2020年初疫情封關，2022年底重新可以去旅行，估唔到我哋到2024年年尾先第一次去日本﹗上一次去日本已經係曉一歲幾時去嘅北海道，嗰陣詩都未出世，本來2020年暑假已經買咗機票諗住去日本，順便睇奧運，點知疫情緣故去唔到，好在嗰陣有得退票，疫情後已經去過好多個旅行：韓國、台灣、沙巴、福建、歐洲，竟然都未去過日本，最主要原因係一直都仲覺得啲機票太貴，yen平？所以之前未有計劃去日本嘅時候，已經兌定啲yen係銀行戶口囉~當搵下聖誕假期嘅目的地時，發現日本啲機票價已經落番去合理水平，好啦gogogo﹗
點解去熊本？其實咁耐冇去日本，講真，我去邊度都冇所謂，去日本一定好玩，啲女冇話特別想去睇雪玩雪，所以範圍可以擴大至九州都得，我search嘅criteria係，因為兩年冇係香港過聖誕節了，我要聖誕節後先出發，然後要趕得切返嚟1月1號同公公慶祝生日，係呢個條件之下，綜合機票最平、飛行時間最好，就定咗去熊本啦﹗
我好多年前有去過九州，所以我都唔特別需要去阿蘇火山、別府溫泉等地方，老公鍾意玩得悠閒啲，所以今次只留係熊本縣~我去日本只有一個要求，就係要住溫泉旅館浸溫泉，食一泊二食嗰啲日式全餐，咁就滿足到心願了~
day 1：香港飛熊本，住熊本市
day 2：熊本市內遊，往菊池溫泉，住溫泉旅館
day 3：菊池市，住溫泉旅館
day 4：返回熊本市再前往天草，Glamping
day 5：遊天草，返回熊本市，住熊本市
day 6：熊本市內遊，返回香港
今次搭輕輕鬆鬆嘅中午機，係屋企食早餐盡量清晒雪櫃啲嘢，所以炒咗堆菇，又好健康咁食咗啲藍莓，放得耐嘅洋葱、蘋果、柑就等我哋返嚟香港啦~執埋最後少少行李就出門口，一心諗住飛機時間唔太早可以搭巴士去機場，結果又係mi mi mo mo變成call車~
搭香港航空check in都要排長龍，所以搞掂手續，去到登機閘口都冇乜多餘時間了~
11月同家姐去台中跑步時都有影過同一棵聖誕樹呀﹗
曉個姿勢咁model嘅？^^”
快快手手影埋指定動作嘅相就差不多要上機啦~
香港航空冇機上娯樂，三個幾鐘頭嘅飛行時間要自己娛樂自己啦~之前買咗個type C轉3.5mm插頭，諗住俾佢哋用ipad時可以用傳統耳機嚟聽，點知唔work，結果搭飛機時都係我借咗對air pods俾佢哋用，兩個自己安安靜靜睇電影，因為Moanna出第二集，所以佢哋專登係Disney+ download定第一集嚟睇，我冇耳機用，之前download咗一堆劇集冇得睇，咁我專心打機啦﹗薩爾達傳說智慧的再現我已經玩到七七八八，明明已經可以去打終極boss，因為一直都有啲驚而逃避，最近都係做下迷你任務呀，搞下呢搞下路，既然搭飛機搭咁耐，就解決咗個boss啦~不過冇開到聲音感覺係差少少，投入度低啲，因為打boss時係我—-薩爾達公主，同劍士林克合作，而今次林克係唔會死嘅，我只要避開攻擊、又間中飲下補給，捱下捱下始終會贏嘅，我就係係呢程飛機時打爆機啦~yeah~
未打開得枱面前，食下零食解下悶~爸爸呢？因為係3-3座位嘅細機，爸爸係走廊另一邊呀~
以後對香港航空嘅飛機餐真係要提高警覺，機票資料寫係供應snack，究竟係點樣程度嘅snack呢？原來只係得一個熱包同一杯飲品，比之前搭過廈門航空好嘅係，個包暖笠笠，同埋都幾好味嘅，去程係雲耳肉包，返嚟時係紅豆包，同埋除咗水之外都有果汁汽水咖啡茶飲囉，比起只係「維持生命」，都叫做有少少「享受」，不過最大問題係，真係好唔夠飽丫﹗﹗好在學校同教會都開完party，屋企有大量零食，我哋都執咗一大堆帶上飛機~
邊食包邊睇電影嘅曉，詩當時有少少抱怨「點解係包？點解唔係飯？」
睇完電影曉做下功課，詩畫下遊記，跟住再食下零食，咁就差不多到啦~
等行李時我帶兩個女去廁所，曉出現咗第一個讚歎，因為個廁所板好暖﹗﹗以前應該都有坐過呢啲廁所板啦，不過日本嗰啲真係特別暖，可能又因為天氣凍吧~日本呢幾日我哋成日都討論同讚賞日本啲廁所，因為上一個trip去完歐洲返來吧？歐洲啲廁所一係就收費，一係就要幫襯間鋪頭先有得去，仲要唔包乾淨，1歐羅係常態，威尼斯有個廁所好似要1.5歐，俾錢仲要方便到可以碌咭[x__x]~去日本當然冇廁所要收費啦，幾乎所有去過嘅廁所都有暖暖洗pat pat廁板，仲要冇乜幾可去廁所要排隊添~
Welcome to Kumamoto﹗佢哋兩個扮緊熊本熊對耳朵呀~
我哋扮緊邊個呢？
買票搭車出市區啦，都要搭一個鐘以上呢~我哋行出戶外，感受下天氣先，天氣預報around 0-10度左右，我哋日間活動時大多6-10度之間，究竟實際上凍唔凍呢？一出去時覺得，咦，都唔係幾凍咋喎，睇嚟唔一定要著羽絨都得~隔多一陣，呀唔係，都幾凍喎，真係要著羽絨喎﹗往後嗰幾日我著ultra warm底衫、衛衣、短羽絨、厚長褲就夠晒暖，小朋友就加多一件背心，可能佢哋對波鞋係網網透氣款真係凍啲？反而曉今次最經常嗌凍~
買好飛了﹗
第一架巴士嚟到，都未坐滿人，但因為行李櫃爆滿，巴士都照開出了，我哋都有啲擔心下一班要隔好耐先有得搭，日本人待客之道果然唔係咁，馬上第二班就嚟到啦~職員會問你準備邊度落車，原來係安排邊件行李放入啲，邊件放出啲，因為去到市區之後，就得番司機一個協助乘客取回行李啦~
熊本機場附近大多數都係田地，唔識睇種咗啲咩呢~
既然係飛機度冇瞓覺，我都估到結果係會變成咁啦~
我雖然都攰，但又周圍望下嘢，又search下旅程嘅資料，結果都冇瞓~太陽開始落山，開始出現市區咁嘅建築物，去到熊本站落車時已經天黑lu~
前往其他日本旅遊blog