我哋要離開住咗兩晚嘅宝來館啦，當然，最後一個早上，都要嘆多一次豐富嘅日式早餐啦！
好似之前咁，雖然話係日式，但都加咗佢哋嘅心意喺入面，總之就想將最好嘅嘢比我哋咁~
今餐嘅早餐，有日式嘅湯、白飯、各種餸菜…
但食食下，居然拎咗一人一份瑞士卷入嚟喎，仲要超多cream，再一次想講，早知唔裝咁多白飯啦～雖然好cream，但係好好味呀，連爸爸都讚，仲一直鼓勵曉、詩，唔好顧住食其他嘢食到飽晒，一定要試下個瑞士卷～我？梗係全數食清光啦！
乳酪同香蕉就得小朋友有，大人冇~
返房執埋啲行李，我哋就去搭返嗰架好多好多站嘅巴士出返去熊本市啦，目標中午左右時間去到熊本站，我哋會搭火車去天草，我嘅計劃係一邊食車站便當一邊搭火車，咁就冇咁悶啦，又可以慳返啲時間～
本來擔心宝來館規模細，又有啲古老，怕冇得用卡埋單，我專登帶咗多啲現金準備埋單，點知我太睇小人哋了，原來有得碌卡~埋好張單，老板娘好熱情地同我哋道別，不住用翻譯app同我哋講好多嘢，包括讚我老公靚仔…哈哈﹗日本人非常熱情，不但送我哋出門口，仲目送我哋，直至我哋消失係佢哋嘅視線，話說我哋其中一隻喼啲轆壞壞地，拖起嚟唔太暢順，我哋話，千祈唔好卡住呀，如果我哋呢條短短嘅路上出咗啲咩問題，佢哋一定會飛撲出嚟協助，咁就唔好意思啦~
再見啦菊池市，再見啦宝來館~我相信未來嘅日子再嚟多一次嘅機會應該微乎其微了~
等巴士
超多站嘅路線
天氣凍，佢哋係咁話自己個口有噴煙出嚟，叫我影低~
拆緊啲聖誕裝飾了~
係車上，曉好似打Zelda嘅智慧的再現好有成績，詩就睇家姐打機，我應該玩下夢幻家園之類，爸爸應該瞓多一覺吧~
可能架巴士真係搭得太耐，見出道熊本市區都仲有啲時間，我忽發奇想，不如中間落車，搵個地方寄低啲行李，出去行陣街啦～巴士去到最熱鬧嘅通町筋時，未嚟得切當機立斷拎晒啲行李同細路落車，結果去到櫻町先落，嗰度係長途巴士總站，確實係有locker可以寄存行李，但係已經full晒啦～我只能夠好沮喪咁樣後悔做咗呢個決定⋯唔通又再等下一班車繼續去熊本站咩？我相信大商場會有得寄存物品，於是上去商場搵下，又真係有喎，不過有啲問題，商場唔係locker，而係有人看舖，但嗰個人唔係長期都喺度，我哋又打唔到日本電話，好不容易等到佢返嚟，剩低可以去行街嘅時間又得返唔多啦～
寄好行李一身輕鬆，知道我哋扮邊個嘅動作嗎？
其實冇乜話特別想行啲乜，出到去，去啲熱鬧嘅地方啦，最緊要唔好蕩失路，要識得返嚟拎返啲行李～
我哋去咗一條商店街–太陽路新市街，相信呢度到夜晚應該會更熱鬧，因為嗰度有好多食肆同埋彈珠店，我哋落一落車呢段時間，戰利品就只有兩個headphone，買俾兩個女插iPad用，另外又經過咗一啲食店，見到啲魚生呀、海鮮呀好平好吸引咁，不過估計都冇乜機會食到啦～
好可愛嘅熊本城~
咁大支手日本旗，證明去咗日本~
又夠時間要返去拎行李，嗰個職員又唔見咗啦，佢可能一個人負責管幾個地方都未定，我哋等到唔夠時間再等落去，迫不得已膽粗粗問下隔籬舖嘅人可唔可以幫我哋打個電話，睇嚟呢件事經常發生，佢好淡定咁，好快就幫我哋聯絡到寄存行李嗰個職員～
熊本市有好似輕鐵嘅路面電車行駛，叫做咩A系統B系統，其實路線覆蓋夠闊，去到一般要去嘅地方，班車都夠密，唔需要等好耐，但係車廂實在太細啦，我哋本來諗住搭路面電車返熊本站，可能撞着繁忙時間，多人到連個月台都上唔到，我哋仲要拎住兩件大行李，即使逼到上月台，恐怕都逼唔到上車，眼見走咗兩班車都未上到，我哋搭咗呢個旅行嘅唯一一次的士，向來對日本的士嘅印象就係貴，可能而家喺香港都搭多咗的士，加上兌換率問題啲Yen夠平，總之呢程的士覺得好值得啦～
時間繼續緊迫，去到熊本站第一件事，要兌換事先喺網上買咗嘅火車飛，好在都好順利～跟住，爸爸負責睇住啲行李，我就同兩個女衝入去車站嘅商舖買便當，求其買咗兩個可愛嘅兒童便當，兩款唔同嘅大人便當就算數啦，都唔知內容有啲乜～帶返兩個女同啲便當出去搵爸爸，我再次衝入市場，因為我見到有得賣草莓大福，草莓大福係十幾年前，同爸爸去關西旅行時嘅美好回憶，好味+甜蜜嘅blu blu blu，一定要俾啲女試下～
呢張同熊本熊站長嘅selfie，應該係我衝入去買草莓大福時影嘅吧~
衝鋒陷陣完一輪，總算順利入閘，我哋搭去天草嘅係觀光列車A-Train，隔好靚嘅火車已經喺月台等緊我哋啦！
前往其他日本旅遊blog