衝線之後首先有大會義工派發樽裝水同埋罐裝寶礦力，再拎埋完賽獎牌，好快我就見到比我早到咗終點嘅家姐～
朝早嚟到時個天仲黑麻麻，搵到自己需要搵嘅booth就冇乜理到其他，而家先知道，原來各個帳篷都有唔同嘅功能～
我哋首先跟住人哋排隊攞完賽證書，好犀利呀，嘟一嘟你號碼布上面個code，旁邊部printer就即刻印你張cert出嚟，仲要已經有埋成績同埋排名～
好勁﹗即時print埋成績排名﹗半馬2:24:30唔算得啲咩突出嘅成績，以第一次跑嚟講我都好滿意啦，而且同我嘅training app嘅預測差不多~
拎住張cert牌隔離嗰條隊，交出計時晶片、成績單同埋獎牌，佢就即刻幫你刻名同埋完賽時間喺個獎牌上面~
呢個獎牌特別珍貴呀，係唯一一個有我個名喺上面嘅跑步獎牌﹗不過我估下次如果再去台灣跑，應該都有類似嘅服務～
yeah~
之後再去領取完賽禮物，一個大大嘅衣保袋，入面仲有啲贊助商禮物之類，正好放晒啲嘢入去～
我要特別介紹我報名時，額外加錢買，刻咗名嘅「初半馬獎座」，人可以跑好多次全馬半馬10k，但初馬、初半馬都只有一次，雖然個獎座個設計有少少娘，我都非常興致勃勃地要訂購，而家我個獎座放咗喺屋企我啲女嘅獎盃旁邊，好威水㗎～
精美盒子
設計雖然…umum…我初半馬挑戰成功呀﹗我個銜頭係「胡暐跑友」，哈哈~
兩姊妹一齊完成初半馬，別具意義~
已經攞咗一大堆嘢，仲未完呀，仲有食嗰啲，報名參加時已經知道有完賽飯盒，可以揀葷或者素嘅飯盒~
我個葷飯盒都好多餸喎，有雞髀有蛋有香腸又豆，真係大大地補充能量同埋蛋白質！比起飯盒，我更加鍾意可以無限追加嘅綠豆沙，竟然可以保持冰凍，正呀！
雖然唔係好餓，個飯盒都帶唔走，我哋都決定坐低休息下，食埋個飯盒～
美味綠豆沙~
食飽飽再⋯ shopping！會場有好多賣嘢嘅booth，當然大多數都係賣跑步用品，一場嚟到咁難得，睇下有冇嘢啱買～我同家姐一人揀咗一件跑步背心，我買咗一頂cap帽，不過返嚟香港咁耐，天氣凍咗，件背心一直都未着過啊呀，希望跑渣馬嗰日天氣暖啲，可以着件咁sharp咁靚嘅跑步衫去跑，到時睇相認自己個樣就容易好多啦～
好啦，我哋都要走啦，返去攞返啲行李，換套乾淨衫，出返去市區，去今日下晝嘅另一個重點項目——浸溫泉！！！yeah～話說我哋今日執咗好多次行李，離開酒店前執咗第一次，拎咗選手包，準備要寄行李前簡單執一次，跑完步，多咗好多嘢，換好衫，又執一次~之後仲會再執多兩次﹗
台灣人真係好貼心﹗﹗會場竟然安排咗流動浴室﹗﹗部份浴室仲要有提供熱水添呀~
本身想搭返shuttle出返去中港轉運站，再call車去溫泉，點知去到個站啱啱走咗架車～試下直接call Uber又call唔到，好啦，改變策略，改搭前往后里車站嘅免費shuttle，我哋可以搭local train返去台中市區，在call Uber上山入面嘅溫泉～
去到車站買好飛，啱啱走咗架火車，都要再等好耐先有車呀，但都嚟到咯，跑完步隻腳又郁唔到，坐喺月台度篤下電話休息下等車啦～等車時有段小插曲，明明我哋都係外地人，居然有一班講國語嘅外籍人士問我哋，知唔知係咪呢個月台等火車去台中，我哋都只能夠答「應該係」，其實我哋都係第一次嚟呢度咋～
我哋成功喺后里車站上車，研究一下地圖之後，決定喺潭子車站落車call Uber，睇嚟咁樣去我哋嘅目的地——日光溫泉會館，應該比較節省時間～好啦，我哋沖個靚涼，浸完溫泉就會煥然一新㗎啦！
前往其他台灣旅遊blog