由熊本站前往三角站嘅觀光列車A-Train唔單止係交通工具，仲係提供一個獨特體驗嘅旅程，車廂設計有種西式懷舊風格，全車只有兩卡，其中一卡仲設有Bar枱，居然有酒賣呀！
A-Train外觀都與眾不同
上車啦~
做所有嘢之前同休斯參觀咗個廁所先，有少少狼狽，因為去完廁所唔知點洗手，原來喺水龍頭出水位，向上頂上去，就有水出，難怪搵唔到個手掣啦～
車程一個鐘鬆啲唔算耐，但我哋就好多嘢要做，要食豐富嘅車站便當啦，嘆埋個草莓大福啦，仲要參觀A-Train、影下相啦～
小朋友個便當，係可愛嘅熊本熊便當，唔食得都睇得，佢哋都好滿意個味道~
預備開餐﹗
食嘢時我同詩坐，爸爸同曉坐，爸爸隨手攞咗貴少少嗰個大人飯盒，我好好奇，兩個飯盒價錢相差百幾Yen，究竟有咩大分別呢？
原來爸爸嗰個有12格，我嗰個就有9格，既然咁濕濕碎碎，大家都各自有咁多款食物，我哋放棄咗平時會做嘅「全部都share」啦～
我嗰9格入面，已經有三款唔同嘅飯，仲包含咗各種醃菜、餸菜，連甜品都有lu～
個草莓大福同以前食嘅有啲唔同，以前食過嘅係紅豆餡，今次個餡係白色，唔知係咪叫做白豆沙？食落去，同記憶入面一樣，外面柔軟、甜蜜，士多啤梨就非常多汁，都係咁好味呀！
有幾好味？睇下曉嘅表情就知！
佢表情真係好豐富~
仲要亂入詩詩張相﹗哈哈哈哈哈~
我去吧枱嗰邊車卡睇下，幫小朋友揀咗熊本產嘅果汁，幫爸爸揀咗個果汁梳打，我自己就揀咗威士忌雞尾酒特飲，喺爵士樂嘅氛圍之下，有得喺火車入面嘆Cocktail，感覺好特別～
有飲管嗰杯係梳打，冇飲管係酒，可以神不知鬼不覺靜靜雞飲酒唔俾人知~
歎住飲品好chill~
吧枱嗰邊除咗有嘢飲賣之外，仲有得蓋紀念印章，同有影相位～
小朋友忙碌中
一生人一次嘅乘車紀念，我哋回程時再搭再影都影唔番同一張啦，日期會變成12月30日了﹗
食完、飲完、玩完、影完，就差唔多時間落車啦！因為路途上太忙，連風景都唔係好得閒睇～
A-Train嘅總站叫三角站，對面就係三角港，我哋book咗Sea Cruise Glamping去一晚豪華露營，要搭船過去，船期同A-Train到站時間安排得天衣無縫，所以我哋冇足夠時間周圍行或者蕩失路，要快快搵到Sea Cruise嘅碼頭先得～
去到碼頭，馬上就可以上船lu，我哋帶住大大件行李，懶得迫入去船艙，同埋天氣咁好，我哋都想睇風景嘛～
陽光普照心情好
諗住當埋遊船河
出海去﹗
只係⋯
估唔到一開船就變得咁凍，咁大風！吹到爸同曉要攬埋一舊取暖～
包埋個頭好少少~
去天草嘅第二日我哋book咗出海睇海豚，估唔到呢一程短短20分鐘嘅船程，都比佢哋視覺優良嘅邱氏三父女見到一條野生海豚！！我冇爸爸嘅super normal視力基因，唯有寄望聽日可以睇到啦～
隻船泊岸，一切又歸於平靜了~今日花咗好多時間喺交通，除咗由菊池出來嗰程巴士之外，其他嘅交通都算係遊覽嘅一部份嘅，好不容易，我哋終於嚟到天草啦！好期待glamping呀！
前往其他日本旅遊blog