打算下晝三點後去到菊池溫泉，我哋有一整個上午係熊本市遊玩，如果search熊本城嘅景點，第一樣出嚟嘅一定係熊本城，為咗打呢篇blog，我專登搵番2008年去名古屋城嗰一篇出嚟睇睇，原來16年前嘅我好讚歎名古屋城入面嘅博物館，因為有配有英文字幕嘅3D影片，又有會日出日落嘅古裝街，睇下熊本城有冇咁勁啦~
訂酒店時我揀咗訂埋早餐，One Station熊本嘅早餐都冇令人失望，自助早餐有和式有西式，咁耐冇去過日本，當然係主要食和式早餐啦，對於小小的詩詩嚟講，早餐食飯係一件好新奇嘅事﹗
配菜方面，除咗大路嘅烤魚、明太子、各種醃漬物之餘，出現咗一件風格好強烈嘅炸物，係一粒充滿wasabi味嘅炸蓮藕丸子，第一次食到覺得好神奇，後來係溫泉旅館時又遇到佢，旅館職員唔識講英文都專登同我介紹呢粒蓮藕丸子，就知道佢嘅特殊地位了~
大家有睇day 1嘅圖畫遊記嗎？爸爸畫咗去日本期待飲牛奶，令兩個小朋友都好奇日本嘅牛奶有咩特別，就係呢一餐早餐，曉飲咗第一杯日本牛奶之後，成日都心思思想再飲奶了﹗yummy~
執好行李寄係櫃位，我哋就出發去熊本城啦~
熊本市嘅公共交通有巴士，有類似輕鐵嘅路面電車，公共交通雖然都去到好多地方，但總係慢慢地咁，發現行路同搭車花嘅時間唔差得太遠，我哋決定步行過去熊本城﹗
街道好乾淨，空氣好舒服，行起上嚟我、day、詩都覺得唔凍，唯獨曉覺得凍，明明佢件羽絨先係新買架喎，點解呢？今日都還好，未至於話要改番搭車或者入去室內暖暖或者要買熱飲，後來行起就ok了~行下睇下嘢影下相，結果我哋花咗42分鐘，行咗2.35公里去到熊本城﹗
有少少失算嘅係，熊本城有兩邊入口，我哋去嗰日唔係假日，由二之丸停車場唔可以直接穿過去熊本城入口，於是我哋順道參觀埋加藤神社先再兜番出去搵入口~
曉上一次嚟日本仲係bb，詩就真係第一次嚟日本，平時又唔多睇日本動漫，多啦A夢同小丸子都好似唔多見去神社參拜嘅場面，難怪佢哋唔知神社係咩一回事~
兜咗個快圈，我哋就出番去二之丸停車場，再兜過去售票處買飛入場啦~都係我貪心之禍，只參觀熊本城800yen，兩個館850yen，三個館就1100yen，明明我哋都唔夠時間，但當時只覺得，價錢唔差得幾多，梗係買抵啲嗰個三館通票啦~
熊本城外觀感覺上同當年去過嘅名古屋城好似，打blog時再比一比，原來熊本城嘅主色調係黑白，而名古屋城就係綠白，真係唔同喎~所謂日本三大名城，就係熊本城、名古屋城…仲有一個係…大阪城？﹗點解當年我去大阪時冇去嘅？摷番啲舊blog睇番，真係冇去喎^^”嗰次去大阪，去得五日，仲要去白濱浸溫泉，冇去大阪城都唔出奇嘅~
熊本城其實係重建多次，多災多難嘅一座城，最初嘅熊本城係15世紀時已經建成，後來經歷火災又重建，對於現時嘅熊本人嚟講，最心痛嘅係2016年發生地震後熊本城再次受損，震後直至2021年完成修復，再次對外開放，所以而家嘅熊本城內外都新簇簇，而且裡面設計仲好簡約時尚添~
熊本城裡面一層層嘅展館介紹唔同時期嘅熊本城歷史，展覽文字全日文，其實有個熊本城參觀嘅官方app，好似有啲導覽資料，我哋又唔係歷史愛好人士，又唔係特別多時間慢慢研究，結果都冇download到嚟睇lu~最下面兩層我哋都仔細地慢慢睇下啲展品，好似建築模型、以前嘅盔甲、說明影片等，後來發現時間唔夠，三四樓好似係飛過咗，直接上去頂樓展望台~
參觀完小朋友又好攰，又有少少餓，我哋決定落番去之前經過過，睇落會好熱鬧嘅櫻花馬場城彩苑度搵食~
話說馬肉係熊本嘅名產，我訂溫泉旅館時已經可以選「馬肉刺身套餐」嘅package，我…umum…冇乜興趣試囉，感覺唔太良好，所以揀咗「季節料理套餐」~但人去到熊本之後，你無論去到邊度都好似叫你要試下馬肉刺身咁，連熊本站嘅便利店、機場紀念品店都有冰櫃放住馬肉刺身俾啲人當手信買走，街上嘅餐廳、超市等就更加不停出現，就好似打手機遊戲時出現嗰啲廣告咁，你唔download個遊戲佢就會不停pop up一樣，一日你唔食一次馬肉刺身，佢就會不停係你眼前出現咁，不過我哋直到最後嗰日都冇食到^^”~點解要呢一刻講呢，因為櫻花馬場呢度有好多小攤檔，其中一間賣炸薯餅，竟然連薯餅都係馬肉薯餅﹗﹗唔，經過嗰間鋪頭時又冇乜咩怪味嘅，有兩個可能性，一係馬肉含量極低，二就係馬肉其實都冇咩怪味囉~我哋冇買嚟食，證明唔到了~
搵到一間可以舒舒服服坐低嘅餐廳食嘢，我哋食食嘢，歇歇對腳，之後再去逛位於櫻花馬場，可以體驗歷史文化嘅熊本博物館湧湧座啦，我哋買咗嘅三館門票正好可以出場啦﹗下一篇先睇啲午餐啦~
前往其他日本旅遊blog