由熊本市開過嚟菊池溫泉嘅巴士落咗車，行幾分鐘就到我哋book咗嘅宝來館溫泉旅館喇，宝來館位於街尾，街頭有一間招牌好醒目嘅望月旅館，宝來館正對面有一間又大又新淨嘅溫泉酒店，點解我偏偏會book咗宝來館呢？或者就係緣份啦！
宝來館門面都幾雅緻嘅，門口有足湯，不過天氣凍，我哋都冇專登坐出嚟浸~入去時，咦，唔見人嘅？我哋四個又唔識日文，企咗係度~好在好快都有職員出嚟招呼我哋，一位係有啲年紀嘅女士，六十歲上下吧，另外有個後生仔，可能廿歲後半之類，佢哋拎拖鞋出嚟俾我哋換，再帶我哋去房間，我哋嘅「桐乃間」就係入口左邊近處，鞋櫃後幾步路就到，地下嗰層，除咗要認識房間位置之外，仲要orientate下我哋，晚飯係邊度食啦，男湯、女湯係邊，呢度係一間小旅館，房間只有廁所洗手盆，冇沖涼設備，沖涼就一定要出去小小的大浴池喇~
我哋四個唔識日文，佢哋兩個唔識中文or英文，我哋今次入住宝來館，
見證咗身體語言嘅重要性，同翻譯軟件嘅limitation~後生仔好想問我一樣嘢，我估都係同晚餐有關啦，唔好搞到咁複雜，我問「dinner？」，佢充滿驚喜咁「yes yes yes」，跟住佢數下手指，我拎電話出嚟，打開計數機，按6.30俾佢，佢就好高興咁「ok ok」，yeah，溝通成功﹗有飯食~跟住佢仲有嘢想講，「eat」、做個鋪床動作，輪到我「ok ok」了~
照計係巴士上瞓咗覺應該恢復咗體力丫，但留係溫暖嘅塌塌米房間太舒服了，佢哋兩個完全唔想出去行下，都好嘅，悠閒地休息下，泡個茶，同個漏漏地水嘅茶壺沖咗啲熱茶嚟歎下~
打開房間入面放咗各種小冊子、地圖嘅資料夾嚟睇下附近有咩特別嘢，哇，有發現﹗
原來呢間小小的、有啲殘舊嘅宝來館，竟然有我旅行最愛嘅coin laundry呀﹗﹗yeah~雖然只係嚟六日，有得洗衫都好呀，啲衫可以唔駛重覆著啦，又可以帶少啲污糟衫返香港，加上通常呢啲地方嘅洗衣液都會特別香﹗就好似上次去沙巴洗咗啲衫，香咗幾個月，12月去完旅行返嚟，香港夏天時先拎嗰啲衫出嚟著，都仲有嗰啲香味﹗
睇到冇嘢睇，我哋一齊玩啤牌﹗
玩咗鋤大D同排7，鋤大D係上次去郵輪時教識佢哋嘅，而家兩個都玩得叻咗好多了，不過嘛，day 2呢一日嘅啤牌大戰係我全勝之日呀，玩兩樣嘢、玩咁多鋪都係全部我贏，yeah~
終於等到食飯時間啦，今晚安排咗我哋去另外一間細細嘅塌塌米房間食飯，去溫泉旅館食好多樣好多樣餸，係我去日本最enjoy嘅一部份，究竟今晚有咩食呢？
原來大人同小朋友嘅餐有少少唔同，我同爸爸多咗刺身同前菜三味，炸物方面我哋係炸魚，佢哋就係沙雞+薯仔沙律，佢哋有布丁甜品，我哋就冇，其他嘅沙律、煮物、蒸蛋、湯、鍋就大人小朋友一樣，宝來館算係比較平嘅溫泉旅館，食物唔會走華麗路線，味道、擺盤樣樣都有水準，而且份量多得不得了﹗神奇嘅係，我居然全部食清光﹗﹗曉詩都算好叻啦，份量太大冇可能清得晒，但樣樣都有嘗試，鍾意嘅就食多啲啦~食物上咗部份之後，哥哥會拎白飯俾嚟俾我哋，兩隻嘢笑人哋講「rice」係「拉匙」囉~^^”
食得太飽，布丁要拎番房，晏啲先食，同埋都唔可以即刻去沖涼呀，太飽啦，要休息一陣~
返到房已經鋪好床鋪啦～
我哋大家一齊畫圖畫遊記，即時記低啲細節同感受好重要啊，耐咗就會唔記得啦~
休息多一陣都冇咁飽，我哋男子組同女子組就要分開行動啦，我帶住兩個女去女湯，爸爸自己一個去男湯～其實呢度溫泉好細，坐低沖洗身體嘅位得三個，亦只有一個size唔大嘅溫泉池～放喺度嘅一支支個人護理清潔用品只得日文，我哋三個唔識睇，唯有唧出嚟感受吓啲質地同味道，估吓係咩用途，用錯嘢都會沖得乾淨嘅～沖乾淨涼可以去浸溫泉啦，上一次嚟日本浸溫泉時，曉未夠兩歲，嗰陣識得嗌好熱好熱，唔肯同我浸，依家九歲幾，識得嘆溫泉lu，可能詩都係太細個，就快七歲嘅佢，都覺得溫泉太熱，我哋拉開呢隻窗，等空氣流通啲涼爽啲，佢都係放唔到下半身落去水入面，只可以浸吓腳，話好痛，應該佢係指，水熱到有啲刺痛嘅感覺啦～希望第二晚佢可以適應多啲，同我哋一齊享受浸溫泉嘅樂趣啦～
聽返爸爸報道男湯嘅情況，佢話洗身體嘅地方好凍，唔知點較個熱水，佢去沖涼時冇其他客人，所以佢就用個面盆，喺溫泉度在啲熱水嚟洗頭沖涼，聽落都有啲狼狽，好似第二晚都搞唔掂個熱水，結果都係咁做，不過有咗第一晚經驗，冇咁狼狽嘅～
返到房，影下浴衣造型相！
終於個肚有少少空位，可以食埋晚餐嗰兩個布甸～
跟住差不多就瞓覺啦～
前往其他日本旅遊blog