去戶外，即刻舒服好多～
今個賽事有全馬組、半馬組、13km挑戰組、同埋6km樂活組，每組出發時間相隔10分鐘～全馬組喺我哋前面出發，跑咗冇耐就同半馬組分道揚鑣，13km挑戰組喺我哋後面出發，所以初段有啲快嘅13km參賽者會喺後面追過我哋呢啲唔算特別快嘅半馬參加者，不過後來路線唔同跑跑下就唔會見到佢哋，至於6km樂活組，初段沿路折返時，佢哋喺對面線，男女老友齊齊參加，甚至有人推住BB車參加，因為6km樂活組限時6個鐘，基本上冇可能完成唔到，呢個活動真係與眾同樂～即使係半馬，門檻都唔高，限時3個半鐘，比起香港渣馬限時3小時鬆動得多！13km飲啤酒嗰個位，就係同全馬組會合路線嘅位置，去到隧道時，就見返啲13km挑戰組嘅參加者，當然係比較慢嘅13km參加者啦，快嗰啲一早跑完啦！
可能因為手錶用GPS定位，計嘅係地圖上嘅移動距離，冇計到上落斜增加咗嘅距離，所以最後我個錶計算都唔夠21.1km，唔知點解，突然間就到衝線啦～
衝線嗰一刻都好印象難忘，因為號碼布上面印咗我嘅中文全名，所以衝線時聽到MC對住個咪興奮地講：「加油呀！胡暐！恭喜你！」
即時成績
跑完就結束了？下一篇我再同大家介紹好似嘉年華會一樣嘅會場，仲有我哋啲完賽禮物呀~
前往其他台灣旅遊blog