原先計劃要去嘅谷池公園就去咗，圖書館又已經開始新年長假期，仲有咁多時間，我哋做咩好？睇睇個Google Map，有一處區域話係繁忙地帶，但又睇唔出係啲乜，反正係步行距離，過去睇下係咩啦，我哋都要食午飯㗎嘛～
睇相睇唔出嚟，其實喺戶外咁樣行都幾凍，曉件羽絨明明係新買，摸落都幾厚幾暖丫，但呢幾日通常都係佢話凍，行行吓出現救星啦！
路上見到有一間，叫做「古能美」嘅和菓子店，起碼入去暖吓啦～
入到去有驚喜，原來舖頭有提供免費茶水，我哋決定買少少嘢幫襯下，順道坐低飲啲熱嘢暖下～
啲手信都幾別緻，我同爸爸都分別買咗啲，打算拎返去公司同埋小組，即刻坐低食嘅，有蝦條、wasabi豆、一件栗子蛋糕，個栗子蛋糕唔係cream cream嗰種，而係乾身嘅，入面有啲細細粒嘅栗子，好甘香美味呀，我諗起我鍾意栗子蛋糕嘅爸，不過距離返香港仲有咁多日，都係唔好買返去啦～
休息嘅位置有熱茶熱水熱咖啡供應，其實都有凍嘅，我諗凍嘅夏天會受歡迎啲啦～我哋一邊食零食，一邊飲熱嘢，個身暖番個人又恢復元氣～倒一倒瀉嘢，就更加醒神添-～(^_^*)嗰度仲有一隻大玻璃，可以睇店入面嘅師傅整餅糕餅，可能就快放長假啦，佢哋好似好悠閒咁～
滿載而歸﹗
休息完，繼續向「繁忙地帶」進發，途中經過民宅、唔開門嘅商店、冇人嘅學校⋯成個城鎮都靜英英，究竟繁忙地帶可以有幾繁忙呢？
行下行下就出現啦，開始見到有招牌亮麗嘅食店，運動用品店，仲有一間對我哋嚟講好新鮮嘅二手物品店～二手物品店就好似收費版嘅明愛賣物會，入面嘅嘢由衫、飾物、手袋、鞋、文具、家居用品等，乜都有，啲貨睇落都幾新淨企理喎，點解我哋入去睇得咁仔細，其實係啱啱落雨呀！
稍稍避雨出返嚟，行多兩步就到真正嘅繁忙地帶啦，原來嗰度有個大商場，分分鐘係全個菊池市最大嘅商場都未定～
呢個叫做夢空間嘅商場，有超級市場，服裝店、書店、精品文具店等等，風格有啲懷舊，感覺好似我哋小學時代去嘅八佰伴咁，貨品嘛，亦見唔到大嘅國際品牌～對於我哋嚟講，呢個商場非常寶貴，因為我哋可以喺度消磨好耐時間呀，仲可以順道去超市shopping同埋食午餐添～早餐食得咁飽，其實都未餓，我哋逛下商店先，臨走先去超市，去超市我實會買嘢，唔好拎住咁重周圍行嘛～
為求消磨最多嘅時間，喺精品文具店發現有DIY小手工用品賣，係一啲細細粒嘅襟章質地嘅小飾物，可以燙喺手袋、小錢包、八達通套之類嘅布質地物品~
曉詩一人揀咗個小錢包，再慢慢揀啲小飾物，咁又花咗一啲時間（同埋錢）喇╮(╯▽╰)╭～
書店方面，都大有收穫~
我哋買咗一本10年日記呀，係呀，真係可以寫10年㗎，1月1日嗰一頁分開10格，由2025寫到2034，如果我哋真係堅持寫落去嘅話，wow，寫到曉19歲！詩16歲！umum⋯打blog嘅呢一刻係去完旅行之後嘅三月中，errrrr⋯我哋都仲有寫緊嘅，不過冇之前咁勤快囉，有時可能隔咗三兩日先補返寫，呢個確實唔係好現象，不過我會堅持將本日記放喺當眼處，即使最後得返我一個寫，都寫啦～因為好擔心會悶會冇嘢做，喺書店，仲買咗一本Sudoku雜誌同埋一本靚靚兔子填色冊，返到去點都有啲嘢可以做呀嘛～好似仲買咗把文具鉸剪，因為感覺日本啲鉸剪會好好剪^^;
另一個旅程highlight，都喺夢空間度發生，我哋影咗超級驚嚇嘅美顏貼紙相！
好多年冇影過貼紙相了，睇下點搞先~
影嘅時候唔知道係美顏，就當普通咁樣影，擺下甫士，對住鏡頭笑，影好就出嚟等相啦，點知俾我哋edit，加sticker寫字時…
一見到啲相，真係笑到停唔到，非常恐怖，特別係變咗少女bling bling眼睛嘅爸爸，老實講，其實我哋四個都咁恐怖～o(≧v≦)o
呢幾張貼紙相，成為呢個旅程，其中一樣最值得紀念嘅紀念品～
恐怖經歷留念~
去超級市場，買多少少立雜嘢，又買啲水果~
最重要係，曉終於買到日本牛奶啦！yeah～
夢空間做緊購物抽獎活動，我哋每次購物都話俾抽獎券我哋，我哋第二日就走，梗係抽中都冇我哋份啦，但見到啲禮物有咩有咩時，都好好奇咁想像一下如果我哋中咗獎會點，有好多係好大嘅禮物，電器呀、庭園用品呀咁，如果我哋真係抽中咗都幾搞笑~
臨離開時，經過精品店見到一對好可愛嘅花園鰻公仔，我叫住爸爸睇，我懶聰明咁話：「係你鍾意嘅花園鰻呀﹗」爸爸尷尬地笑一笑：「頭先影咗啦﹗」哈，佢真係鍾意架~
早係我叫佢睇之前佢自己已經影咗嘅花園鰻~
我哋去咗夢空間轉出去間長崎雜錦麵店度食午餐，好似壽司郎咁用平板嚟落單，時間去到好晏都唔太肚餓，但另一方面，夜晚又要食大餐，午餐又唔敢食太多，我哋叫咗有湯麵有炒麵share嚟食~
乾淨企理嘅店，坐得舒服~
湯麵
味道就中規中矩啦，但呢間麵店，係我哋喺菊池市見到最多人嘅地方，甚至要排隊等位添呀～
食完嘢，我哋就慢慢行返去宝來館啦，回程時知道距離，感覺快好多就到～
臨返到去旅館，又有另一間和菓子店~
我哋買咗少少和菓子帶返香港，另外呢度有免費贈送嘅2025月曆，頁頁都係印刷精美嘅和式西式糕點，見到就想食，當地人將個月曆掛喺屋企，一定可以提醒佢哋返去幫襯～
將歷代師傅嘅相貼係度，好似好勁好專業咁~
我手上嗰卷就係月曆啦~
返到宝來館lu~後面正正係我哋間房，爸爸話隔離就係男湯嘅外湯，夜晚出嚟凍到震~
前往其他日本旅遊blog