第一晚我哋住熊本站旁邊嘅One Station熊本(原本叫The New飯店熊本，我都係訂房之後，12月初時收到e-mail話酒店改咗名，呢一刻Google Map都仲係顯示舊名呢)，落巴士行過去推住行李應該要2-3分鐘，兩手fing fing行恐怕係1分鐘距離，非常方便﹗
因為新裝修吧，酒店大堂好靚，房間都係裝修得似最近嘅設計，但有兩件事暴露咗佢嘅歷史，一樣係用傳統金屬鎖匙開房門，另一樣係浴室嘅格局比較舊式，我哋都住得好滿意~
舒適嘅房間
咁先影到第三張床呀﹗
因為我book咗嘅家庭房原來有兩張雙人床同一張單人床，我哋可以瞓得好鬆動，另外，只要有浴缸可以浸浴，兩個小朋友就會好滿意，第二朝嘅早餐都幾好添呀~
我哋稍稍settle down就再出去了，對於晚餐嚟講，時間其實有少少早，但我哋個午餐(只有一個小包嘅飛機餐)實在太少了，大家都好肚餓啦~不過去安心食飯之前，有一件好重要嘅事要做咗先，我去請櫃枱職員幫我打個電話去第二晚住嘅溫泉旅館confirm一下booking~話說我平時book酒店多數用Trip.com、Agoda之類嘅訂房網站，但記憶中日本book溫泉酒店係有好多選項，例如揀食咩菜單，另外，小朋友嘅年齡唔同，選擇要唔要餐點，收費亦唔同，所以我溫泉旅館同glamping都去咗官網book，令我唔安心嘅係，去官網輸入咗一堆資料之後，馬上就收到一個自動回覆嘅確認電郵，除此之外，再冇人類e-mail你或打電話俾你跟進booking，而且一啲訂金都冇話要俾，感覺唔太安樂，好怕長途跋涉去到，話原來冇booking或者出現啲咩問題~真係要好多謝熊本One Station呢位小姐幫我哋做呢件我自己做唔到嘅事(呢間溫泉旅館係冇人識英文嘅，之後嘅blog就會提到究竟我哋係點溝通)，其實佢對自己英文都唔係太有信心，幫我處理呢件事時一直同啲翻譯app嚟確保冇同我溝通錯誤(後來發現翻譯app其實係好有問題嘅^^”)，總之佢幫我confirm咗booking，令我可以好安心咁期待去浸溫泉啦~
我(後面矮小黑色人)同櫃枱小姐溝通緊
外面個天已經黑晒，又凍又餓，我哋決定去熊本站旁邊嘅Amu Plaza解決晚餐~入到去商場先知，原來我哋最尾嗰晚住嘅The Blossom酒店就正正係Amu Plaza嘅最頂嗰幾層呢，所以後來去入住時就熟晒架步啦~
Amu Plaza都好大，一樓至五樓主要賣時尚精品衫褲鞋襪嗰啲，六樓有美食廣場，我哋去咗七樓嘅餐廳樓層搵食~太多人又要排隊，太少人又驚佢唔好食，冇理由第一日就食中式、韓式或者印度式嘛，天氣凍大家唔想食生魚片，最後揀咗呢間食日式定食嘅鋪頭~
等食中…
第一餐就開始發現，原來日本人咁凍天氣都鍾意飲冰水呢，去到大部份餐廳都係俾冰水你飲，連溫泉旅館食飯時都係~
我哋繼續秉承「全部share」嘅精神，叫咗三份餐，有飯有麵有豬扒有鴨肉有天婦羅，其實餐牌中最吸引我嘅係跟麵上嘅山藥泥，但送到嚟又唔係好知應該要點樣食先啱~
我哋日本嘅第一餐
睇下搵唔搵得番我哋食嗰幾個餐先~
可能大家太肚餓，食光光之後好似仲係唔係太飽，正好造就之後可以食多餐~
唔甘心day 1只係食咗個晚餐就結束，我哋係商場行咗陣街~
Amu Plaza又見到佢﹗
係日本當然見到好多好靚嘅精品啦，不過只係第一日，之後仲要搬咁多次酒店，都唔係好敢買嘢住，何況最尾嗰日都會返嚟同一個地方，所以都好節制~
仲要cross over One Piece添﹗
令我打開荷包嘅係書店﹗書店好好睇，我哋各人搵到自己嘅寶貝~
啡啡搵到我同爸爸都鍾意嘅東野圭吾作品~
彩虹魚搵到爸爸鍾意嘅programming嘢~
我搵到我鍾意嘅飆速宅男漫畫呀﹗原來日文嘅單行本出到九十幾期了﹗可惜中港澳台唔夠受歡迎，新啲嘅期數冇中文版賣，連網上流傳嘅翻譯版本都冇咁新~
買咗本好靚嘅摺紙書，教摺好多唔同嘅小動物~另外令我哋三母女哇哇聲嘅係，居然有我哋鍾意嘅繪本野貓軍團同埋殼斗村的幼兒園嘅襪呀﹗驟眼睇唔係好分到應該係大人size定中童size，唔理了，買咗返去，我哋三母女邊個啱著就屬於邊個啦~我哋居然逛書店逛到關門…然後轉戰超級市場﹗
本身晚餐冇話食得好飽，點我都諗住買啲水果，我哋買咗叫做夢未來嘅熊本產柑，又買咗一pack中等價位嘅士多啤梨，爸爸除咗揀咗兩個布甸之外，竟然買咗一盒沙律菜今晚食~
離開商場時兩個話好凍好凍好凍，我哋去便利店買咗暖笠笠罐裝粟米湯~
好溫暖
可能因為日本天氣凍吧，後來幾日凍到震時都幫襯過啲自動販賣機，啲機同時供應凍飲同熱飲，而熱飲選擇都多喎~
職業病發作，爸爸話要影冷氣機~
返到酒店房就再開餐﹗﹗
士多啤梨同夢未來都好甜好好味~兩個布甸明明一樣牌子，但個蓋唔同食喎，我哋又唔識日文，究竟有咩分別呢？食落就知道了﹗第一杯食落去，唔，中規中矩啦，第二杯，wow，食到即刻笑咪咪，分到了，第二杯係全脂，所以咁好味﹗﹗第一杯係低脂>v<，所以淡啲~
One Station熊本嘅浴缸比較細，但餓過好耐冇浸浴嘅大家都浸得好開心，之後幾晚就浸得更暢快了~
前往其他日本旅遊blog