鋪得好好嘅四張床鋪，明明好寛敞，但我有種吸引力，係總會吸咗啲女嚟我身邊，就會變成咁…
咁嘅狀況，好似一張單人床就夠我哋三個瞓，哈哈~
關於宝來館嘅旅館房間，其中一樣印象好深刻嘅，就係個廁所，因為留喺旅館嘅時間長，所以每個人都去過個廁所好多次，雖然宝來館係好殘舊，房間洗手盆冇熱水，但廁板依然係會發熱嘅智能廁板，沖廁嘅水會喺水箱上面俾你洗咗手先流落去水箱，係一個逼夾嘅廁格裏面，就要轉身，再少少趴向前咁洗手，呢個動作重複咗好多次～刷牙洗面都好難忘，因為要用凍水，如果想用熱水洗都得嘅，要出去大浴場外面嘅洗手盆洗囉～
早餐當然一樣令人值得期待啦，我哋去到嗰個小房間，食物又已經set好咗~
個哥哥見我哋入座，就裝湯同拎飯過嚟~
再送上煎荷包蛋配火腿沙律，總之係日式加西式混合嘅早餐～
詩對於早餐食白飯覺得好有趣，特別都連holiday journal功課都要記落嚟～明太子俾得好闊綽，其實淨係舊明太子已經夠送晒成碗飯lu～何況仲有其他煮物、漬物、湯等等嘅菜式～
職員特別提我哋，有溫泉咖啡供應，莫非真係用溫泉水嚟沖嘅咖啡？
咖啡嘅味道我都唔太識得品評，但係宝來館個杯櫃有非常多嘅靚靚咖啡杯任揀嚟用，我今次揀咗set花花杯～
話說我哋食每餐飯主要係啲哥哥嚟serve，但啲姨姨都會入嚟同我哋傾下計，哥哥會指手畫腳+講英文單字嚟同我哋溝通，姨姨就會用手機翻譯軟件，我哋深深感受到翻譯軟件嘅不足，因為會翻譯咗啲唔知頭唔知路嘅嘢出嚟，唯有靠上文下理，人情世故去估下佢想講乜囉~
我哋食飽咗準備出門，職員阿姨發現咗我哋影個大門口，就主動幫我哋影~又問我哋係咪去阿蘇火山，我哋話「唔係呀」再支吾以對，實在好難解釋點解嚟到呢個小小的菊池市，只係去附近行下街～
知道菊池溪谷會關閉，我搵咗一啲可以去嘅地方，其中有附近嘅菊池公園同埋圖書館，睇菊池觀光協會個網頁，話有製作和菓子嘅體驗班，噢，原來要提早一個星期預約，加上遇着年底長假期，分分鐘預早知道都冇用，可能唔開門～
出到去尋日落車嘅地方，咦，有市集喎~
見到啲攤檔仲係準備緊，晏少少再返嚟就應該差不多啦～
我哋去咗公園先啦，行唔夠兩步就見到大草地同埋兒童遊樂場~
小朋友當然係衝過去爬啦~
可能之前落過雨，滑梯有啲濕，sir唔到~
爬上爬落嗰啲都好玩嘅，起碼設計同香港嗰啲唔同，有啲新鮮感～
玩完遊樂場，曉條白褲已經變成灰褲了…
我哋又玩﹗
慫恿曉爬上去大樹嘅頑皮爸~
反而行上去公園嘅觀景台嘅路上更加有驚喜，大家冬天去日本，總會諗住去睇雪，九州？唔去山上面或者內陸地區，都唔應該會見到雪，冇錯，我哋係見唔到雪，但竟然見到紅葉呀！
始終係冬天，唔係樹上嘅紅葉啦，係落晒落地上面嘅紅葉，有大量、不同顏色、不同形狀嘅紅葉，都好叫人興奮~
雙腳下有好多紅色橙色嘅星星~
大家可以執下揀下自己鍾意嘅靚樹葉，影下靚相~
爸爸都幫屎屎影咗靚相~(咁可愛嘅粉紅色柴犬叫屎屎？因為佢係當年詩詩學識去廁所大便時嘅獎勵丫嘛~)
仲可以咁玩~
菊池公園本身係出名賞櫻嘅地方，十二月當然只有光禿禿嘅樹枝啦，我哋都扮一下賞花，呵呵~
影下個到此一遊招牌先~
我哋上到最高嘅觀景台，umum…後面啲景俾我哋遮住晒添…
拎走啲人﹗大家可以相像一下，如果嗰啲光禿禿嘅樹變晒櫻花，你話幾壯觀~
落番去巴士站附近嘅觀光物產館，買咗少少手信，記得買咗啲菇、有熊本熊公仔嘅麵、少少snacks咁~
仲有，曉記掛住日本牛奶，話好想再飲，我哋就買兩樽嚟即刻飲啦，點知…買錯咗乳酪飲品﹗﹗唔係唔好，只係有啲杰囉，同埋滿足唔到心願，再搵啦﹗
我哋返一返宝來館放低啲買咗嘅嘢，就出發去下一個目的地啦~
本身計劃去圖書館，點知…
知到有好多商店、景點等都會年尾長假關門，估唔到連公立圖書館都咁快休息~
入唔到去裡面，影下個外面啦~
跟住點算？煩惱中…
我哋要冒住寒風、沿住靚英英嘅街道繼續前進啦~
前往其他日本旅遊blog