跑完步，仲有一整個下午時間，先搭飛機返香港，去邊度好呢？跑完半馬，對腳已經唔係好郁到，去邊度都咁攰，諗到可以去浸溫泉，要學下邱曉嗰句：「我覺得我自己真係好聰明呀！」search下台中有邊度浸溫泉，就搵到呢間日光溫泉會館，其實我見到Klook有連餐飲嘅package，本來都好有興趣，但係怕跑完步啲時間唔知點，所以冇買定，寧願去到真係想食，先再另外俾錢啦，好在係咁咋，估唔到跑完步會食到咁飽，浸完溫泉都未餓到要即刻食嘢～
潭子站落車，直接call Uber去溫泉會館，好在係Uber而唔係搭的士咋，山入面啲路有啲複雜，而且都有啲塞車，搭Uber都搭咗好耐，搭的士唔知會跳錶跳到幾多錢～
日光溫泉會館其實係一間溫泉酒店，有過夜嘅客人，亦都招呼我哋呢啲即日去浸溫泉即日走嘅客人，現場俾錢比Klook貴少少，先一日冇買定，當天冇得買喇～
日光溫泉會館有着泳衣浸嘅戶外溫泉，亦都有好似日本咁樣分男湯女湯嘅裸湯部份，裸湯有年齡限制，帶住小朋友we we wa wa嘈嘈共就只准浸戶外，我哋今次兩個大人去，梗係室內戶外都全部浸晒啦！知道戶外着泳衣浸溫泉要戴泳帽，我專登喺屋企摷咗一頂，唔知係大人定小朋友嘅泳帽出嚟，總之笠得住個頭啦，家姐冇帶，唯有幫溫泉嗰邊買啦～
呢個溫泉都唔錯，除咗有唔同溫度嘅池之外，仲有各種照顧唔同身體部位嘅水柱按摩，啱晒我哋跑完步去放鬆全身嘅肌肉～戶外嘅溫泉設施上其實大同小異，係多多一兩款水柱按摩囉～可能我哋去嘅時間，先一晚嘅人退咗房，入住嘅人又未到，所以無論係裸湯定係戶外池，人都唔算多，幾舒服～
浸完溫泉成個人煥然一新﹗舒服晒~肌肉痛都冇埋~
今次浸溫泉嘅日光溫泉會館~我哋嘅day 2行裝就係咁，一個背囊、一個大大衣保袋、一個小斜揹袋，都係唔太適合周圍走~
結果我哋冇留喺溫泉會館食嘢，一來唔算太餓，食自助餐會太多，二來家姐今個台灣trip仲有一樣嘢未做，佢話想食一次台灣牛肉麵喎～疫情前2019年，我同老公兩個女嚟台中嗰次，食過好出名嘅宮原眼科大大雪糕，我好想帶家姐去食一次，所以我哋搵下宮原眼科附近，邊度有得食牛肉麵，就直接搭車過去啦～
叫咗一人一碗牛肉麵，再share一啲冷盤小食，樣樣味道都唔錯喎！
口味唔會太強烈嘅牛肉麵，可以成日食都得嗰種~
冷盤小食
飲啖熱湯~
食完嘢，步行過去宮原眼科路上，經過一間手信店，買咗啲糕餅返香港～我哋嚟嘅時候，只係一人一個輕巧嘅背囊，跑完步領取咗個大大衣保袋、獎杯、同埋其他紀念品，已經知道，我哋肯定要寄一件行李先搞得掂，買嘢都唔使顧忌咁多啦！所以我哋兩個，係有少少狼狽咁去買雪糕～
隔咗咁多年，宮原眼科仲係咁多客人喎，排隊買雪糕排到出門口﹗
仲有個職員一早俾定個餐牌你，揀下食咩雪糕～
因為中華棒球隊表現優秀，店家仲做緊大優惠，買兩球雪糕送多一「球」俾顧客，再加埋俾你試新口味嘅一小匙羹，我哋總共有四款口味呀！
同以前一樣，冇令人失望，一樣係有咁多口味選擇~
足以令人scream一下的ice-cream~
宮原眼科嘅雪糕，最大嘅亮點，除咗係可以揀嘅雪糕口味特別多之外，仲可以揀啲小食糕餅放喺你個雪糕上面，又好味又靚～
外面嘅綠川，有種首爾清溪川嘅感覺~
我哋坐出去綠川邊，放低啲大包小包，慢慢歎個雪糕~唔知當年係咪未整好呢啲長櫈呢？點解有個印象當年要企係度食咁可憐嘅？
2019的宮原眼科雪糕~(請參閱：7-10-2019：忙裡偷閒台中小旅行day 4(part 2)．宮原眼科繽紛雪糕、byebye台中)
食完雪糕，又係執行李嘅時間，我哋要決定邊啲寄邊啲跟身，寄艙最安全當然係衫啦，我哋盡量將啲衫放入個台中馬衣保袋，同時又要好清楚地分開我同家姐啲嘢，以便返到香港盡快分番~珍貴嘅初半馬獎座同啲會碎嘅手信、食物就跟身啦~
差不多時間要call車去機場，架Uber仲有幾分鐘先嚟，正好入去宮原眼科手信店嘅部份作最後血拼，雪糕入面個朱古力雪球好好味，我哋決定要買一盒返去同大家分享~
裡面好靚，其實可以慢慢影下靚相，不過今次時間太趕，嘢又有啲多，所以僅此一張~
話說我哋嘅「隨身行李」只可以係一個背包嘅size，而且只得一件，suppose要塞得落前面嘅櫈底，所以登機嗰一剎那，連個小小的斜肩小袋子都要塞埋落背包，家姐話，咁對鞋放落鞋袋，勾埋上去個背包度，當係同一件，著得上身嘅外套就著上身，進一步縮細件行李~
外置鞋袋
臨時加行李額真係好貴，肉隨砧板上，冇辦法啦，當初太小看啲跑馬紀念品~
嚟到台中機場，旅程接近尾聲啦~
候機室有得睇書，我睇咗好多本繪本﹗
回程時俾咗個緊急逃生位俾我哋，好處係個位闊落啲，對於我短腳嚟講，其實闊同窄分別都唔太大，反正都伸得長對腳~航空公司地勤職員話，萬一有意外發生時，我哋要協助其他乘客，所以坐呢個位嘅條件係要識英文喎，但登機後有個空中服務員嚟同我哋講解我哋嘅職責，佢解說嘅速度係為講而講囉，快到識英文都唔知佢講乜^^”
我哋呢件又細，寄起嚟又貴嘅小小寄艙行李到咗啦~
食咗late lunch牛肉麵+大大雪糕，我哋冇食正式晚餐，係手信店買咗個餅，諗住肚餓食，結果到落機都未需要食住，抵港後，上咗的士後就開始肚餓了，臨返到屋企前叫老公煮定個米粉俾我，今次嘅台灣快閃之旅就結束啦~
下年我都想去一轉海外馬呀~以我嘅速度嚟講我暫時唔想挑戰全馬，練習花太多時間了，到年中要物色一下有邊個天氣舒服、風景靚、又唔撞考試時間嘅海外半馬﹗yeah~
台中國際馬拉松快閃之旅完滿結束
前往其他台灣旅遊blog