係一間櫻花馬場城彩苑嘅餐廳坐低，我哋貫徹全部share嘅理念，叫咗三個set一齊食，可以試多幾款唔同嘅食物嘛~當中最意想不到好味道嘅係鰻魚飯，鰻魚烤得好香，好柔軟，油脂香味好濃郁豐富，果然同平時香港買嘅急凍鰻魚唔同層次，食到我瞇瞇眼~另外個魚鍋嘅配菜炸魚都幾好味，好酥脆，可以連骨頭都食埋~
今餐no.1嘅鰻魚飯
主菜入面個魚一般，湯幾好味，配菜嘅魚仔反而唔錯～
all time favorite嘅炸豬扒
我哋食午餐嘅餐廳
食完午餐出嚟，爸爸喺自動販賣機買咗罐黑咖啡，日本好多飲品機都有得買熱飲，行到唔夠暖時，隨時都可以買啲熱嘢飲下，再一次因為兌換率嘅緣故，買嘢飲又好抵～
呢隻咪熊本城屋檐嗰隻獸？
之前我咪買咗三合一熊本城套票嘅，我以為只係夠時間去到熊本城，原來三合一套票另一個館，就係位於櫻花馬場城彩苑嘅湧湧座博物館～
有別於熊本城裏面，比較歷史性嘅展覽，呢度比較適合小朋友，有好多可以親手去試、親自去體驗嘅展覽～
跟住熊本熊GOGOGO！
幫手修復熊本城
登登！成功！
果然係曉大爺！
詩係咪狗仔？點解趴喺度嘅？
同加藤清正比比高
騎得似模似樣
我哋三個扮鬼扮馬，爸爸懶得除外套一齊着～
真係冇時間啦，我哋要返酒店拎返啲行李，出發去菊池市嘅溫泉旅館，本來同旅館講咗下晝3點鐘左右到，而家已經遲咗，唔好搞到人哋要準備開晚飯我哋先到嘛～
由櫻花馬場城彩苑行出嚟，有得搭路面電車返去熊本站，冇拎住行李時，呢啲A系統B系統電車其實都幾方便，覆蓋範圍夠闊，班次都算密，但係車廂好細，拎多少少嘢已經唔太方便～今次我哋行裝輕便，就當然好順利啦～
九州咁多溫泉，點解要去菊池溫泉？當初揀嘅時候，主要係睇下由熊本出發，去邊度交通最方便，時間唔算多，唔想花太多時間喺交通上面～跟住就比我發現咗，去菊池溫泉一程車個幾鐘就去到，好似都唔錯bor～search下菊池溫泉嘅溫泉旅館，搵到我哋最後book咗嘅宝來館，啲相影得幾靚，價錢又幾抵，有少少衝動咁就book咗～反正我覺得，去日本，無論去邊度都咁有趣，日本人總會將自己嘅城鎮promote成好有特色嘅旅遊景點，自己地方嘅農產品，promote成好值得買嘅特產～book好溫泉旅館再搵吓谷池溫泉附近有咩景點，原來有個好出名嘅菊池溪谷，有啲好靚嘅風景，山中嘅散步道，係我鍾意嘅類型，點知⋯維修呀！會close幾個月！正正因為冇咗一個主要景點，住兩晚顯得有啲太多，加上年尾放假，甚至好多舖頭、公共設施都唔開門，造就咗我哋今次好悠閒嘅假期，唔怕嘅，爸爸鍾意唔好咁忙碌，我嘛，去溫泉旅館浸溫泉之外，最重要係食好多道菜嘅晚餐，冇景點行都唔影響～
搭去菊池市要大約一個半鐘，總共50幾個站，兩個小朋友最好就係瞓覺瞓晒全程，喺車上瞓覺，曉遺傳到爸爸嘅良好基因，通常上車好快瞓着，瞓到自然醒就開開心心，詩就麻煩啲，成日話自己瞓唔着，搞到好耐先瞓，叫醒佢時又喊好耐，究竟幾時先可以唔好再落車喊呀？
我就自己打下機，睇下風景，隨時對照下地圖位置～好啦好啦，終於到啦！
前往其他日本旅遊blog